૮મું પગાર પંચ: કેન્દ્રીય કર્મચારીઓના પગાર અને પેન્શનમાં વધારા અંગે સરકારનું મોટું અપડેટ
નાણામંત્રી નિર્મલા સીતારમણે સંસદમાં આપી માહિતી, જાન્યુઆરી ૨૦૨૫માં જ પંચની રચનાને મળી મંજૂરી, પેન્શન સમાનતા પર સરકાર પ્રતિબદ્ધ.
8th Pay Commission update: કેન્દ્ર સરકારના કર્મચારીઓ અને પેન્શનરો માટે એક સારા સમાચાર આવ્યા છે. નાણામંત્રી નિર્મલા સીતારમણે ૮મા પગાર પંચને લઈને સંસદમાં એક મહત્વપૂર્ણ અપડેટ આપ્યું છે. આ અપડેટથી લાખો કર્મચારીઓના પગાર અને પેન્શનમાં નોંધપાત્ર વધારો થવાની શક્યતા છે.
નાણામંત્રી નિર્મલા સીતારમણે જણાવ્યું કે ૮મા પગાર પંચની ભલામણો માટે સંરક્ષણ મંત્રાલય, ગૃહ મંત્રાલય અને ડિપાર્ટમેન્ટ ઓફ પર્સોનલ એન્ડ ટ્રેનિંગ (DoPT) જેવા મહત્વપૂર્ણ મંત્રાલયો પાસેથી ઇનપુટ્સ માંગવામાં આવ્યા છે. તેમણે સ્પષ્ટ કર્યું કે કમિશનની ભલામણો આવ્યા બાદ અને સરકાર દ્વારા તેનો સ્વીકાર થયા પછી જ પગાર અને પેન્શનમાં કેટલો વધારો થશે તેનું સંપૂર્ણ ચિત્ર સ્પષ્ટ થશે.
નાણામંત્રીએ માહિતી આપી કે ૧લી માર્ચ, ૨૦૨૫ સુધીમાં ભારતમાં લગભગ ૩૬.૫૭ લાખ કેન્દ્ર સરકારના કર્મચારીઓ અને ૩૧મી ડિસેમ્બર, ૨૦૨૪ સુધીમાં ૩૩.૯૧ લાખ પેન્શનરો છે. આ ઉપરાંત, સંરક્ષણ ક્ષેત્રના કર્મચારીઓ અને તેમના પેન્શનરોને પણ આ પગાર પંચનો લાભ મળશે.
રાજ્યસભામાં સ્પષ્ટતા કરતાં નાણામંત્રીએ જણાવ્યું કે કેન્દ્ર સરકાર પેન્શનની સમાનતા માટે સંપૂર્ણપણે પ્રતિબદ્ધ છે. તેમણે એ પણ માહિતી આપી કે વડાપ્રધાન નરેન્દ્ર મોદીએ જાન્યુઆરી ૨૦૨૫માં જ ૮મા પગાર પંચ (૮મું CPC)ની રચનાને મંજૂરી આપી દીધી છે. આ કમિશનનો મુખ્ય ઉદ્દેશ્ય કેન્દ્ર સરકારના કર્મચારીઓ અને પેન્શનરોના પગાર અને ભથ્થામાં સુધારો કરવાનો છે. નાણામંત્રીએ જણાવ્યું કે લોકસભા દ્વારા પસાર કરવામાં આવેલા નાણા બિલમાં એવી જોગવાઈઓ કરવામાં આવી છે કે જેથી તમામ સરકારી પેન્શનરોને સમાન લાભ મળી શકે અને તેમની વચ્ચે કોઈ ભેદભાવ ન રહે.
પેન્શનમાં થયેલા ફેરફારો અંગે નિર્મલા સીતારમણે જણાવ્યું કે ૧લી જાન્યુઆરી, ૨૦૧૬ પહેલાં અને પછી નિવૃત્ત થયેલા તમામ સરકારી પેન્શનરોને હાલમાં સમાન પેન્શન મળી રહ્યું છે. નવા નિયમો હેઠળ કોઈપણ પેન્શનરની વર્તમાન પેન્શનની રકમમાં કોઈ ફેરફાર કરવામાં આવ્યો નથી. તેમણે સ્પષ્ટતા કરી કે આનાથી સંરક્ષણ પેન્શનરો પર કોઈ અસર નહીં થાય, કારણ કે તેમના માટે અલગ નિયમો લાગુ પડે છે.
નાણામંત્રીએ ભૂતકાળની સરકારોની નીતિઓનો ઉલ્લેખ કરતાં કહ્યું કે ૬ઠ્ઠા પગાર પંચે ૧લી જાન્યુઆરી, ૨૦૦૬ પહેલાં અને પછી નિવૃત્ત થયેલા કર્મચારીઓના પેન્શનમાં તફાવત કર્યો હતો અને તે સમયે કોંગ્રેસની આગેવાની હેઠળની યુપીએ સરકારે આ નિયમો લાગુ કર્યા હતા. જો કે, મોદી સરકારના પ્રથમ કાર્યકાળમાં ૭મા પગાર પંચે આ ભેદભાવ દૂર કર્યો અને ૧લી જાન્યુઆરી, ૨૦૧૬ પહેલાં અને પછી નિવૃત્ત થયેલા પેન્શનરોના પેન્શનને સમાન બનાવ્યા.
નાણામંત્રીએ અંતમાં જણાવ્યું કે ટૂંક સમયમાં ૮મા કેન્દ્રીય પગાર પંચ માટે અધ્યક્ષ અને ઓછામાં ઓછા બે સભ્યોની સમિતિની રચના કરવામાં આવશે. આ સમિતિ તમામ સંબંધિત પક્ષો સાથે વિસ્તૃત ચર્ચા કરશે અને પગાર તેમજ પેન્શનના સુધારા અંગે પોતાની ભલામણો સરકારને સુપરત કરશે. ત્યારબાદ સરકાર આ ભલામણો પર વિચાર કરીને અંતિમ નિર્ણય લેશે. એકંદરે, કેન્દ્ર સરકારના કર્મચારીઓ અને પેન્શનરો માટે આ એક આશાનું કિરણ છે, કારણ કે ૮મા પગાર પંચના અમલ પછી તેમના પગાર અને પેન્શનમાં નોંધપાત્ર વધારો થવાની સંભાવના છે.
ટોપ સ્ટોરી
ટ્રેન્ડિંગ સમાચાર
