ઈરાન યુદ્ધની અસર: હવે કોન્ડોમ 30% સુધી મોંઘા થશે, જાણો કિંમત વધવાનું અસલી કારણ

condom prices increase: દુનિયાની સૌથી મોટી કોન્ડોમ ઉત્પાદક કંપની કારેક્સ (Karex) 20 થી 30 ટકા ભાવ વધારવાની તૈયારીમાં. કાચા માલનો વધતો ભાવ અને શિપિંગમાં લાગતો વધુ સમય બન્યા મુખ્ય કારણ.

Global condom prices are set to rise by 20-30% due to the Iran war

Source : abplive

Show Quick Read

Key points generated by AI, verified by newsroom

• ઈરાન યુદ્ધે કોન્ડોમ ઉત્પાદકોને મોંઘવારીનો માર માર્યો.
• કાચો માલ અને શિપિંગ ખર્ચ વધતા ભાવમાં 20-30% વધારો.
• પુરવઠા શૃંખલા ખોરવાતા માંગ અને સ્ટોકની અછત સર્જાઈ.
• કંપનીઓ ગ્રાહકો પર આર્થિક બોજ નાખવા મજબૂર બની.

condom prices increase: ઈરાન યુદ્ધની અસર હવે માત્ર ક્રૂડ ઓઈલ કે શેરબજાર પૂરતી સીમિત નથી રહી, પણ તે સામાન્ય માણસની અંગત જિંદગી સુધી પહોંચી ગઈ છે. દુનિયાની સૌથી મોટી કોન્ડોમ બનાવતી મલેશિયન કંપની 'કારેક્સ બીએચડી' (Karex Bhd) ટૂંક સમયમાં કોન્ડોમના ભાવમાં 20% થી 30% કે તેથી વધુનો તોતિંગ વધારો કરવા જઈ રહી છે. ઈરાન યુદ્ધના કારણે આખી દુનિયામાં સપ્લાય ચેઈન ખોરવાઈ ગઈ છે, કાચો માલ મોંઘો થયો છે અને ટ્રાન્સપોર્ટેશન ખર્ચ પણ વધી ગયો છે. આ તમામ પરિબળોને કારણે કંપનીનું કહેવું છે કે તેમની પાસે હવે આ આર્થિક બોજ ગ્રાહકો પર નાખવા સિવાય બીજો કોઈ રસ્તો બચ્યો નથી.

કંપની પાસે ભાવ વધારવા સિવાય કોઈ વિકલ્પ નથી

તમને જણાવી દઈએ કે મલેશિયાની આ કંપની દર વર્ષે 5 અબજ (500 કરોડ) કરતાં વધુ કોન્ડોમ બનાવે છે. તે ડ્યુરેક્સ (Durex) અને ટ્રોજન (Trojan) જેવી પ્રખ્યાત બ્રાન્ડ્સ ઉપરાંત બ્રિટનની સરકારી સ્વાસ્થ્ય સેવા (NHS) અને સંયુક્ત રાષ્ટ્રના (UN) સહાય કાર્યક્રમોને પણ સપ્લાય પૂરો પાડે છે. કંપનીના સીઈઓ ગોહ મિયાહ કિઆતે સમાચાર સંસ્થા રોઇટર્સને જણાવ્યું હતું કે, "અત્યારે પરિસ્થિતિ બહુ જ નાજુક છે અને ઉત્પાદન ખર્ચ ઘણો વધી ગયો છે. આથી, અત્યારે અમારી પાસે આ વધેલો ખર્ચ ગ્રાહકોને ટ્રાન્સફર કરવા સિવાય કોઈ જ વિકલ્પ નથી."

કાચો માલ મોંઘો અને શિપિંગમાં લાગી રહ્યો છે ડબલ સમય

ફેબ્રુઆરીના અંતમાં જ્યારે આ સંઘર્ષ શરૂ થયો, ત્યારથી કંપનીના ઉત્પાદન ખર્ચમાં જબરદસ્ત વધારો નોંધાયો છે. કોન્ડોમ બનાવવા માટે વપરાતું કૃત્રિમ રબર, નાઇટ્રાઇલ, પેકેજિંગ સામગ્રી, એલ્યુમિનિયમ ફોઇલ અને સિલિકોન તેલ બધું જ મોંઘું થઈ ગયું છે, કારણ કે યુદ્ધના લીધે મિડલ ઈસ્ટમાંથી આવતા પેટ્રોકેમિકલ સપ્લાયને માઠી અસર પહોંચી છે. આ ઉપરાંત, શિપિંગની સમસ્યા પણ માથાનો દુખાવો બની છે. યુરોપ અને અમેરિકામાં જે માલ પહોંચતા પહેલા 1 મહિનો લાગતો હતો, તેમાં હવે 2 મહિના જેટલો સમય લાગી રહ્યો છે.

માંગમાં 30% નો વધારો અને બજારમાં સ્ટોકની અછત

માલ મોડો પહોંચવાને કારણે અને નૂર ભાડું વધવાને લીધે ગ્રાહકો પાસે સામાન્ય કરતાં ઓછો સ્ટોક બચ્યો છે, જેના લીધે બજારમાં માંગ અચાનક વધી ગઈ છે. ગોહે જણાવ્યું કે આ વર્ષે કોન્ડોમની માંગમાં લગભગ 30% નો ઉછાળો આવ્યો છે. ગયા વર્ષે વિદેશી સહાય કાર્યક્રમોમાં થયેલા મોટા કાપના કારણે પહેલાથી જ વૈશ્વિક સ્ટોક ઓછો હતો, અને તેમાં આ યુદ્ધે પડ્યા પર પાટું મારવાનું કામ કર્યું છે.

હાલમાં કારેક્સ કંપનીનું કહેવું છે કે અત્યારે તેમની પાસે આગામી થોડા મહિનાઓ ચાલે તેટલો પુરવઠો છે અને તેઓ વધતી માંગને પહોંચી વળવા માટે પ્રોડક્શન વધારવાનો પૂરો પ્રયાસ કરી રહ્યા છે. પરંતુ જ્યાં સુધી સ્થિતિ સામાન્ય નહીં થાય અને કાચા માલ તથા શિપિંગની સમસ્યા ઉકેલાશે નહીં, ત્યાં સુધી ઊંચા ભાવ સહન કરવા જ પડશે.

આ પણ વાંચો

LPG ગેસની ભયંકર અછત વચ્ચે આ રાજ્ય સરકારનો મોટો નિર્ણય, હવે રેશનની દુકાનેથી મળશે કોલસો