8th Pay Commission: નિવૃત્ત કર્મચારીઓ માટે મોટા સમાચાર! DA અને પેન્શન પર શું થશે અસર? સરકારે દૂર કરી મૂંઝવણ
8th Pay Commission update: તમામ કર્મચારીઓના લાભો બંધ નહીં થાય, માત્ર ભ્રષ્ટાચાર કે ગેરવર્તણૂક બદલ બરતરફ કરાયેલા ચોક્કસ કર્મચારીઓને જ થશે અસર. PIB એ વાયરલ દાવાનું ખંડન કર્યું.
8th Pay Commission update: હાલમાં સોશિયલ મીડિયા પર એક મેસેજ વાયરલ થઈ રહ્યો છે જેણે લાખો કેન્દ્રીય કર્મચારીઓ અને પેન્શનરોની ઊંઘ હરામ કરી દીધી છે. આ મેસેજમાં દાવો કરવામાં આવ્યો છે કે નાણા અધિનિયમ 2025 હેઠળ સરકાર નિવૃત્ત કર્મચારીઓના મોંઘવારી ભથ્થા (DA) નો વધારો અને પગાર પંચના લાભો બંધ કરવા જઈ રહી છે. જોકે, સરકારે આ દાવાને પાયાવિહોણો ગણાવ્યો છે. પ્રેસ ઇન્ફર્મેશન બ્યુરો (PIB) એ સ્પષ્ટતા કરી છે કે CCS (પેન્શન) નિયમોમાં થયેલો સુધારો માત્ર PSU માં કામ કરતા અને ગેરવર્તણૂક બદલ બરતરફ કરાયેલા કર્મચારીઓને જ લાગુ પડે છે, સામાન્ય પેન્શનરોને નહીં.
સોશિયલ મીડિયા પર ફેલાયેલો ભ્રામક મેસેજ
આઠમા પગાર પંચની રચના બાદ દેશભરના આશરે 1.14 કરોડ સરકારી કર્મચારીઓ અને પેન્શનરો પગાર વધારાની રાહ જોઈ રહ્યા છે. આ દરમિયાન, WhatsApp અને અન્ય સોશિયલ મીડિયા પ્લેટફોર્મ પર એક દસ્તાવેજ સાથેનો મેસેજ ફરી રહ્યો છે. જેમાં દાવો કરાયો છે કે કેન્દ્ર સરકારે પેન્શનરો માટે મોંઘવારી ભથ્થામાં વધારો અને પગાર પંચના લાભો સ્થગિત કરી દીધા છે. આ મેસેજને કારણે નિવૃત્ત કર્મચારીઓમાં ગભરાટ અને અસમંજસની સ્થિતિ સર્જાઈ છે.
સરકારની સ્પષ્ટતા: દાવો સંપૂર્ણપણે ખોટો
કેન્દ્ર સરકારની સત્તાવાર ફેક્ટ ચેક એજન્સી, પ્રેસ ઇન્ફર્મેશન બ્યુરો (PIB) એ આ વાયરલ મેસેજની ગંભીરતાથી નોંધ લીધી છે. PIB ફેક્ટ ચેકે તપાસ બાદ આ દાવાને "સંપૂર્ણપણે ખોટો" (Fake) જાહેર કર્યો છે. સરકારે સ્પષ્ટ શબ્દોમાં જણાવ્યું છે કે નિવૃત્ત કર્મચારીઓના DA વધારા કે પગાર પંચના લાભો રોકવા અંગે આવો કોઈ નિર્ણય લેવામાં આવ્યો નથી. તમામ પેન્શનરોને રાબેતા મુજબ જ લાભો મળતા રહેશે.
🚨 Will retired Govt employees stop getting DA hikes & Pay Commission benefits under the Finance Act 2025⁉️
— PIB Fact Check (@PIBFactCheck) December 13, 2025
A message circulating on #WhatsApp claims that the Central Government has withdrawn post-retirement benefits like DA hikes and Pay Commission revisions for retired… pic.twitter.com/T3ylHEvCXt
CCS (પેન્શન) નિયમ 37 માં શું સુધારો થયો?
PIB એ નિયમોની સાચી સમજૂતી આપતા જણાવ્યું કે સરકારે CCS (પેન્શન) નિયમો, 2021 ના નિયમ 37 માં ચોક્કસ સુધારો કર્યો છે, પરંતુ તે બધા માટે નથી.
કોને અસર થશે? આ નિયમ માત્ર એવા સરકારી કર્મચારીઓને લાગુ પડે છે જેઓ જાહેર ક્ષેત્રના ઉપક્રમો (PSU) અથવા સ્વાયત્ત સંસ્થાઓમાં સમાવાયા (Absorbed) હોય.
શરત શું છે? જો આવા કર્મચારીઓ ભ્રષ્ટાચાર, ગંભીર ગેરવર્તણૂક અથવા અનુશાસનહીનતા માટે સેવામાંથી બરતરફ (Dismissed) કરવામાં આવે, તો જ તેમના નિવૃત્તિ લાભો જપ્ત કરવામાં આવશે.
સામાન્ય કર્મચારીઓ નિશ્ચિંત રહે
સરકારે સ્પષ્ટ કર્યું છે કે આ સુધારો સામાન્ય નિવૃત્ત કર્મચારીઓ અથવા પેન્શનરો માટે નથી. જે કર્મચારીઓએ ઈમાનદારીથી સેવા આપી છે અને નિવૃત્ત થયા છે, તેમના DA કે પેન્શન પર કોઈ કાપ મૂકવામાં આવશે નહીં. આ સુધારો માત્ર PSU માં ટ્રાન્સફર થયેલા અને શિસ્તભંગના પગલાંનો સામનો કરનારા કર્મચારીઓ પૂરતો સીમિત છે.
અફવાઓથી દૂર રહેવા અપીલ
સરકારે કર્મચારીઓ અને પેન્શનરોને અપીલ કરી છે કે તેઓ સોશિયલ મીડિયા પર ફરતા આવા પાયાવિહોણા સંદેશાઓથી ગભરાય નહીં. કોઈપણ માહિતીની ખરાઈ કરવા માટે હંમેશા સત્તાવાર સરકારી વેબસાઈટ અથવા PIB ના અધિકૃત હેન્ડલનો જ ઉપયોગ કરવો જોઈએ. 8મા પગાર પંચની ભલામણો અને અમલીકરણની પ્રક્રિયા તેના નિર્ધારિત માળખા મુજબ જ આગળ વધશે.
ટોપ સ્ટોરી
ટ્રેન્ડિંગ સમાચાર
