RCBનો ધબડકો: મજબૂત શરૂઆત છતાં હૈદરાબાદ સામે ૪૨ રને પરાજય, ઈશાન કિશનની ઝંઝાવાતી બેટિંગ
૧૭૩/૩ થી ૧૮૯ ઓલઆઉટ - માત્ર ૬ રનમાં ૪ વિકેટ ગુમાવી બેંગ્લોરે મેચ ગુમાવી; કોહલી-સોલ્ટની આક્રમક શરૂઆત એળે ગઈ.
RCB vs SRH highlights IPL 2025: ઇન્ડિયન પ્રીમિયર લીગ (IPL) ૨૦૨૫ ની એક રોમાંચક મેચમાં, સનરાઇઝર્સ હૈદરાબાદે રોયલ ચેલેન્જર્સ બેંગ્લોર (RCB) ને ૪૨ રનથી પરાજય આપ્યો છે. આ મેચમાં હૈદરાબાદની ટીમે પ્રથમ બેટિંગ કરતા ૨૩૧ રનનો વિશાળ સ્કોર ખડક્યો હતો. જેના જવાબમાં, છેલ્લી ઓવર સુધી ચાલેલી આ મેચમાં બેંગલુરુ ૧૮૯ રનમાં ઓલઆઉટ થઈ ગયું અને ૪૨ રનથી મેચ હારી ગયું. હૈદરાબાદ તરફથી યુવા બેટ્સમેન ઈશાન કિશન ૯૪ રનની અણનમ તોફાની ઇનિંગ્સ રમીને મેચનો સ્ટાર બન્યો હતો.
પોઈન્ટ ટેબલમાં ટોપ-૨ માં સ્થાન મેળવવા માટે લડી રહેલી રોયલ ચેલેન્જર્સ બેંગ્લોરને ૨૩૨ રનનો મોટો લક્ષ્યાંક મળ્યો હતો. RCB એ લક્ષ્યનો પીછો કરતા શાનદાર શરૂઆત કરી હતી, જેમાં વિરાટ કોહલી અને ફિલ સોલ્ટે માત્ર ૭ ઓવરમાં ૮૦ રન જોડી દીધા હતા. ફિલ સોલ્ટે ૩૨ બોલમાં ૬૨ રનની ધમાકેદાર ઇનિંગ રમી હતી, જેમાં તેણે ૪ ચોગ્ગા અને ૫ છગ્ગા ફટકાર્યા હતા.
વિરાટ કોહલીએ પણ ૪૩ રનની મહત્વપૂર્ણ ઇનિંગ રમી હતી. બીજી તરફ, મયંક અગ્રવાલને મોટી ઇનિંગ રમવાની અને RCB ની જીતમાં યોગદાન આપવાની તક હતી, પરંતુ તે ફક્ત ૧૧ રન બનાવીને આઉટ થઈ ગયો. રજત પાટીદાર ધીમે ધીમે રન રેટ વધારવાનો પ્રયાસ કરી રહ્યો હતો, પરંતુ તેનું નસીબ ખરાબ હતું અને તે ૧૮ રન બનાવીને રન આઉટ થયો. આ મેચમાં, RCB ની કેપ્ટનશીપ કરનાર જીતેશ શર્માનું બેટ પણ કંઈ ખાસ કરી શક્યું નહીં.
અંતિમ ઓવરોમાં RCB નો ધબડકો: ૧૬ રનમાં ૭ વિકેટ
એક સમયે, RCB એ ૩ વિકેટ ગુમાવીને ૧૭૩ રન બનાવ્યા હતા અને જીત માટે હજુ ૫૯ રનની જરૂર હતી. જોકે, બોલની સંખ્યા ઓછી થઈ રહી હતી, જેના પરિણામે દબાણમાં, બેંગ્લોરની ટીમે માત્ર ૬ રનમાં ચાર મોટી વિકેટ ગુમાવી દીધી. પરિસ્થિતિ એવી હતી કે RCB ને છેલ્લી ૨ ઓવરમાં ૪૬ રનની જરૂર હતી.
જ્યારે પેટ કમિન્સ દ્વારા ફેંકવામાં આવેલી ૧૯મી ઓવર પૂરી થઈ, ત્યારે SRH ના હાથમાં આખી મેચ આવી ગઈ હતી. કેપ્ટન કમિન્સે આખી ઓવરમાં ફક્ત એક જ રન આપ્યો અને ૨ વિકેટ પણ ઝડપી. આખી ઓવર પૂરી થાય તે પહેલાં જ RCB ટીમ ૧૮૯ રનમાં ઓલઆઉટ થઈ ગઈ હતી. મેચની છેલ્લી ૧૦ ઓવરનું મૂલ્યાંકન કરીએ તો, RCB ની છેલ્લી ૭ વિકેટો ફક્ત ૧૬ રનની અંદર પડી ગઈ, જે તેમની હારનું મુખ્ય કારણ બન્યું.
ટોપ સ્ટોરી
ટ્રેન્ડિંગ સમાચાર
