'બાંગ્લાદેશમાં હિંદુઓ પર હુમલાનો માસ્ટર માઇન્ડ છે મોહમ્મદ યુનુસ', જાણો કોણે કર્યો દાવો?

ન્યૂયોર્કમાં અવામી લીગના એક કાર્યક્રમને વર્ચ્યુઅલ રીતે સંબોધિત કરતા હસીનાએ આ વાત કરી હતી.

Sheikh Hasina

Source : PTI

બાંગ્લાદેશમાં લઘુમતી હિન્દુઓ સામે હિંસા ચાલુ છે. દેશમાં તખ્તાપલટ બાદ શેખ હસીના ભારતમાં છે. હવે શેખ હસીનાએ વચગાળાની સરકારનું નેતૃત્વ કરી રહેલા મોહમ્મદ યુનુસ પર સામૂહિક હત્યા અને લઘુમતીઓને નિશાન બનાવવાનો આરોપ લગાવ્યો છે. તેમણે આરોપ લગાવ્યો હતો કે બાંગ્લાદેશમાં થઈ રહેલા નરસંહાર માટે મોહમ્મદ યુનુસ જવાબદાર છે.

ન્યૂયોર્કમાં અવામી લીગના એક કાર્યક્રમને વર્ચ્યુઅલ રીતે સંબોધિત કરતા હસીનાએ મંદિરો, ચર્ચો અને ધાર્મિક સંગઠન ઈસ્કોન પર વારંવાર થતા હુમલાઓ બદલ યુનુસની ટીકા કરી હતી. શેખ હસીનાએ કહ્યું હતું, મારા પર સામૂહિક હત્યાનો આરોપ છે. પરંતુ આ હુમલાઓનો માસ્ટરમાઈન્ડ મોહમ્મદ યુનુસ છે.

11 ચર્ચ અને ઘણા મંદિરો પર હુમલા કરવામાં આવ્યા હતા

શેખ હસીનાએ કહ્યું કે આજે શિક્ષકો, પોલીસ, નેતાઓ, દરેક પર હુમલા થઈ રહ્યા છે. હિન્દુ, બૌદ્ધ અને ખ્રિસ્તીઓને નિશાન બનાવવામાં આવી રહ્યા છે. 11 ચર્ચ અને અનેક મંદિરો પર હુમલા થયા છે. ઇસ્કોન પર હુમલો થયો હતો. યુનુસ સરકાર પર સવાલ ઉઠાવતા તેમણે કહ્યું કે, હવે બાંગ્લાદેશમાં લઘુમતીઓને કેમ નિશાન બનાવવામાં આવી રહ્યા છે?

ભૂતપૂર્વ વડાપ્રધાને દાવો કર્યો હતો કે તેમના પિતા અને બંગબંધુ શેખ મુજીબુર રહેમાનની જેમ જ તેમની હત્યા કરવાની યોજના હતી. હસીનાએ કહ્યું કે તેમણે બાંગ્લાદેશ છોડી દીધું કારણ કે તે "નરસંહાર" ઇચ્છતા નથી.

ચિન્મય પ્રભુની ધરપકડ બાદ હિંસા ફાટી નીકળી

બાંગ્લાદેશમાં કટ્ટરપંથી ઇસ્લામવાદીઓ દ્વારા હિંદુ સમુદાય પર હુમલાઓ વચ્ચે યુનુસ પર આકરા પ્રહારો કર્યા હતા. ત્રણ હિન્દુ સાધુઓની ધરપકડથી ચિંતામાં વધારો થયો છે. વિદ્યાર્થીઓના હિંસક વિરોધ વચ્ચે હસીના 5 ઓગસ્ટના રોજ બાંગ્લાદેશમાંથી ભાગીને ભારત આવ્યા હતા.  જેના પગલે મોહમ્મદ યુનુસની આગેવાની હેઠળની વચગાળાની સરકારે દેશનો હવાલો સંભાળ્યો હતો. બાંગ્લાદેશના ચટગાંવ સ્થિત ઈસ્કોન પુંડરિક ધામના પ્રમુખ ચિન્મય પ્રભુની ધરપકડ બાદ સ્થિતિ વણસી રહી છે. ચિન્મય પ્રભુની ધરપકડના વિરોધમાં હિન્દુ સમુદાયના લોકો રસ્તા પર ઉતરી આવ્યા છે.

HCમાં ભારતીય ચેનલો પર પ્રતિબંધ મૂકવાની માંગ

ઢાકા ટ્રિબ્યુનના રિપોર્ટમાં જણાવાયું છે કે બાંગ્લાદેશની સંસ્કૃતિ અને સમાજ પર ભારતીય મીડિયાની અસર અંગે વધતી જતી ચિંતાઓને ટાંકીને દેશમાં ભારતીય ટીવી ચેનલોના પ્રસારણ પર પ્રતિબંધની માંગ કરતી બાંગ્લાદેશ હાઈકોર્ટમાં એક અરજી દાખલ કરવામાં આવી છે.