વરસાદ અને ગરમીએ ઓગસ્ટમાં તોડ્યો અનેક વર્ષોનો રેકોર્ડ, સપ્ટેમ્બરમાં અહીં વરસાદ તૂટી પડશે

Record rainfall August 2024: હવામાન વિભાગ અનુસાર, ઓગસ્ટમાં સામાન્ય કરતાં વધુ વરસાદ થયો. સપ્ટેમ્બર મહિનામાં પણ ઘણા રાજ્યોમાં ભારે વરસાદ થઈ શકે છે.

Heavy rain alert: દેશમાં ઓગસ્ટ મહિનામાં વરસાદે છેલ્લા 23 વર્ષનો રેકોર્ડ તોડી નાખ્યો. જ્યારે ગરમીએ 123 વર્ષ જૂનો રેકોર્ડ તોડ્યો. હવામાન વિભાગે શનિવારે જણાવ્યું કે ભારતમાં ઓગસ્ટ મહિનામાં સામાન્ય કરતાં લગભગ 16 ટકા વધુ વરસાદ નોંધાયો, જ્યારે ઉત્તર પશ્ચિમ ભારતમાં 253.9 મિમી વરસાદ નોંધાયો. જે વર્ષ 2001 પછી ઓગસ્ટમાં બીજો સૌથી વધુ વરસાદ છે.

IMDના મહાનિર્દેશક મૃત્યુંજય મહાપાત્રાએ કહ્યું કે દેશમાં ઓગસ્ટમાં 287.1 મિમી વરસાદ નોંધાયો, જ્યારે સામાન્ય 248.1 મિમી હોય છે. કુલ મળીને ભારતમાં 1 જૂનથી ચોમાસાની શરૂઆત પછીથી સામાન્ય 701 મિમીની સરખામણીમાં 749 મિમી વરસાદ થયો છે.

તેમણે એ પણ જણાવ્યું કે દેશમાં ચોમાસાની સિઝન દરમિયાન ગરમીએ પણ 123 વર્ષ જૂનો રેકોર્ડ તોડ્યો. IMDએ કહ્યું કે ભારતમાં ઓગસ્ટમાં સરેરાશ ન્યૂનતમ તાપમાન 24.29 ડિગ્રી સેલ્સિયસ નોંધાયું, જે 1901 પછી સૌથી વધુ છે.

IMD પ્રમુખે કહ્યું કે હિમાલયની તળેટી અને ઉત્તર પૂર્વના ઘણા જિલ્લાઓમાં સામાન્ય કરતાં ઓછો વરસાદ થયો કારણ કે મોટાભાગની ન્યૂનતમ દબાણ પ્રણાલીઓ તેમની સામાન્ય સ્થિતિથી દક્ષિણ તરફ ખસી ગઈ. તેમણે કહ્યું કે કેરળ અને મહારાષ્ટ્રના વિદર્ભ ક્ષેત્ર સાથે સાથે ઉત્તર પૂર્વના ઘણા રાજ્યોમાં ઓછો વરસાદ થયો.

હવામાન વિભાગે જણાવ્યું કે સપ્ટેમ્બર મહિનામાં ઉત્તરાખંડ, હિમાચલ પ્રદેશ, જમ્મુ કાશ્મીર, રાજસ્થાન અને મધ્યપ્રદેશમાં ભારેથી અતિ ભારે વરસાદની સંભાવના છે. આ રાજ્યોની આસપાસના વિસ્તારોમાં પણ તેજ વરસાદ થઈ શકે છે.

આંધ્રપ્રદેશના વિવિધ ભાગોમાં શનિવારે ભારે વરસાદની આશંકા છે. હવામાન વિભાગના એક અધિકારીએ કહ્યું કે હળવોથી મધ્યમ વરસાદ સતત ચાલુ રહેશે. હવામાન વિભાગ અનુસાર, ઉત્તરી આંધ્રપ્રદેશ અને દક્ષિણી ઓડિશાના દરિયાકિનારે શનિવારે સમુદ્રની સ્થિતિ ખરાબ રહેવાનો અંદાજ છે.

આ દરમિયાન, કેન્દ્રીય જળ આયોગ (CWC)એ ચેતવણી આપી છે કે આગામી બે દિવસોમાં આંધ્રપ્રદેશ અને તેલંગાણાની મોટાભાગની નદીઓમાં પૂર આવવાની આશંકા છે.