‘બાબર’ સામે ભારતનું ‘ચક્રવ્યૂહ’: ટીમ ઇન્ડિયામાં બે બદલાવ? જાણો પાકિસ્તાનને પછાડવાની ખાસ રણનીતિ

ચેમ્પિયન્સ ટ્રોફીમાં પાકિસ્તાન સામે મેદાનમાં ઉતરતા પહેલા ટીમ ઈન્ડિયામાં ફેરફારની શક્યતા, શું આ બે ખેલાડીઓ બદલશે રમત?

ભારત વિ પાકિસ્તાન (ફાઈલ ફોટો)

Source : Social Media

India vs Pakistan 2025: ચેમ્પિયન્સ ટ્રોફી 2025 માં ભારત અને પાકિસ્તાન વચ્ચેની મેચ 23 ફેબ્રુઆરીએ દુબઈના મેદાન પર રમાશે, જે ક્રિકેટ ચાહકો માટે એક રોમાંચક જંગ સમાન હશે. બંને ટીમોએ ટૂર્નામેન્ટમાં અત્યાર સુધીમાં એક-એક મેચ રમી છે, જેમાં ભારતે બાંગ્લાદેશ સામે વિજય મેળવ્યો છે, જ્યારે પાકિસ્તાનને ન્યૂઝીલેન્ડ સામે હારનો સામનો કરવો પડ્યો છે. ટીમ ઈન્ડિયાએ બાંગ્લાદેશ સામે શાનદાર પ્રદર્શન કર્યું હોવા છતાં, પાકિસ્તાન સામેની મેચ વધુ પડકારજનક બની રહેશે. આ મેચ માટે ટીમ ઈન્ડિયા કયા બે મોટા ફેરફારો સાથે મેદાનમાં ઉતરી શકે છે, તેના પર એક નજર કરીએ:

1. અર્શદીપ સિંહના સ્થાને હર્ષિત રાણાને બહાર કરાય તેવી શક્યતા

બાંગ્લાદેશ સામેની મેચમાં હર્ષિત રાણાને બીજા મુખ્ય ઝડપી બોલર તરીકે તક આપવામાં આવી હતી. હર્ષિત રાણાએ પોતાની બોલિંગમાં ગતિ અને બાઉન્સથી થોડી અસર ઊભી કરી અને કુલ 3 વિકેટ પણ ઝડપી હતી. જોકે, ઘણા ક્રિકેટ નિષ્ણાતો માને છે કે ટીમ ઈન્ડિયાએ ડાબા હાથના ફાસ્ટ બોલરને ટીમમાં સામેલ કરવો જોઈએ. પાકિસ્તાનના મુખ્ય બેટ્સમેનોમાંના એક બાબર આઝમ ડાબા હાથના બોલરો સામે ઘણી વખત સંઘર્ષ કરતા જોવા મળ્યા છે. અર્શદીપ સિંહના સફેદ બોલ ક્રિકેટમાં આંકડા પણ દર્શાવે છે કે તે ટીમ ઈન્ડિયાની પ્લેઈંગ ઈલેવનમાં સ્થાન મેળવવા માટે યોગ્ય દાવેદાર છે. તેથી, પાકિસ્તાન સામેની મહત્વપૂર્ણ મેચમાં હર્ષિત રાણાના સ્થાને અર્શદીપ સિંહને તક મળી શકે છે.

2. કુલદીપ યાદવની જગ્યાએ વરુણ ચક્રવર્તીને તક મળી શકે છે

બાંગ્લાદેશ સામેની મેચમાં સ્પિન બોલર તરીકે કુલદીપ યાદવનો સમાવેશ કરવામાં આવ્યો હતો, પરંતુ તે ખાસ પ્રભાવ પાડી શક્યો નહોતો. કુલદીપે 10 ઓવરમાં 43 રન આપ્યા હતા અને તેને એક પણ વિકેટ મળી ન હતી. દુબઈની પીચ સ્પિન બોલિંગને ખાસ મદદરૂપ થતી નથી તે જોતા, ટીમ ઈન્ડિયા વરુણ ચક્રવર્તી જેવા મિસ્ટ્રી સ્પિનરને તક આપવાનું વિચારી શકે છે. વરુણ ચક્રવર્તી હાલમાં શાનદાર ફોર્મમાં છે અને તેની બોલિંગમાં વિવિધતા પાકિસ્તાની બેટ્સમેનો માટે મુશ્કેલી ઊભી કરી શકે છે.

વૈકલ્પિક રીતે, ટીમ ઈન્ડિયા ચાર સ્પિન બોલરોના વિકલ્પ સાથે પણ મેદાનમાં ઉતરી શકે છે. જો આવું થાય તો પ્લેઈંગ ઈલેવનમાંથી એક બેટ્સમેનને બહાર બેસવું પડી શકે છે અને વધારાના સ્પિનરને તક મળી શકે છે. જો કે, આ ફેરફાર ટીમ મેનેજમેન્ટના નિર્ણય પર આધાર રાખે છે કે તેઓ પાકિસ્તાની બેટ્સમેનોને સ્પિનથી દબાણમાં લાવવા માંગે છે કે બેટિંગ લાઇનઅપને મજબૂત રાખવા માંગે છે.

આ બે સંભવિત ફેરફારો સાથે ટીમ ઈન્ડિયા પાકિસ્તાનને હરાવવા માટે મેદાનમાં ઉતરી શકે છે. હવે જોવાનું એ રહેશે કે કેપ્ટન અને ટીમ મેનેજમેન્ટ અંતિમ પ્લેઈંગ ઈલેવનમાં કયા ખેલાડીઓને તક આપે છે અને શું આ ફેરફારો ટીમ માટે ફાયદાકારક સાબિત થાય છે કે નહીં.

આ પણ વાંચો....