અંબાણીની કંપની સામે સુપ્રીમ કોર્ટમાં થઈ અરજી, 550 કરોડ રૂપિયા ન ચુકવ્યાનો છે આરોપ, જાણો વિગત

રિલાયન્સે ડેડલાઇન પૂરી થઈ ગયા હોવા છતાં ચુકવણી કરી નથી. જે બાદ એરિક્સન આ મુદ્દે ફરીથી સુપ્રીમ કોર્ટમાં ગઈ હતી. ઈકોનોમિક ટાઇમ્સના અહેવાલ મુજબ રિલાયન્સ કમ્યુનિકેશને એરિક્સનને આ ડેડલાઇન 60 દિવસ સુધી વધારવા અપીલ કરી હતી, પરંતુ એરિક્સને આ વાતને ફગાવી દીધી હતી. બાકી દેવું નહીં ચુકવવાના કારણે રિલાયન્સને દેવાળું ફૂંકેલી કંપનીમાં સમાવેશ કરવામાં આવી શકે છે.

નવી દિલ્હીઃ ટેલિકોમ ઉપકરણો બનાવતી સ્વીડિશ કંપની એરિક્સને રિલાયન્સ કમ્યુનિકેશનના ચેરમેન અનિલ અંબાણી સામે સુપ્રીમ કોર્ટના ઓર્ડરની અવગણના કરવા સંદર્ભે એક અરજી દાખલ કરી છે. એરિક્સને આ અરજી નિર્ધારિત સમયમર્યાદા સુધીમાં 550 કરોડ રૂપિયા નહીં ચુકવવાના કારણે કરી છે. સુપ્રીમ કોર્ટે રિલાયન્સ કમ્યુનિકેશનને સપ્ટેમ્બરના અંત સુધીમાં એરિક્સનને લેણાની બાકી રકમ ચુકવવા આદેશ કર્યો હતો.

2014માં એરિક્સન અને રિલાયન્સ કમ્યુનિકેશન વચ્ચે એક સમજૂતી થઈ હતી. જે મુજબ એરિક્સને 7 વર્ષ સુધી રિલાયન્સ કમ્યુનિકેશનના દેશભરમાં પથરાયેલા ટેલિકોમ નેટવર્કને મેનેજ અને ઓપરેટ કરવાનું હતું. આશે 1000 કરોડ રૂપિયાની ડીલનું રિલાયન્સ દ્વારા હજુ ચુકવણુ નથી કરવામાં આવ્યું.

જો આમ થશે તો રિલાયન્સ કમ્યુનિકેશન અને જિયો વચ્ચે સ્પેક્ટ્રમના વેચાણ સંબંધિત ડીલ પર ખતરો ઉભો થઈ શકે છે. જેનાથી 46000 કરોડ રૂપિયાના દેવામાં ડૂબેલી રિલાયન્સને મોટો ઝટકો લાગશે. આ મુદ્દે નેશનલ કંપની લો ટ્રિબ્યુનલ (NCLAT) 3 ઓક્ટોબરે સુનાવણી કરશે. જ્યારે સુપ્રીમ કોર્ટ 4 ઓક્ટોબરે સુનાવણી કરશે.