નવી પેન્શન યોજનામાં પેન્શનની પાક્કી ગેરંટી! પણ આટલી નોકરી તો કરવી જ પડશે ભાઈ!

કેન્દ્ર સરકારની નવી યુનિફાઇડ પેન્શન સ્કીમમાં 10 વર્ષની નોકરી પર મળશે લઘુત્તમ પેન્શન, 25 વર્ષે પગારના 50%.

કેન્દ્ર સરકાર પોતાના કર્મચારીઓને નિવૃત્તિ બાદ આર્થિક સુરક્ષા પ્રદાન કરવા માટે યુનિફાઇડ પેન્શન સ્કીમ (યુપીએસ) લઈને આવી છે. આ યોજના 1 એપ્રિલ, 2025થી અમલમાં આવશે અને તેના નિયમો પણ જાહેર કરી દેવામાં આવ્યા છે. જો તમે પણ કેન્દ્ર સરકારના કર્મચારી છો અથવા ભવિષ્યમાં જોડાવાના છો, તો આ યોજના હેઠળ પેન્શન મેળવવા માટે તમારે કેટલા વર્ષો સુધી કામ કરવું પડશે તે જાણવું તમારા માટે ખૂબ જ જરૂરી છે.

કેન્દ્ર સરકારે લગભગ 23 લાખ કર્મચારીઓને યુનિફાઇડ પેન્શન સ્કીમ (UPS)નો લાભ આપવાનો નિર્ણય લીધો છે. આ યોજના હેઠળ જો કોઈ કર્મચારી પેન્શનનો લાભ લેવા માંગે છે, તો તેણે પોર્ટલ પર યુપીએસનો વિકલ્પ પસંદ કરીને દાવો ફોર્મ ભરવાનું રહેશે.

આ યોજનામાં કર્મચારીઓ તેમના પેન્શનમાં 10 ટકા યોગદાન આપશે, જ્યારે સરકારનું યોગદાન મૂળભૂત પગાર અને મોંઘવારી ભથ્થાની કુલ રકમના 18.5 ટકા રહેશે.

નવી પેન્શન યોજના કેન્દ્રીય કર્મચારીઓને લઘુત્તમ પેન્શનની ખાતરી આપે છે, પરંતુ આ માટે કેટલીક ચોક્કસ શરતો નિર્ધારિત કરવામાં આવી છે. ચાલો જાણીએ કે યુપીએસ હેઠળ પેન્શન મેળવવા માટે કર્મચારીએ ઓછામાં ઓછા કેટલા વર્ષ સુધી કામ કરવું પડશે.

સંકલિત પેન્શન યોજના હેઠળ નક્કી કરવામાં આવેલા નિયમો અનુસાર, જે કર્મચારીઓએ સરકારી સેવામાં 25 વર્ષની સેવા પૂર્ણ કરી છે, તેઓ નિવૃત્તિના તુરંત પહેલાના 12 મહિનાના સરેરાશ મૂળ પગારના 50 ટકા જેટલું પેન્શન મેળવવા માટે હકદાર બનશે. ઉદાહરણ તરીકે, જો કોઈ કર્મચારીનો 12 મહિનાનો સરેરાશ માસિક પગાર 60 હજાર રૂપિયા હોય, તો તેવા કર્મચારીને નિવૃત્તિ પછી દર મહિને 30 હજાર રૂપિયા પેન્શન તરીકે મળશે.

યુનિફાઇડ પેન્શન સ્કીમ (યુપીએસ) કેન્દ્રીય કર્મચારીઓને લઘુત્તમ પેન્શનની પણ ખાતરી આપે છે. જો કોઈ કર્મચારીએ ઓછામાં ઓછી 10 વર્ષની સેવા પૂર્ણ કરી હોય, તો તેને નિવૃત્તિ પર દર મહિને 10,000 રૂપિયાનું લઘુત્તમ પેન્શન આપવામાં આવશે. આનો અર્થ એ છે કે યુપીએસ હેઠળ લઘુત્તમ પેન્શનનો લાભ મેળવવા માટે કર્મચારીએ ઓછામાં ઓછા 10 વર્ષ સુધી સરકારી સેવામાં ફરજ બજાવવી પડશે. ત્યારબાદ જ તે આ પેન્શન યોજનાનો લાભ મેળવી શકશે અને નિવૃત્તિ બાદ આર્થિક રીતે સુરક્ષિત રહી શકશે.