ફ્રીમાં Aadhaar અપડેટ કરવાની તારીખમાં સરકારે કર્યો ફેરફાર, હવે આ તારીખ સુધી મફતમાં લઈ શકાશે લાભ

UIDAI એ નાગરિકોને વધુ એક વર્ષનો સમય આપ્યો, ઓનલાઈન પોર્ટલ પર સુવિધા નિ:શુલ્ક ઉપલબ્ધ.

Aadhaar update last date 2026: ભારતમાં રહેતા દરેક નાગરિક માટે આધાર કાર્ડ એક અત્યંત મહત્ત્વપૂર્ણ દસ્તાવેજ બની ગયું છે. રેશન કાર્ડ, ડ્રાઇવિંગ લાઇસન્સ, પાસપોર્ટ અને પાન કાર્ડ જેવા અનેક દસ્તાવેજોમાં આધાર કાર્ડનું સ્થાન સૌથી મોખરે છે. સરકારી યોજનાઓના લાભ મેળવવાથી માંડીને શાળા કોલેજમાં પ્રવેશ સુધી, લગભગ દરેક કામ માટે આધાર કાર્ડ અનિવાર્ય છે.

જો તમે તમારું આધાર કાર્ડ ઘણા વર્ષો પહેલા બનાવ્યું હોય અને ત્યારથી તેમાં કોઈ માહિતી અપડેટ ન કરી હોય, તો હવે તેને અપડેટ કરાવવાનો સમય આવી ગયો છે.

ઘણી સરકારી સેવાઓ અને યોજનાઓનો લાભ લેવા માટે, આધાર કાર્ડમાં સાચી અને અપડેટ કરેલી વિગતો હોવી અત્યંત જરૂરી છે.

UIDAI (યુનિક આઇડેન્ટિફિકેશન ઓથોરિટી ઓફ ઇન્ડિયા) દ્વારા સમયાંતરે આધાર અપડેટ માટે નવી સુવિધાઓ જાહેર કરવામાં આવે છે.

આમાંની એક મહત્ત્વપૂર્ણ સુવિધા છે દસ્તાવેજો, જેમ કે સરનામાના પુરાવા, મફતમાં અપડેટ કરવાની તક. જોકે, ઘણા લોકો આ તકનો લાભ લેવાનું ચૂકી જાય છે.

UIDAI એ નાગરિકોને મફત આધાર અપડેટ કરવાની તક આપી છે અને તેની અંતિમ તારીખમાં ફેરફાર કર્યો છે. અગાઉ આ સેવા માટેની અંતિમ તારીખ 14 જૂન 2025 નક્કી કરવામાં આવી હતી, જેને હવે લંબાવવામાં આવી છે. UIDAI તરફથી મળેલી નવી માહિતી અનુસાર, નાગરિકો હવે 14 જૂન 2026 સુધી મફતમાં આધાર કાર્ડ અપડેટ કરાવી શકશે. આ નિર્ણયનો મુખ્ય ઉદ્દેશ્ય વધુને વધુ લોકોને આ સુવિધાનો લાભ લેવા માટે પ્રોત્સાહિત કરવાનો છે.

નોંધનીય છે કે આ મફત અપડેટ myAadhaar પોર્ટલ (https://myaadhaar.uidai.gov.in) પર જઈને કરી શકાય છે. જો તમે આધાર સેવા કેન્દ્ર પર જઈને અપડેટ કરાવો છો, તો તમારે ત્યાં નિર્ધારિત ફી ચૂકવવી પડશે. જોકે, પોર્ટલ પર આ સેવા સંપૂર્ણપણે નિ:શુલ્ક ઉપલબ્ધ છે.