વિડીયો જોઈને ઓસ્ટ્રેલિયા પ્રવાસની તૈયારી કરી રહ્યો છે આ ભારતીય બોલર

શમીએ સ્ટીવ સ્મિથ અને ડેવિડ વોર્નરની ગેરહાજરી વિશે કહ્યું કે, જો તે નહીં રમે તો ચોક્કસ તેમની ટીમ નબળી હશે પરંતુ અંતે તો તમારે તમારી રણનીતિ પ્રમાણે ચાલવાનું હોય છે અને તમારા મજબૂત પક્ષ પર કામ કરવાનું હોય છે.

નવી દિલ્હીઃ ભારતીય ફાસ્ટ બોલર મોહમ્મદ શમીએ સોમવારે કહ્યું કે, તે પોતાના પ્રતિસ્પર્ધીઓનો વીડિયો જોઈને ઓસ્ટ્રેલિયા સામે રમાનાર શ્રેણીની તૈયારી કરી રહ્યો છે. ભારતીય ફાસ્ટ બોલરે ઇંગ્લેન્ડમાં સારું પ્રદર્શન કર્યું હતું પરંતુ બેટ્સમેનનું પરફોર્મન્સ સારું રહ્યું ન હતું અને ટીમે 1-4થી હારનો સામનો કરવો પડ્યો હતો.

શમીએ અહીં પત્રકારોને કહ્યું કે, જ્યાં સુધી ફાસ્ટ બોલરનો સવાલ છે તો અમે ઇંગ્લેન્ડમાં સારું પ્રદર્શન કર્યું હતું. અમે ઓસ્ટ્રેલિયા પ્રવાસની તૈયારી કરી રહ્યા છીએ અને અનેક વીડિયો જોઈ રહ્યા છીએ.’

શમીએ કહ્યું કે, અમારી રણનીતિ જેટલી શક્ય હોય આ શ્રેણી પર ધ્યાન આપવાની છે, કારણ કે અમારા પ્રતિસ્પર્ધી ખૂબ જ મજબૂત છે. અમે અમારી લાઈન અને લેન્થ યોગ્ય કરવા માટે કામ કરીશું.