'આ દેખાડો નથી, સાચો પ્રેમ છે': મોદી-ટ્રમ્પના સંબંધો પર US રાજદૂતે કર્યો મોટો ધડાકો, જુઓ વીડિયો
India US Relations: ભારતમાં પદ સંભાળતા જ અમેરિકન રાજદૂત સર્જિયો ગોરે PM મોદીના ભરપેટ વખાણ કર્યા; વેપાર કરાર અને સેમિકન્ડક્ટર સપ્લાય ચેઈન પર મોટી જાહેરાત કરી.
India US Relations: ભારત અને અમેરિકા વચ્ચેના સંબંધો (India-US Relations) હવે એક નવા અને સુવર્ણ યુગમાં પ્રવેશી રહ્યા હોય તેવું લાગી રહ્યું છે. ભારતમાં અમેરિકાના નવનિયુક્ત રાજદૂત સર્જિયો ગોરે (Sergio Gor) પદભાર સંભાળતાની સાથે જ બંને દેશોની વ્યૂહાત્મક ભાગીદારીને લઈને અત્યંત સકારાત્મક સંકેતો આપ્યા છે. તેમણે સ્પષ્ટ શબ્દોમાં કહ્યું હતું કે, "ભારત જેવો બીજો કોઈ દેશ નથી." આ સાથે જ તેમણે વડાપ્રધાન નરેન્દ્ર મોદી અને અમેરિકી રાષ્ટ્રપતિ ડોનાલ્ડ ટ્રમ્પ વચ્ચેની કેમેસ્ટ્રી પર પણ મોટું નિવેદન આપ્યું છે.
'મોદી અને ટ્રમ્પ વચ્ચેનો પ્રેમ સાચો છે'
રાજદૂત સર્જિયો ગોરે પીએમ મોદી અને ડોનાલ્ડ ટ્રમ્પ (Donald Trump) વચ્ચેના સંબંધો વિશે વાત કરતા કહ્યું કે, "આ બંને વૈશ્વિક નેતાઓ વચ્ચેની મિત્રતા માત્ર દેખાડો નથી, પરંતુ તે એકદમ વાસ્તવિક (Genuine Friendship) છે." ગોરે વડાપ્રધાન મોદીને રાષ્ટ્રપતિ ટ્રમ્પના "પ્રિય મિત્ર" ગણાવ્યા હતા અને ઉમેર્યું હતું કે બંને નેતાઓ એકબીજા પર અપાર વિશ્વાસ અને આદર ધરાવે છે, જે બંને લોકશાહી દેશો માટે ફાયદાકારક છે.
ભારત માટે મોટા સમાચાર: 'પેક્સ સિલિકા'માં મળશે આમંત્રણ
સર્જિયો ગોરે એક મોટી વ્યૂહાત્મક જાહેરાત કરતા જણાવ્યું હતું કે, આવતા મહિને ભારતને અમેરિકાના નેતૃત્વ હેઠળની નવી વૈશ્વિક પહેલ 'પેક્સ સિલિકા' (Pax Silica) માં 'સંપૂર્ણ સભ્ય' તરીકે જોડાવા માટે સત્તાવાર આમંત્રણ આપવામાં આવશે. આ જાહેરાત ભારતની ટેકનોલોજીકલ ક્ષમતા પર અમેરિકાના વિશ્વાસની મહોર સમાન છે.
શું છે પેક્સ સિલિકા (Pax Silica)?
જો તમે વિચારતા હોવ કે પેક્સ સિલિકા શું છે, તો તમને જણાવી દઈએ કે આ અમેરિકા દ્વારા શરૂ કરાયેલ એક મહત્વાકાંક્ષી પ્રોજેક્ટ છે.
ઉદ્દેશ્ય: મહત્વપૂર્ણ ખનિજો, એનર્જી, સેમિકન્ડક્ટર (Semiconductors), આર્ટિફિશિયલ ઈન્ટેલિજન્સ (AI) અને લોજિસ્ટિક્સ માટે સુરક્ષિત સપ્લાય ચેઈન ઊભી કરવી.
સભ્યો: અત્યાર સુધી જાપાન, દક્ષિણ કોરિયા, યુકે અને ઈઝરાયલ આ પહેલનો હિસ્સો છે. હવે ભારત પણ આ પાવરફુલ ગ્રુપમાં જોડાશે.
વેપાર કરાર પર વાતચીત તેજ
ભારત અને અમેરિકા વચ્ચેના વેપાર કરાર (Trade Deal) અંગે અપડેટ આપતા ગોરે જણાવ્યું હતું કે બંને દેશો આ ડીલને ફાઈનલ કરવા માટે કટિબદ્ધ છે. બંને પક્ષો વચ્ચે સતત ચર્ચાઓ ચાલી રહી છે અને આગામી ઔપચારિક વાટાઘાટો આવતીકાલે જ યોજાવાની છે.
'અતુલ્ય ભારત'ના વખાણ
પોતાના વ્યક્તિગત અનુભવો શેર કરતા રાજદૂત ગોરે કહ્યું કે, "નમસ્તે, અહીં આવવું એ મારા માટે લ્હાવો છે." તેમણે યાદ કર્યું કે તેઓ 2023 માં પહેલીવાર ભારત આવ્યા હતા ત્યારે જયપુર, રણથંભોર અને પંજાબની મુલાકાત લીધી હતી. તેમણે ભારતીયોની મહેમાનગતિના વખાણ કરતા કહ્યું કે 'અતુલ્ય ભારત' (Incredible India) ખરેખર તેના નામને સાર્થક કરે છે.
ટોપ સ્ટોરી
ટ્રેન્ડિંગ સમાચાર
