યુએસ સુપ્રીમ કોર્ટનો ટ્રમ્પને ઝટકો: ભારત સહિતના દેશો પર લાદેલા ટેરિફ ગેરકાયદેસર જાહેર
યુએસ સુપ્રીમ કોર્ટે ડોનાલ્ડ ટ્રમ્પના ટેરિફ નિર્ણયને ગેરકાયદેસર ઠેરવી મોટો ઝટકો આપ્યો છે. ભારત પરના 50% સુધીના ટેરિફ અને રશિયન ઓઈલ વિવાદ પર કોર્ટનો આદેશ વાંચો.
US Supreme Court Tariff Ruling: અમેરિકાની સર્વોચ્ચ અદાલતે રાષ્ટ્રપતિ ડોનાલ્ડ ટ્રમ્પની આક્રમક વેપાર નીતિઓ પર લગામ લગાવી છે. શુક્રવારે (20 February, 2026) યુએસ સુપ્રીમ કોર્ટે એક ઐતિહાસિક ચુકાદો આપતા અન્ય દેશોમાંથી આયાત થતા માલ પર ટ્રમ્પ વહીવટીતંત્ર દ્વારા લાદવામાં આવેલા ટેરિફને ગેરકાયદેસર જાહેર કર્યા છે. કોર્ટે સ્પષ્ટ કર્યું કે રાષ્ટ્રપતિએ રાષ્ટ્રીય કટોકટીના કાયદાનો દુરુપયોગ કરીને પોતાના અધિકારક્ષેત્રનું ઉલ્લંઘન કર્યું છે. આ નિર્ણય ભારત સહિત વિશ્વના 100 થી વધુ દેશો સાથેના વેપાર સંબંધો પર વ્યાપક અસર પાડશે, કારણ કે આયાતકારોને હવે મોટું રિફંડ મળવાની શક્યતા છે.
6-3 ના મતે ચુકાદો: રાષ્ટ્રપતિની સત્તા પર અંકુશ
સુપ્રીમ કોર્ટની બેન્ચે 6-3 ના બહુમતી મતે આ નિર્ણય સંભળાવ્યો હતો. મુખ્ય ન્યાયાધીશ જોન જી. રોબર્ટ્સ જુનિયરે બહુમતી પક્ષે લખતા જણાવ્યું હતું કે, ટેરિફ લાદવાનો અધિકાર બંધારણીય રીતે 'કોંગ્રેસ' (અમેરિકી સંસદ) પાસે છે, રાષ્ટ્રપતિ પાસે નહીં. ટ્રમ્પે 1977 ના 'ઇન્ટરનેશનલ ઇમરજન્સી ઇકોનોમિક પાવર્સ એક્ટ' નો ઉપયોગ કરીને એકપક્ષીય રીતે કર લાદ્યા હતા, પરંતુ કોર્ટે નોંધ્યું કે આ કાયદો રાષ્ટ્રપતિને અમર્યાદિત ટેરિફ લાદવાની શક્તિ આપતો નથી.
જ્યારે ન્યાયાધીશ ક્લેરેન્સ થોમસ, સેમ્યુઅલ એ. એલિટો જુનિયર અને બ્રેટ એમ. કેવનોએ આ ચુકાદા સામે અસંમતિ દર્શાવી હતી.
ભારત પર લાદેલા દંડ અને ટેરિફનું ગણિત
ટ્રમ્પની ટેરિફ નીતિથી ભારત પણ પ્રભાવિત થયું હતું. ટ્રમ્પ વહીવટીતંત્રે શરૂઆતમાં ભારત પર 25% ટેરિફ લાદ્યો હતો. જોકે, ભારતે રશિયા પાસેથી તેલ ખરીદવાનું ચાલુ રાખતા તેને 'દંડ' તરીકે વધારીને 50% કરી દેવામાં આવ્યો હતો. ત્યારબાદ દ્વિપક્ષીય વેપાર વાટાઘાટો અને કરારો પછી આ દર ઘટાડીને 18% કરવામાં આવ્યો હતો. હવે સુપ્રીમ કોર્ટના આ ચુકાદા બાદ આ તમામ વસૂલાત કાયદાકીય કપાત હેઠળ આવી શકે છે.
કોણે પડકાર્યા હતા ટ્રમ્પના ટેરિફ?
ટ્રમ્પના આ કડક આર્થિક પગલાં સામે માત્ર દેશો જ નહીં, પરંતુ અમેરિકાના આંતરિક રાજ્યો અને નાના વ્યવસાયોએ પણ મોરચો માંડ્યો હતો. એક શૈક્ષણિક રમકડાની કંપની અને વાઇન આયાતકાર સહિત ડઝન જેટલા રાજ્યોએ કોર્ટમાં દાવો કર્યો હતો કે આ ટેરિફથી ગ્રાહકો માટે કિંમતો વધી છે અને વેપારમાં વિક્ષેપ પડ્યો છે. નીચલી અદાલતોમાં પણ 7-4 ના મતે ટ્રમ્પ વિરુદ્ધ ચુકાદો આવ્યો હતો, જેને હવે સુપ્રીમ કોર્ટે બહાલ રાખ્યો છે.
અમેરિકી અર્થતંત્ર પર દૂરગામી અસરો
આ ચુકાદાથી ટ્રમ્પ વહીવટીતંત્રને મોટો રાજદ્વારી અને આર્થિક ફટકો પડ્યો છે. સોલિસિટર જનરલે અગાઉ ચેતવણી આપી હતી કે જો આ સત્તાઓ રદ કરવામાં આવશે તો અર્થતંત્ર 'મહામંદી' જેવી સ્થિતિમાં મુકાઈ શકે છે. જોકે, વિશ્લેષકો માને છે કે આ નિર્ણયથી મુક્ત વ્યાપારને વેગ મળશે અને આયાતી માલની કિંમતોમાં ઘટાડો થવાથી ગ્રાહકોને રાહત મળશે.
ટોપ સ્ટોરી
ટ્રેન્ડિંગ સમાચાર
