કૉંગ્રેસે કરી સંસદ-વિધાનસભામાં મહિલા અનામતની માંગ, રાહુલ ગાંધીએ PM મોદીને લખ્યો પત્ર

નવી દિલ્હી: કૉંગ્રેસે સંસદ અને વિધાનસભામાં મહિલાઓને 33 ટકા અનામત આપવાની વાત કરી છે. જેને લઈને કૉંગ્રેસ અધ્યક્ષ રાહુલ ગાંધીએ પ્રધાનમંત્રી નરેંદ્ર મોદીને પત્ર પણ લખ્યો છે. કોંગ્રેસને મહિલા વિરોધી પાર્ટી ગણાવવા માટે રાહુલ ગાંધીએ સોમવારે મોદીને પત્ર લખીને 18 જુલાઈએ શરૂ થતા સંસદના મોનસૂન સત્રમાં મહિલા આરક્ષણ બિલ લાવવાની માગણી કરી છે. રાહુલે લખ્યું છે કે, આપણાં વડાપ્રધાન પોતાની જાતને મહિલા સશક્તિકરણ માટે ધર્મયુદ્ધ કરનાર ગણાવે છે. હવે પાર્ટી પોલિટીક્સમાંથી આગળ આવીને મહિલાઓ માટે કંઈક કરવાનો સમય આવી ગયો છે. તમે મોનસૂન સત્રમાં મહિલા આરક્ષણ બિલ લઈને આવો, કોંગ્રેસ કોઈ પણ શરત વગર તેનું સમર્થન કરશે.

લોકસભામાં કુલ 545 સાંસદ છે જેમાં માત્ર 66 મહિલા છે. રાજ્યસભાની વાત કરવામાં આવે તો 245 સાંસદ છે જેમાં માત્ર 23 મહિલા છે. મોદી સરકારના 76 મંત્રીઓમાંથી માત્ર 9 મહિલા છે. દેશભરના રાજ્યોમાં માત્ર ત્રણ રાજ્યોમાં મહિલા મુખ્યમંત્રી છે. જો મહિલા અનામત બિલ પાસ થશે તો લોકસભાની 543 બેઠકોમાંથી 179 બેઠક મહિલા માટે અનામત રહેશે. રાજ્યની વિધાનસભાની 4120 બેઠકોમાંથી 1360 મહિલાઓ માટે અનામત રહેશે.