14 વર્ષના વૈભવ સૂર્યવંશીના તરખાટ સામે ઓસ્ટ્રેલિયાની ટીમની ઊંઘ હરામ, પ્રથમ ટેસ્ટમાં જ 86 બોલમાં 113 રન ફટકાર્યા
IND U19 vs AUS U19 1st Youth Test: બ્રિસ્બેનમાં 30 સપ્ટેમ્બરથી શરૂ થયેલી પ્રથમ યુવા ટેસ્ટના બીજા દિવસે વૈભવ સૂર્યવંશી એક અલગ જ લયમાં જોવા મળ્યો હતો.
Vaibhav Suryavanshi century: ભારતની અંડર-19 ટીમના ઉભરતા સ્ટાર બેટ્સમેન વૈભવ સૂર્યવંશીએ ઓસ્ટ્રેલિયાના બ્રિસ્બેનમાં AUS-19 સામેની પ્રથમ યુવા ટેસ્ટ મેચમાં વિસ્ફોટક સદી ફટકારીને તરખાટ મચાવ્યો છે. ફક્ત 14 વર્ષની ઉંમરે, વૈભવે ટેસ્ટના બીજા દિવસે (1 ઓક્ટોબર) T20 ઇનિંગ્સની જેમ માત્ર 86 બોલમાં 113 રન બનાવ્યા હતા. તેની આક્રમક બેટિંગ એટલી પ્રભાવશાળી હતી કે તેણે પોતાની સદીના 84 રન માત્ર છગ્ગા અને ચોગ્ગા દ્વારા જ બનાવ્યા હતા. વૈભવની આ ઓસ્ટ્રેલિયાની ધરતી પરની પ્રથમ સદી છે, જેણે અગાઉ ઇંગ્લેન્ડમાં પણ અનેક રેકોર્ડ બનાવ્યા છે. આ મેચમાં ભારત માટે વેદાંત ત્રિવેદીએ પણ શાનદાર સદી ફટકારી હતી, જેના કારણે ભારતીય ટીમે પ્રથમ ઇનિંગમાં ઓસ્ટ્રેલિયા A પર નિર્ણાયક લીડ મેળવી હતી.
યુવા ટેસ્ટમાં વૈભવની આક્રમક બેટિંગ અને અન્ય પ્રદર્શન
બ્રિસ્બેનમાં 30 સપ્ટેમ્બરથી શરૂ થયેલી પ્રથમ યુવા ટેસ્ટ (IND-19 vs AUS-19) ના બીજા દિવસે વૈભવ સૂર્યવંશી એક અલગ જ લયમાં જોવા મળ્યો હતો. તેણે માત્ર 78 બોલમાં જ પોતાની સદી પૂરી કરી લીધી હતી, જે ટેસ્ટ ફોર્મેટ માટે એક ધમાકેદાર શરૂઆત ગણાય. વૈભવે તેની 113 રનની તોફાની ઇનિંગ્સમાં આઠ છગ્ગા (48 રન) અને નવ ચોગ્ગા (36 રન) ફટકાર્યા હતા, આમ બાઉન્ડ્રીથી કુલ 84 રન બનાવ્યા હતા. તેણે હેડન શિલર સહિત ઓસ્ટ્રેલિયાના દરેક બોલરને નિશાન બનાવ્યા હતા.
Century on his first red ball game in Australia.
— Priyansh (JPP SZN) (@bhhupendrajogi) October 1, 2025
Vaibhav Suryavanshi - Coming to snatch everyone’s chain sooner than you expect. pic.twitter.com/gPkOIBhfPr
ભારતની પ્રથમ ઇનિંગમાં વૈભવ ઉપરાંત વેદાંત ત્રિવેદીએ પણ 15 ચોગ્ગાની મદદથી 112 રન બનાવીને અણનમ રહ્યા હતા. આ લેખ લખાયો ત્યાં સુધીમાં, ભારતીય અંડર-19 ટીમે 5 વિકેટ ગુમાવીને 325 રન બનાવી લીધા હતા, જેના પરિણામે તેમને ઓસ્ટ્રેલિયાની ટીમ પર 82 રનની મજબૂત લીડ મળી હતી. અગાઉ, ઓસ્ટ્રેલિયાની અંડર-19 ટીમ પ્રથમ ઇનિંગમાં 243 રનમાં ઓલઆઉટ થઈ ગઈ હતી, જેમાં સ્ટીવન હોગને સૌથી વધુ 92 રન બનાવ્યા હતા. ભારત તરફથી બોલિંગમાં દીપેશ દેવેન્દ્રને 5 વિકેટ લઈને સૌથી વધુ પ્રભુત્વ જમાવ્યું હતું, જ્યારે કિશન કુમારે 3 વિકેટ અને અનમોલજીત સિંહ તથા ખિલાન પટેલે 1-1 વિકેટ ઝડપી હતી. ટેસ્ટ શ્રેણી પહેલાં રમાયેલી ત્રણ યુથ વનડે મેચોમાં પણ વૈભવે સારું પ્રદર્શન કર્યું હતું, જેમાં તેણે બીજી મેચમાં 70 રનની અર્ધસદી સહિત કુલ 124 રન બનાવ્યા હતા.
ટોપ સ્ટોરી
ટ્રેન્ડિંગ સમાચાર
