'આ ભારતીય બોલર લેશે 5 વિકેટ', ઓવલ ટેસ્ટને લઈ ડેલ સ્ટેનની મોટી ભવિષ્યવાણી 

દક્ષિણ આફ્રિકાના ભૂતપૂર્વ અનુભવી ફાસ્ટ બોલર ડેલ સ્ટેને ભારતના ફાસ્ટ બોલર મોહમ્મદ સિરાજ વિશે મોટું નિવેદન આપ્યું છે.

ડેલ સ્ટેન

Source : તસવીર સોશિયલ મીડિયા

Dale Steyn Prediction on Oval Test IND vs ENG: દક્ષિણ આફ્રિકાના ભૂતપૂર્વ અનુભવી ફાસ્ટ બોલર ડેલ સ્ટેને ભારતના ફાસ્ટ બોલર મોહમ્મદ સિરાજ વિશે મોટું નિવેદન આપ્યું છે. ડેલ સ્ટેન માને છે કે ઓવલ ખાતે રમાનારી એન્ડરસન-તેંડુલકર ટ્રોફીની અંતિમ અને નિર્ણાયક ટેસ્ટમાં સિરાજ પાંચ વિકેટ લેશે. તેમણે સોશિયલ મીડિયા પ્લેટફોર્મ X પર લખ્યું, "સિરાજ પાંચમી ટેસ્ટમાં પાંચ વિકેટ લેશે." વર્તમાન શ્રેણીમાં સિરાજનું પ્રદર્શન ખૂબ પ્રભાવશાળી રહ્યું છે. તેમણે અત્યાર સુધીમાં 14 વિકેટ લીધી છે અને વિકેટ લેવાની બાબતમાં ત્રીજા નંબરે છે. હજુ એક મેચ બાકી છે, તેથી તે ટોચ પર પહોંચવાનો મજબૂત દાવેદાર છે.

31 વર્ષીય સિરાજ (IND vs ENG ) એજબેસ્ટન ખાતેની બીજી ટેસ્ટમાં 6 વિકેટ લઈને ભારતની જીતમાં મહત્વપૂર્ણ ભૂમિકા ભજવી હતી. તેમણે 70 રન આપીને 6 વિકેટ લીધી, જે આ શ્રેણીમાં તેમનું શ્રેષ્ઠ પ્રદર્શન હતું. સિરાજ આ મેચમાં બીજી મોટી સિદ્ધિથી માત્ર એક ડગલું દૂર છે. જો તે વધુ એક વિકેટ લેશે તો તે તેના આંતરરાષ્ટ્રીય કારકિર્દીમાં 200 વિકેટ પૂર્ણ કરશે. તે ઓવલના મેદાન પર આ સિદ્ધિ મેળવી શકે છે.

Siraj to take a fifer in 5th Test.

— Dale Steyn (@DaleSteyn62) July 30, 2025

છેલ્લી મેચની વાત કરીએ તો, ઓલ્ડ ટ્રેફોર્ડમાં સિરાજની બોલિંગ બહુ સારી નહોતી. તેણે 30 ઓવરમાં 140 રન આપ્યા અને ફક્ત એક જ વિકેટ લઈ શક્યો. તેનો ઇકોનોમી રેટ 4.70 હતો, જે તેના સ્તરના બોલર માટે નિરાશાજનક હતો.

હવે જ્યારે શ્રેણી ઇંગ્લેન્ડના પક્ષમાં 1-2 છે, ત્યારે ભારત અંતિમ ટેસ્ટ જીતીને શ્રેણી 2-2 થી બરાબર કરવાનો પ્રયાસ કરશે. આ માટે, સિરાજ જેવા અનુભવી બોલર માટે ફોર્મમાં પાછા ફરવું ખૂબ જ મહત્વપૂર્ણ રહેશે. ચાહકો એ જોવા પર નજર રાખશે કે  ડેલ સ્ટેનની ભવિષ્યવાણી સાચી સાબિત થશે કે નહીં.

ચોથી ટેસ્ટમાં ઋષભ પંતને અંગૂઠામાં ફ્રેક્ચર થયું હતું, જેના કારણે તે શ્રેણીમાંથી બહાર હતો. પંત થોડા અઠવાડિયા માટે ક્રિકેટથી દૂર રહેશે, તેના સ્થાને ધ્રુવ જુરેલને પાંચમી મેચમાં વિકેટકીપર બેટ્સમેન તરીકે તક મળી છે.

ભારતની પ્લેઇંગ ઇલેવન: યશસ્વી જયસ્વાલ, કેએલ રાહુલ, સાઈ સુદર્શન, શુભમન ગિલ (કેપ્ટન), કરુણ નાયર, રવિન્દ્ર જાડેજા, ધ્રુવ જુરેલ (વિકેટકીપર), વોશિંગ્ટન સુંદર, આકાશ દીપ, પ્રસિદ્ધ કૃષ્ણા, મોહમ્મદ સિરાજ.