UAE અને બહેરીન બાદ રશિયા PM મોદીને આપશે દેશનો સર્વોચ્ચ નાગરિક સન્માન

મોદીએ આ સન્માન આપવા બદલ રશિયાનો આભાર માન્યો હતો.

નવી દિલ્હીઃ UAE અને બહેરીન બાદ રશિયા વડાપ્રધાન નરેન્દ્ર મોદીને રશિયાનો સર્વોચ્ચ નાગરિક સન્માન આપશે. રશિયન રાષ્ટ્રપતિ પુતિને જાહેરાત કરી હતી કે વડાપ્રધાન મોદીને રશિયાનો સર્વોચ્ચ નાગરિક સન્માન ‘ઓર્ડર ઓફ સેન્ટ એન્ડ્ર્યૂ ધ અપોસ્ટલ’ આપવામાં આવશે. મોદીએ આ સન્માન આપવા બદલ રશિયાનો આભાર માન્યો હતો. રશિયાના પોર્ટ ટાઉન વ્લાદિવોસ્તોકમાં બંન્ને દેશોના ડેલિગેશન વચ્ચે પૂર્ણ થયેલી 20મા રાષ્ટ્રીય સંમેલન બાદ મોદીએ બંન્ને દેશો વચ્ચે ઐતિહાસિક મૈત્રીપૂર્ણ સંબંધોનો ઉલ્લેખ કર્યો હતો. મોદીએ રશિયાને ભારતનો પરમ મિત્ર અને વિશ્વસનીય ભાગીદાર ગણાવ્યો હતો. વડાપ્રધાને કહ્યું કે, તમે (પુતિન) પોતાના દેશનો સૌથી મોટો નાગરિક સન્માન આપવાનો નિર્ણય કર્યો છે. એ માટે હું તમારો અને રશિયાના લોકોનો આભારી છું. આ બંન્ને દેશો વચ્ચે વિશેષ મિત્રતા દર્શાવે છે. આ એક અબજ 30 કરોડ ભારતીયો માટે સન્માનનો વિષય છે. તેમણે વધુમાં કહ્યુ કે રશિયા ભારતનો પરમ મિત્ર અને વિશ્વસનીય ભાગીદાર છે. બે મિત્રો હોવાના કારણે અમારી વચ્ચે અનેકવાર મુલાકાતો થઇ છે. અમે ફોન પર પણ ખૂબ ચર્ચા કરી છે. તેમણે કહ્યું કે, ઇસ્ટર્ન ઇકોનોમિક ફોરમમાં મને મળેલું આમંત્રણ સન્માનની વાત છે. બંન્ને દેશો વચ્ચે સહયોગને એક નવી ઉંચાઇ આપવા માટે આ એક નવો ઐતિહાસિક અવસર છે.