કેન્દ્ર સરકારના કર્મચારીઓને દિવાળી ભેટ: જાણો ક્યારે થશે મોંઘવારી ભથ્થામાં 3% વધારાની જાહેરાત
DA hike before Diwali: આ વધારાથી 1.2 કરોડથી વધુ કેન્દ્ર સરકારના કર્મચારીઓ અને પેન્શનરોને ફાયદો થશે, અને તેનો અમલ જુલાઈ 2025 થી થશે.
3% DA hike news: કેન્દ્ર સરકારના કર્મચારીઓ અને પેન્શનરો માટે સારા સમાચાર છે. 7મા પગાર પંચ હેઠળ તેમના મોંઘવારી ભથ્થા (DA) માં વધારો થવાની સંભાવના છે. દિવાળીના તહેવાર પહેલા આ વધારાની જાહેરાત થવાની શક્યતા છે. પ્રાપ્ત માહિતી અનુસાર, મોંઘવારી ભથ્થામાં 3% નો વધારો થઈ શકે છે. આ નિર્ણયથી 1.2 કરોડથી વધુ કર્મચારીઓ અને પેન્શનરોને સીધો ફાયદો થશે અને તેઓને તહેવારોની સિઝનમાં વધારાની આવક મળશે. આ વધારો જુલાઈ 2025 થી લાગુ પડશે, જેથી કર્મચારીઓને ત્રણ મહિનાના બાકી ભથ્થાની રકમ પણ મળશે.
લાંબા સમયથી 8મા પગાર પંચ ની રચનાની રાહ જોઈ રહેલા કેન્દ્ર સરકારના કર્મચારીઓ અને પેન્શનરો માટે રાહતના સમાચાર છે. સરકાર ટૂંક સમયમાં મોંઘવારી ભથ્થા (DA) માં વધારાની જાહેરાત કરી શકે છે. આ વધારાથી દેશના 1.2 કરોડથી વધુ કેન્દ્રીય કર્મચારીઓ અને પેન્શનરોને મોટી આર્થિક રાહત મળશે. એવી અપેક્ષા છે કે દશેરા અને દિવાળીના તહેવારો પહેલા જ આ નિર્ણયની ઔપચારિક જાહેરાત થઈ જશે.
ત્રણ મહિનાનું એરિયર્સ પણ
આ વધારો જુલાઈ 2025 થી અમલી ગણવામાં આવશે. આના પરિણામે, કેન્દ્ર સરકારના કર્મચારીઓને તેમના ઓક્ટોબર મહિનાના પગાર સાથે જુલાઈ, ઓગસ્ટ અને સપ્ટેમ્બર એમ 3 મહિનાનો મોંઘવારી ભથ્થાનો બાકી પગાર પણ મળશે. મળતી માહિતી મુજબ, ઓક્ટોબરના પહેલા અઠવાડિયામાં 3% ડીએ વધારાની જાહેરાત થઈ શકે છે. સરકારનો આ નિર્ણય ખાસ કરીને તહેવારોની મોસમમાં કર્મચારીઓને વધતી મોંઘવારી સામે લડવામાં મદદ કરશે.
મોંઘવારી ભથ્થાની ગણતરી કેવી રીતે થાય છે?
સરકાર પોતાના કર્મચારીઓને વધતી મોંઘવારીની અસરથી બચાવવા માટે વર્ષમાં બે વાર મોંઘવારી ભથ્થા (DA) માં સુધારો કરે છે. આ સુધારા દર વર્ષે 1 જાન્યુઆરી અને 1 જુલાઈથી લાગુ થાય છે, અને તેની જાહેરાત અનુક્રમે ફેબ્રુઆરી-માર્ચ અને સપ્ટેમ્બર-ઓક્ટોબરમાં કરવામાં આવે છે. DA માં વધારો ઔદ્યોગિક કામદારો માટેના ગ્રાહક ભાવ સૂચકાંક (CPI-IW) ના આધારે ગણવામાં આવે છે, જે શ્રમ બ્યુરો દ્વારા દર મહિને બહાર પાડવામાં આવે છે. આ માટે 7મા પગાર પંચ હેઠળ એક વિશેષ ફોર્મ્યુલાનો ઉપયોગ કરીને છેલ્લા 12 મહિનાના CPI-IW ડેટાની સરેરાશ લેવામાં આવે છે. આ મુજબ, જુલાઈ 2024 થી જુલાઈ 2025 સુધીની CPI-IW સરેરાશ 146.3 હતી, જેના આધારે વર્તમાન 55% ના DA માં 3% નો વધારો થઈને તે 58% સુધી પહોંચી શકે છે.
ટોપ સ્ટોરી
ટ્રેન્ડિંગ સમાચાર
