પાકિસ્તાનની પંજાબ વિધાનસભામાં મહિલા ધારાસભ્યોએ બોલાવી બઘડાટી,જુઓ વીડિયો

પાકિસ્તાનમાં ચાલી રહેલા રાજકીય સંકટ વચ્ચે રવિવારે પંજાબ વિધાનસભામાં ભારે હોબાળો થયો હતો. વિધાનસભામાં શાસક પક્ષ અને વિપક્ષના મહિલા ધારાસભ્યો સામસામે આવી ગયા હતા.

પંજાબ વિધાનસભામાં ધક્કામુક્કી

પાકિસ્તાનમાં ચાલી રહેલા રાજકીય સંકટ વચ્ચે રવિવારે પંજાબ વિધાનસભામાં ભારે હોબાળો થયો હતો. વિધાનસભામાં શાસક પક્ષ અને વિપક્ષના મહિલા ધારાસભ્યો સામસામે આવી ગયા હતા. વિધાનસભામાં હંગામાનો આ વીડિયો સોશિયલ મીડિયા પર વાયરલ થયો છે. વીડિયોમાં મહિલા ધારાસભ્યો એકબીજા સાથે ધક્કા-મુક્કી અને લડાઈ કરતા જોઈ શકાય છે. આ ઉપરાંત મહિલાઓએ એકબીજાના વાળ પણ ખેંચ્યા હતા. તમને જણાવી દઈએ કે પાકિસ્તાનના વડાપ્રધાન ઈમરાન ખાને રવિવારે પંજાબ પ્રાંતના ગવર્નર ચૌધરી સરવરને હટાવી દીધા હતા, જ્યારે નવા પ્રાંતના મુખ્યમંત્રીની ચૂંટણી સ્થગિત કરી દેવામાં આવી હતી.

 

Punjab Assembly in Lahore today.
The political temperature is clearly soaring across the country that needs to be arrested. pic.twitter.com/X5swAP2zlu

— Aamir Saeed (@AamirSaeed_) April 3, 2022

 

સ્પીકર કાર્યાલયનો દાવો, હંગામાને કારણે ચૂંટણી મોકૂફ રાખવામાં આવી

નેશનલ એસેમ્બલીના પગલે ચાલીને, પંજાબ વિધાનસભાના ડેપ્યુટી સ્પીકર સરદાર દોસ્ત મુહમ્મદ મજારીએ ઈમરાન ખાન સરકારને તોડવા માટે "આંતરરાષ્ટ્રીય ષડયંત્ર"નો ઉલ્લેખ કરીને મુખ્ય પ્રધાનની ચૂંટણી યોજવાનો ઇનકાર કર્યો અને સત્રને 6 એપ્રિલ સુધી સ્થગિત કરી દીધું. બાદમાં, સ્પીકરના કાર્યાલયે કહ્યું કે ગૃહમાં હંગામાને કારણે, મુખ્ય પ્રધાનની ચૂંટણી માટે કાર્યવાહી સ્થગિત કરવામાં આવી. ચૌધરી પરવેઝ ઈલાહી સત્તાધારી પાકિસ્તાન તહરીક-એ-ઈન્સાફ (PTI) ગઠબંધનના ઉમેદવાર હતા, જ્યારે સંયુક્ત વિરોધ પક્ષના ઉમેદવાર હમજા શહબાજ હતા, જે પીએમએલ-એનના અધ્યક્ષ અને નેશનલ એસેમ્બલીમાં વિરોધ પક્ષના નેતા શાહબાઝ શરીફના પુત્ર છે.

ઉમર સરફરાઝ નવા ગવર્નર નિયુક્ત કરવામાં આવ્યા

પંજાબ વિધાનસભા સત્ર નેશનલ એસેમ્બલીના સત્ર સાથે જ થયું. આ પહેલા સવારે વડાપ્રધાન ઈમરાન ખાને પંજાબના ગવર્નર સરવરને બરતરફ કરી દીધા હતા અને તેમના સ્થાને ઉમર સરફરાઝની નિમણૂક કરી હતી.

સરવરે કર્યો આ દાવો

તો બીજી તરફ, બરતરફ કરાયેલા સરવરે ઈમરાન ખાન સાથે સંબંધિત ઘણી ગોપનીય માહિતી હોવાનો દાવો કર્યો હતો, અને કહ્યું હતું કે તેને જાહેર કરવા દબાણ ન કરવું જોઈએ. તેમણે કહ્યું કે ખાને તેમની પાર્ટીના વિરોધ છતાં અયોગ્ય મુખ્યમંત્રી ઉસ્માન બુઝદાર પસંદ કર્યા હતા. સરવરે કહ્યું કે ઈમરાન ખાને તેમને બંધારણનું ઉલ્લંઘન કરીને મધ્યરાત્રિએ પંજાબ વિધાનસભાનું સત્ર બોલાવવાનું કહ્યું હતું. સરવરે વધુમાં દાવો કર્યો હતો કે તેણે બે દિવસ પહેલા જ રાજીનામું આપી દીધુ હતું.