પેટ્રોલ-ડીઝલની કિંમતમાં તોળાતો ભાવ વધારો, તહેવારની સિઝનમાં લોકો ઉપર વધુ બોજ આવી શકે છે, જાણો શું છે કારણ

ભારત તેના કુલ ઉપયોગ પૈકી આશરે ૮૦ ટકા તેલની આયાત કરે છે. આવી સ્થિતીમાં જો ક્રુડની કિંમત ૬૦ ડોલર પ્રતિ બેરલ સુધી પહોંચી જશે તો પેટ્રોલ, ડીઝલની સાથે સાથે એલપીજી પર સીધી અને માઠી અસર થશે. હકીકતમાં છેલ્લા બે મોનસુન નબળા રહેવાના કારણે ભારતીય અર્થતંત્ર પર અસર થઇ હતી. બીજી બાજુ વૈશ્વિક ક્રુડની કિંમત ઓછી હોવાના કારણે છેલ્લા બે વર્ષમાં મોનસુનની સ્થિતી નબળી હોવા છતાં તેની અસર જોવા મળી ન હતી. પરંતુ હવે કિંમતો વધવાથી તેની સીધી અસર અર્થતંત્ર પર થઇ શકે છે. પેટ્રોલિયમ મંત્રાલયના કહેવા મુજબ નાણાંકીય વર્ષ ૨૦૧૫-૧૬માં ભારત દ્વારા કુલ ૨૦.૨૧ કરોડ ટન ક્રુડની આયાત કરવામાં આવી હતી. જેના માટે ૪૧૮૯૩૧ કરોડ રૂપિયા ચુકવવામાં આવ્યા હતા. આ એ વખતની સ્થિતી છે જ્યારે ક્રુડની કિંમત ઓછી હતી.

હાલમાં સહમતી થયા બાદ ઓપેક દેશોનુ તેલ ઉત્પાદન સાત લાખ બેરલ પ્રતિદિનથી ઘટી શકે છે. હાલમાં દરરોજ ૩.૩૬ કરોડ બેરલ સુધી તેલનુ ઉત્પાદન કરવામાં આવે છે. મર્યાદિત ક્રુડ ઉત્પાદનને લઇને સહમતી ભારત માટે બિલકુલ સારા સંકેત તરીકે નથી. આવુ પ્રથમ વખત બન્યુ છે જ્યારે ઇરાન સાઉદી અને વેનેઝુએલા ઉત્પાદનને લઇને સહમત થયા છે. મર્યાદા પર સહમતી બની જતા શનિવારના દિવસે મળનારી સમીક્ષા બેઠકમાં પેટ્રોલ અને ડીઝલની કિંમતમાં વધારો કરવામાં આવી શકે છે. નવેમ્બર મહિનામાં ઓપેક દેશોની મહત્વપૂર્ણ બેઠક મળનાર છે.

આજે પેટ્રોલ અને ડીઝલની કિંમતની સમીક્ષા કરવામાં આવનાર છે. જેમાં ભાવમાં વધારો કરવામાં આવે તેવી શક્યતા છે. બન્નેની કિંમતમાં વધારો કરવામાં આવશે કે કેમ તેના પર તમામની નજર કેન્દ્રિત થઇ ગઇ છે. ભાવમાં કોઇ પણ વધારો થવાની સ્થિતીમાં તહેવારની ખરીદીમાં ડુબેલા અને ઉત્સવ મનાવી રહેલા લોકોની તૈયારીમાં પણ પડી શકે છે.

ઓપેક દેશો અને રશિયા દ્વારા તેલ ઉત્પાદન મર્યાદિત કરવા માટે તૈયાર થતા તેની અસર જોવા મળી રહી છે. જેના કારણે ક્રુડના ભાવ વધી રહ્યા છે. આ વર્ષે ક્રુડના ભાવ ઓગષ્ટ મહિનામાં ૩૯ ડોલર પ્રતિ બેરલના હતા જે હવે વધીને ઓક્ટોબરમાં બાવન ડોલર પ્રતિ બેરલ થઇ જતા ચિંતાનુ મોજુ ફરી વળ્યુ છે. રોકેટ ગતિથી વધી રહેલી કિંમતોના કારણે તેની સીધી અસર ભારતમાં પેટ્રોલ અને ડીઝલ પર જોવા મળી શકે છે.

નવી દિલ્હીઃ વૈશ્વિક સ્તરે ક્રુડ કિંમત નવી ઉંચી સપાટી પર પહોંચતા ઘરઆંગણે પેટ્રોલ અને ડીઝલના ભાવમાં ભડકો થવાના સંકેત દેખાઇ રહ્યા છે. તહેવારની સિઝન પુરજોશમાં છે ત્યારે પેટ્રોલ અને ડિઝલની કિંમતમાં વધારો થયા બાદ તેની અસર અન્ય ચીજવસ્તુઓ પર સીધી રીતે થાય છે. જેથી મોંઘવારીની સ્થિતીમાં લોકો પર વધારે બોજ આવી શકે છે.