શિખર ધવનની કર્નલ સોફિયા કુરેશી પરની પોસ્ટ વાયરલ, કહ્યું – 'ભારતીય મુસ્લિમોએ...’
ભૂતપૂર્વ ક્રિકેટરે દેશ માટે લડનારા અસંખ્ય ભારતીય મુસ્લિમોને સલામ કરી; પહેલગામ હુમલાનો ઉદ્દેશ્ય હિન્દુ-મુસ્લિમ ભાગલા પાડવાનો હતો, જે સફળ ન થયો.
Shikhar Dhawan viral post: ભારતીય ક્રિકેટ ટીમના ભૂતપૂર્વ ઓપનર શિખર ધવન મેદાનની બહાર પણ વિવિધ મુદ્દાઓ પર પોતાનો સ્પષ્ટ અભિપ્રય વ્યક્ત કરવા માટે જાણીતા છે. તાજેતરમાં, તેમણે ભારતીય સેનાના કર્નલ સોફિયા કુરેશીની પ્રશંસા કરતી અને ભારતીય મુસ્લિમોની બહાદુરીને બિરદાવતી એક પોસ્ટ સોશિયલ મીડિયા પર શેર કરી છે, જે ઝડપથી વાયરલ થઈ રહી છે અને લોકો દ્વારા પ્રશંસા પામી રહી છે.
શિખર ધવને પોતાની પોસ્ટમાં લખ્યું કે, "ભારતનો આત્મા તેની એકતામાં રહેલો છે. કર્નલ સોફિયા કુરેશી જેવા નાયકો અને દેશ માટે બહાદુરીથી લડનારા અને આપણે શું છીએ તે દર્શાવનારા અસંખ્ય ભારતીય મુસ્લિમોને સલામ. જય હિંદ!" તેમની આ પોસ્ટ તાજેતરના ભારત-પાકિસ્તાન તણાવ અને 'ઓપરેશન સિંદૂર' પછીના ઘટનાક્રમના સંદર્ભમાં આવી છે.
પહેલગામ હુમલાનો બદલો અને એકતા
૨૨ એપ્રિલે પહેલગામમાં પાકિસ્તાની આતંકવાદીઓએ ૨૬ નિર્દોષ લોકોની નિર્દયતાપૂર્વક હત્યા કરી હતી. આ હુમલામાં આતંકવાદીઓએ લોકોના ધર્મ વિશે પૂછીને તેમને નિશાન બનાવ્યા હતા, ખાસ કરીને હિન્દુઓને નિશાન બનાવવાનો તેમનો ઉદ્દેશ્ય ભારતમાં હિન્દુઓ અને મુસ્લિમો વચ્ચે ભાગલા પાડી સાંપ્રદાયિક સૌહાર્દને ખલેલ પહોંચાડવાનો હતો. જોકે, આતંકવાદીઓના આ મનસૂબા ભારતીય સરકાર અને દેશના લોકોની એકતા સામે નિષ્ફળ ગયા. સમગ્ર દેશે આતંકવાદ સામે એક થઈને અવાજ ઉઠાવ્યો અને પાકિસ્તાન પાસેથી બદલો લેવાની માંગ કરી.
૭ મેના રોજ, ભારતીય સેનાએ 'ઓપરેશન સિંદૂર' હેઠળ પાકિસ્તાન અને પાકિસ્તાન અધિકૃત કાશ્મીર (PoK) માં આતંકવાદીઓના નવ ઠેકાણાઓનો નાશ કર્યો. આ કાર્યવાહી વિશે દેશને માહિતી આપવા માટે ભારતીય વાયુસેનાના વિંગ કમાન્ડર વ્યોમિકા સિંહ અને ભારતીય સેનાના કર્નલ સોફિયા કુરેશી સામે આવ્યા હતા, જેના કારણે કર્નલ સોફિયા ચર્ચામાં આવ્યા હતા.
ધવનનું પાકિસ્તાન પર નિશાન
આ પહેલા, ૧૦ મેના રોજ ભારત-પાકિસ્તાન યુદ્ધવિરામ જાહેર થયાના માત્ર ૩ કલાક બાદ જ્યારે પાકિસ્તાને યુદ્ધવિરામનો ભંગ કર્યો હતો, ત્યારે પણ શિખર ધવને ટ્વિટ કરીને પાકિસ્તાન પર આકરા પ્રહારો કર્યા હતા. તેમણે લખ્યું હતું કે, "આ સસ્તા દેશે ફરી એકવાર આખી દુનિયાને પોતાની સસ્તીતા બતાવી દીધી છે." આ ઉપરાંત, 'ઓપરેશન સિંદૂર' પછી ભારતીય સૈનિકોએ પાકિસ્તાન તરફથી આવેલા ડ્રોન હુમલાઓને તોડી પાડ્યા હતા, ત્યારે પણ ધવને ટ્વિટ કરીને આપણા બહાદુર સૈનિકોને સલામ કરી હતી અને કહ્યું હતું કે ભારત મજબૂત રીતે ઊભું છે.
ટોપ સ્ટોરી
ટ્રેન્ડિંગ સમાચાર
