IPL 2026: RCB ની શાનદાર જીત, ગુજરાતને 92 રને હરાવી પાંચમી વખત ફાઇનલમાં મારી એન્ટ્રી

કેપ્ટન રજત પાટીદારની 93 રનની તોફાની ઇનિંગ અને બોલરોના તરખાટથી RCB એ રચ્યો ઈતિહાસ, 31 મેના રોજ અમદાવાદમાં રમાશે ટાઇટલ મેચ.

rcb qualifies ipl 2026 final defeats gujarat titans rajat patidar rcb

Source : PTI

Show Quick Read

Key points generated by AI, verified by newsroom

• RCB એ ગુજરાત ટાઇટન્સને 92 રને હરાવી ફાઇનલમાં પ્રવેશ કર્યો.
• રજત પાટીદારની 93 રનની ઇનિંગ અને બોલરોનો દબદબો.
• IPL ફાઇનલમાં પહોંચનાર RCB પાંચમી ટીમ બની.
• ગુજરાત 162 રનમાં ઓલઆઉટ, તેવતિયાની 68 રનની લડત.

rcb vs gt qualifier 1 highlights: IPL 2026 ની પહેલી ક્વોલિફાયર મેચમાં રોયલ ચેલેન્જર્સ બેંગ્લોર (RCB) એ ગુજરાત ટાઇટન્સને 92 રનથી કચડી નાખ્યું છે. આ શાનદાર જીત સાથે જ RCB ટૂર્નામેન્ટની ફાઇનલમાં પહોંચનારી પહેલી ટીમ બની ગઈ છે. બેંગ્લોરે આપેલા 255 રનના વિશાળ ટાર્ગેટ સામે ગુજરાતની ટીમ માત્ર 162 રનમાં જ સમેટાઈ ગઈ હતી. કેપ્ટન રજત પાટીદારની 93 રનની આક્રમક ઇનિંગ અને ત્યારબાદ બોલરોના ઘાતક પ્રદર્શને RCB ને આ ઐતિહાસિક જીત અપાવી છે.

પહેલી ક્વોલિફાયર જીતીને બેંગ્લોરે સીધી ફાઇનલમાં એન્ટ્રી મારી લીધી છે. હવે 31 મેના રોજ અમદાવાદના નરેન્દ્ર મોદી સ્ટેડિયમમાં તેઓ ટ્રોફી જીતવા માટે મેદાનમાં ઉતરશે. તમને જણાવી દઈએ કે, IPL ના ઇતિહાસમાં આ પાંચમી વખત છે જ્યારે RCB ફાઇનલમાં પહોંચ્યું છે. આ પહેલા બેંગ્લોરની ટીમ 2009, 2011, 2016 અને 2025 માં પણ ફાઇનલ રમી ચૂકી છે. ચેન્નાઈ સુપર કિંગ્સ અને મુંબઈ ઇન્ડિયન્સ બાદ સૌથી વધુ વખત ફાઇનલમાં પહોંચવાના મામલે RCB હવે ત્રીજા નંબરે આવી ગયું છે.

મેચની વાત કરીએ તો, બેંગ્લોરની જીતનો પાયો કેપ્ટન રજત પાટીદારે નાખ્યો હતો. તેણે માત્ર 33 બોલમાં 93 રનની તોફાની ઇનિંગ રમી હતી, જેમાં 5 ચોગ્ગા અને 9 ગગનચુંબી છગ્ગા સામેલ હતા. પાટીદાર ઉપરાંત વિરાટ કોહલી અને કૃણાલ પંડ્યાએ પણ 43-43 રનનું મહત્વનું યોગદાન આપ્યું હતું. રજત પાટીદારની કેપ્ટનશીપમાં RCB ડિફેન્ડિંગ ચેમ્પિયન તરીકે ફાઇનલમાં પહોંચનારી ત્રીજી ટીમ બની ગઈ છે. આ પહેલા માત્ર મુંબઈ અને ચેન્નાઈ જ આવું કરી શક્યા છે.

આ પણ વાંચોઃ શાનદાર શૉટ અને બાઉન્ડ્રી, છતાં સાઈ સુદર્શન વિચિત્ર રીતે આઉટ! જુઓ વીડિયો

બીજી તરફ, 255 રનના પહાડ જેવા લક્ષ્યાંકનો પીછો કરવા ઉતરેલી ગુજરાત ટાઇટન્સની શરૂઆત જ ખરાબ રહી. જેકબ ડફીના ઓપનિંગ સ્પેલમાં જ ગુજરાતના બેટ્સમેનો ઘૂંટણિયે પડી ગયા હતા. ડફીએ મેચમાં 3 મોટી વિકેટ ઝડપી હતી. જ્યારે ભુવનેશ્વર કુમારે પણ 2 વિકેટ લઈને ફરીથી પર્પલ કેપ પોતાના નામે કરી લીધી છે.

ગુજરાત તરફથી માત્ર રાહુલ તેવતિયા જ થોડી લડત આપી શક્યો હતો. તેણે 43 બોલમાં 68 રન બનાવ્યા, જે આ સીઝનની તેની પહેલી ફિફ્ટી હતી. જોસ બટલરે 29 રન કર્યા, પરંતુ બાકીના તમામ બેટ્સમેનો સાવ ફ્લોપ રહ્યા અને આખી ટીમ 162 રનમાં ઓલઆઉટ થઈ ગઈ. આ શાનદાર જીત સાથે હવે RCB નો ઉત્સાહ સાતમા આસમાને છે.

આ પણ વાંચોઃ IPL પ્લેઓફનું ગણિત: હારવા છતાં RCB કે GT કેમ બહાર નહીં થાય? જાણી લો મોટો નિયમ