IND vs WI 3rd ODI: ત્રીજી વન-ડેમાં પણ ટીમ ઇન્ડિયાની જીત, વેસ્ટ ઇન્ડિઝના સૂપડા સાફ

ભારત તરફથી મળેલા 257 રનના લક્ષ્યાંકનો પીછો કરતા વેસ્ટ ઈન્ડિઝની શરૂઆત ખૂબ જ ખરાબ રહી હતી

ફોટોઃ BCCI

West Indies vs India 3rd ODI Highlights: ટીમ ઈન્ડિયાએ ત્રિનિદાદના ક્વીન્સ પાર્ક ઓવલ ખાતે રમાયેલી ત્રીજી વન-ડે મેચમાં વેસ્ટ ઈન્ડિઝને 119 રનથી હરાવ્યું હતું. આ સાથે ભારતે વનડે શ્રેણી 3-0થી જીતી લીધી હતી. ટીમ ઈન્ડિયાએ પ્રથમ વખત વેસ્ટ ઈન્ડિઝને તેના ઘરઆંગણે વનડે શ્રેણીમાં ક્લીન સ્વીપ કર્યું છે.

વરસાદના કારણે મેચ 36 ઓવરની કરી દેવામાં આવી હતી. આ મેચમાં ટીમ ઈન્ડિયાએ પ્રથમ બેટિંગ કરતા 36 ઓવરમાં ત્રણ વિકેટે 225 રન બનાવ્યા હતા. જોકે ડકવર્થ લુઈસ નિયમના કારણે વેસ્ટ ઈન્ડિઝને 35 ઓવરમાં 257 રનનો ટાર્ગેટ મળ્યો હતો. જવાબમાં કેરેબિયન ટીમ 26 ઓવરમાં 137 રનમાં ઓલઆઉટ થઈ ગઈ હતી.

ભારત તરફથી મળેલા 257 રનના લક્ષ્યાંકનો પીછો કરતા વેસ્ટ ઈન્ડિઝની શરૂઆત ખૂબ જ ખરાબ રહી હતી. ઓપનર કાયલ મેયર્સ અને શમરાહ બ્રુક્સ ખાતું ખોલાવ્યા વગર જ પેવેલિયન પરત ફર્યા હતા. આ બંનેને મોહમ્મદ સિરાજે આઉટ કર્યા હતા.

આ પછી બ્રેન્ડન કિંગ અને શાઈ હોપે વેસ્ટ ઈન્ડિઝની ઈનિંગ્સને સંભાળી હતી. પરંતુ તેઓ લાંબા સમય સુધી ભારતીય બોલરોનો સામનો કરી શક્યા નહીં. હોપે 33 બોલમાં 22 રન બનાવ્યા અને ચહલની બોલ પર સ્ટમ્પ આઉટ થયો હતો. આ પછી કેપ્ટન નિકોલસ પૂરને બ્રેન્ડન કિંગ સાથે મળી ઇનિંગને સંભાળવાનો પ્રયાસ કર્યો હતો.  અક્ષર પટેલે કિંગને બોલ્ડ કર્યો હતો.  કિંગે 37 બોલમાં 42 રન બનાવ્યા હતા. દરમિયાન તેણે પાંચ ચોગ્ગા અને એક સિક્સ ફટકારી હતી.

આ પછી વેસ્ટ ઈન્ડિઝની છેલ્લી આશા કેપ્ટન નિકોલસ પૂરન હતી. પરંતુ તે મોટા શોટ રમવામાં પ્રસિદ્ધ કૃષ્ણાના બોલ પર કેચ આઉટ થયો હતો. તેણે પાંચ ચોગ્ગા અને એક છગ્ગાની મદદથી 42 રનની ઇનિંગ પણ રમી હતી.

દરમિયાન કીસી કાર્ટી 05, અકીસ હુસૈન 01, કીમો પોલ 0, હેડન વોલ્શ જુનિયર 10 અને જેડન સીલ્સ 0 રને આઉટ થયા હતા. આ સાથે જ ઓલરાઉન્ડર જેસન હોલ્ડર 09 રન બનાવીને અણનમ પરત ફર્યો હતો. ભારત તરફથી યુઝવેન્દ્ર ચહલે સૌથી વધુ ચાર વિકેટ લીધી હતી. આ સિવાય શાર્દુલ ઠાકુર અને મોહમ્મદ સિરાજને બે-બે વિકેટ મળી હતી. પ્રસિદ્ધ કૃષ્ણા અને અક્ષર પટેલને એક-એક વિકેટ મળી હતી.

આ અગાઉ ટોસ જીતીને પ્રથમ બેટિંગ કરતા ટીમ ઇન્ડિયાએ શુભમન ગિલના અણનમ 98 રનની મદદથી 36 ઓવરમાં ત્રણ વિકેટે 225 રન ફટકાર્યા હતા. ભારત તરફથી કેપ્ટન શિખર ધવને પણ અડધી સદી ફટકારી હતી. તેણે 58 રન બનાવ્યા હતા. જ્યારે શ્રેયસ અય્યરે 44 રનની ઇનિંગ રમી હતી.