Navsari Rain: ધોધમાર વરસાદથી નવસારી જિલ્લામાં જનજીવન અસ્તવ્યસ્ત, નીચાણવાળા વિસ્તારોમાં પાણી ભરાયા

Navsari Rain: ધોધમાર વરસાદથી નવસારી જિલ્લામાં જનજીવન અસ્તવ્યસ્ત, નીચાણવાળા વિસ્તારોમાં પાણી ભરાયા

નવસારી જિલ્લામાં ધોધમાર વરસાદ

નવસારી: નવસારી શહેર અને જિલ્લામાં સતત વરસી રહેલા ધોધમાર વરસાદને કારણે જનજીવન અસ્તવ્યસ્ત બન્યું છે. ભારે વરસાદના કારણે શહેરના અનેક નીચાણવાળા વિસ્તારોમાં પાણી ભરાઈ ગયા છે, જેના કારણે વાહનવ્યવહાર અને દૈનિક જીવન પર ગંભીર અસર જોવા મળી રહી છે.

શહેરના શાંતાદેવી રોડ પર વરસાદી પાણી ભરાઈ જતાં વાહનચાલકો અને સ્થાનિક રહેવાસીઓને ભારે હાલાકીનો સામનો કરવો પડી રહ્યો છે. અનેક માર્ગો પર પાણી ફરી વળતાં ટ્રાફિક ધીમો પડી ગયો છે, જ્યારે કેટલાક વિસ્તારોમાં લોકોને અવરજવરમાં મુશ્કેલી પડી રહી છે.

ભારે વરસાદના કારણે અનેક રહેણાંક વિસ્તારોમાં ઘરો તેમજ દુકાનોમાં પાણી ઘૂસી જતાં લોકોને નુકસાન વેઠવું પડ્યું છે. નવસારીના વિઠ્ઠલ મંદિર નજીક આવેલા શાકમાર્કેટમાં પણ પાણી ભરાઈ જતાં વેપારીઓને ભારે મુશ્કેલીનો સામનો કરવો પડ્યો હતો અને વેપાર-ધંધા પર પણ અસર જોવા મળી હતી.

નવસારીના મંકોડીયા અને વિઠ્ઠલવાડીનો માર્ગ પાણીમાં ગરકાવ થયો છે. હોસ્પિટલથી આશાપુરી મંદિર તરફના માર્ગ પર પાણી ભરાયા છે. ઉદ્યોગનનગરથી ગૌતમનગર જતા રોડ પર પાણી ભરાયા છે. સીનબોર્ડ કંપની પાસે પણ પાણી ભરાતા લોકોને હાલાકી થઈ રહી છે.

હવામાન વિભાગ દ્વારા હજુ પણ ભારે વરસાદની આગાહી વચ્ચે જિલ્લા પ્રશાસન પરિસ્થિતિ પર સતત નજર રાખી રહ્યું છે. નીચાણવાળા વિસ્તારોમાં રહેતા લોકોને સતર્ક રહેવા, બિનજરૂરી બહાર ન નીકળવા તેમજ પ્રશાસનની સૂચનાઓનું પાલન કરવા અપીલ કરવામાં આવી છે.

રાજ્યના હવામાન વિભાગ દ્વારા આગામી બે દિવસ સુધી નવસારી જિલ્લા માટે રેડ એલર્ટ આપવામાં આવ્યું છે.