ICC એ કર્યો ઐતિહાસિક નિર્ણય, World Cup માં કર્યો મોટો બદલાવ, ટીમોની સંખ્યામાં થયો વધારો
ICC એ 7 નવેમ્બરના રોજ એક ઐતિહાસિક જાહેરાત કરી હતી, જેમાં વર્લ્ડ કપમાં ભાગ લેતી ટીમોની સંખ્યામાં વધારો કરવામાં આવ્યો હતો.
ઈન્ટરનેશન ક્રિકેટ કાઉન્સિલ (ICC) એ 2025ના વર્લ્ડ કપની અપાર સફળતા બાદ એક મોટો નિર્ણય લીધો છે. ICC એ 7 નવેમ્બરના રોજ એક ઐતિહાસિક જાહેરાત કરી હતી, જેમાં વર્લ્ડ કપમાં ભાગ લેતી ટીમોની સંખ્યામાં વધારો કરવામાં આવ્યો હતો. ICC અનુસાર, 2029 ના મહિલા ODI વર્લ્ડ કપમાં હવે આઠને બદલે 1 ટીમો હશે. દુબઈમાં ICC બોર્ડ મીટિંગમાં આ નિર્ણય લેવામાં આવ્યો હતો, જેનો ઉદ્દેશ્ય મહિલા ક્રિકેટના વૈશ્વિક વિકાસ અને સ્પર્ધાત્મકતાને આગળ વધારવાનો હતો.
આ ફેરફાર 2029ના વર્લ્ડ કપમાં પહેલીવાર લાગુ કરવામાં આવશે
તાજેતરમાં પૂર્ણ થયેલા મહિલા વર્લ્ડ કપ 2025માં આઠ ટીમોએ ભાગ લીધો હતો. ટીમ ઈન્ડિયાએ નવી મુંબઈમાં રમાયેલી ફાઇનલમાં દક્ષિણ આફ્રિકાને 52 રનથી હરાવીને પહેલીવાર ICC વર્લ્ડ કપ જીત્યો હતો. અત્યાર સુધી મહિલા ODI વર્લ્ડ કપમાં ફક્ત આઠ ટીમોને ભાગ લેવાની મંજૂરી આપવામાં આવી હતી, પરંતુ વધતા પ્રદર્શન સ્તર, દર્શકોની રુચિ અને મહિલા ક્રિકેટની ઝડપથી વિસ્તરતી પહોંચને ધ્યાનમાં રાખીને, ICC એ ટુર્નામેન્ટનો વિસ્તાર કરવાનો નિર્ણય લીધો. આ ફેરફાર 2029ના વર્લ્ડ કપમાં પહેલીવાર લાગુ કરવામાં આવશે.
ICC એ નિવેદન બહાર પાડ્યું
ICC ની પ્રેસ રિલીઝમાં જણાવાયું છે કે, "ICC બોર્ડે આગામી ટુર્નામેન્ટમાં ટીમોની સંખ્યા 8 થી વધારીને 10 (2025 માં 8 ટીમો હતી) કરીને મહિલા વર્લ્ડ કપ ઇવેન્ટની સફળતા પર નિર્માણ કરવા સંમતિ આપી છે." રિલીઝમાં વધુમાં જણાવાયું છે કે, "લગભગ 300,000 દર્શકોએ સ્ટેડિયમમાં ટુર્નામેન્ટ જોઈ જે કોઈપણ મહિલા ક્રિકેટ ઇવેન્ટ માટે દર્શકોની હાજરીનો રેકોર્ડ તોડી નાખે છે. આ ટુર્નામેન્ટમાં દર્શકોની સંખ્યામાં પણ વધારો જોવા મળ્યો અને ભારતમાં લગભગ 500 મિલિયન દર્શકો સાથે વિશ્વભરમાં ઓન-સ્ક્રીન દર્શકોનો નવો રેકોર્ડ બનાવ્યો."
મહિલા ક્રિકેટની પ્રગતિ આશ્ચર્યચકિત કરે છે
ICC ના આ ઐતિહાસિક નિર્ણયથી મહિલા ક્રિકેટને ઉન્નત બનાવવાની અને ઉભરતી ટીમોને આંતરરાષ્ટ્રીય મંચ પર તેમની ક્ષમતા દર્શાવવાની તક મળવાની અપેક્ષા છે. તેમાં કોઈ શંકા નથી કે છેલ્લા કેટલાક વર્ષોમાં મહિલા ક્રિકેટે જબરદસ્ત પ્રગતિ કરી છે. ભારત, ઓસ્ટ્રેલિયા અને ઇંગ્લેન્ડ જેવી ટીમો અસાધારણ રીતે સારું પ્રદર્શન કરી રહી છે, જ્યારે બાંગ્લાદેશ, આયર્લેન્ડ અને શ્રીલંકા જેવી ટીમો પણ તેમની રમતને ઉચ્ચ સ્તરે પહોંચાડવામાં સફળ રહી છે.
ટોપ સ્ટોરી
ટ્રેન્ડિંગ સમાચાર
