Ind vs SA: Sachin Tendulkar અને Virat Kohliનો આ રેકોર્ડ ખતરામાં, KL રાહુલ 48 રન બનાવતાની સાથે જ આગળ નીકળી જશે

આ ઇનિંગમાં રાહુલે ઘણા રેકોર્ડ પોતાના નામે કર્યા. તે દક્ષિણ આફ્રિકામાં સદી ફટકારનાર બીજો ભારતીય ઓપનર બની ગયો છે.

કે એલ રાહુલ (ફાઈલ ફોટો)

KL Rahul needs 48 runs to break record: ભારત અને દક્ષિણ આફ્રિકા (Ind vs SA) વચ્ચેની ત્રણ મેચની ટેસ્ટ શ્રેણીની પ્રથમ મેચ સેન્ચુરિયનમાં રમાઈ રહી છે. ટીમ ઈન્ડિયાએ ટોસ જીતીને પ્રથમ બેટિંગ કરવાનો નિર્ણય કર્યો અને પ્રથમ દિવસ ઓપનર કેએલ રાહુલના નામે રહ્યો. તે 122 રને અણનમ છે. તેની ઇનિંગની મદદથી ટીમ ઇન્ડિયાએ સ્ટમ્પ સુધી 3 વિકેટના નુકસાન પર 272 રન બનાવ્યા હતા. રાહુલે ટેસ્ટ કરિયરની સાતમી સદી ફટકારી હતી.

આ ઇનિંગમાં રાહુલે ઘણા રેકોર્ડ પોતાના નામે કર્યા. તે દક્ષિણ આફ્રિકામાં સદી ફટકારનાર બીજો ભારતીય ઓપનર બની ગયો છે. તેના પહેલા આ કારનામું વસીમ જાફરે કર્યું હતું. તેણે 2007ની સિરીઝમાં 116 રન બનાવ્યા હતા. આ સિવાય સેન્ચુરિયનમાં સદી ફટકારનાર તે વિશ્વનો ત્રીજો વિદેશી બેટ્સમેન છે. રાહુલ સિવાય ઓસ્ટ્રેલિયાના ડેવિડ વોર્નર અને વેસ્ટ ઈન્ડિઝના ક્રિસ ગેલના નામે પણ અહીં સદી ફટકારવાનો રેકોર્ડ છે. રાહુલે જે 7 સદી ફટકારી છે તે ઈંગ્લેન્ડ, ઓસ્ટ્રેલિયા, ભારત, શ્રીલંકા, વેસ્ટ ઈન્ડિઝ અને દક્ષિણ આફ્રિકામાં છે. ઈંગ્લેન્ડમાં તેની બે સદી છે. રાહુલ 6 દેશોમાં સદી ફટકારનાર ત્રીજો ભારતીય ઓપનર છે. આ પહેલા માત્ર મહાન બેટ્સમેન સુનીલ ગાવસ્કર અને વીરેન્દ્ર સેહવાગ જ આ કરી શક્યા હતા.

SENA દેશો (દક્ષિણ આફ્રિકા, ઈંગ્લેન્ડ, ન્યુઝીલેન્ડ અને ઓસ્ટ્રેલિયા)માં ઓપનર તરીકે કેએલ રાહુલની આ ચોથી સદી છે. તેણે વીરેન્દ્ર સેહવાગ, રવિ શાસ્ત્રી અને વિનુ માંકડને પાછળ છોડી દીધા છે. ત્રણેયએ 3-3 સદી ફટકારી છે. રાહુલ હવે માત્ર ગાવસ્કરની પાછળ છે. સુનિલ ગાવસ્કરે સેના દેશોમાં 8 સદી ફટકારી છે.

Stumps on Day 1 of the 1st Test.

A brilliant ton from @klrahul11 as #TeamIndia end the first day on 272/3.

Scorecard - https://t.co/eoM8MqSQgO #SAvIND pic.twitter.com/WwXgVoZd9B

— BCCI (@BCCI) December 26, 2021

તેંડુલકર અને કોહલીનો રેકોર્ડ ખતરામાં

સેન્ચુરિયન ટેસ્ટના પ્રથમ દિવસના અંતે રાહુલ 122 રન પર રમી રહ્યો છે. રાહુલ દક્ષિણ આફ્રિકામાં વિશેષ સ્થાન હાંસલ કરવાની નજીક છે. જો તે વધુ 48 રન બનાવશે તો તે દક્ષિણ આફ્રિકામાં સૌથી મોટી ઇનિંગ્સ રમનાર ભારતીય બેટ્સમેન બની જશે. દક્ષિણ આફ્રિકામાં ભારતીય બેટ્સમેન તરીકે સૌથી મોટી ઇનિંગ રમવાનો રેકોર્ડ સચિન તેંડુલકરના નામે છે. તેણે 1997ની સિરીઝમાં 169 રન બનાવ્યા હતા. આ સિવાય ચેતેશ્વર પુજારા અને વિરાટ કોહલીએ પણ 150 રનની ઇનિંગ રમી છે.