નોકરિયાતો માટે માઠા સમાચાર? PFના વ્યાજમાં ઘટાડાનો સંકેત! જાણો કેટલું થશે નુકસાન!
epfo interest rate cut: માર્ચમાં લેવાશે મોટો નિર્ણય: EPFO ની બેઠકમાં 8.25% થી વ્યાજ ઘટાડવાની વકી; ચૂંટણીઓને કારણે સરકાર આપી શકે છે રાહત, વેતન મર્યાદા ₹25,000 કરવા પર પણ વિચારણા.
epfo interest rate cut: નિવૃત્તિ માટેના સૌથી સુરક્ષિત રોકાણ ગણાતા 'પ્રોવિડન્ટ ફંડ' (Provident Fund - PF) પર મળતા વળતરમાં ઘટાડો થવાની શક્યતા છે. 'કર્મચારી ભવિષ્ય નિધિ સંગઠન' (EPFO) નાણાકીય વર્ષ 2025-26 માટે વ્યાજ દરમાં કાપ મૂકવાનું ગંભીરતાથી વિચારી રહ્યું છે.
જો આ પ્રસ્તાવ મંજૂર થશે, તો મજૂર વર્ગ અને સામાન્ય નોકરિયાતોના 'નિવૃત્તિ ભંડોળ' (Retirement Fund) પર સીધી અને નકારાત્મક અસર પડશે. મોંઘવારીના આ જમાનામાં જ્યારે લોકો વધુ વળતરની અપેક્ષા રાખી રહ્યા છે, ત્યારે વ્યાજદરમાં ઘટાડો તેમના ભવિષ્યના આયોજનને ખોરવી શકે છે.
આ અંગેનો નિર્ણય માર્ચ મહિનાના પ્રથમ સપ્તાહમાં લેવાશે. ત્યારે EPFO ના 'સેન્ટ્રલ બોર્ડ ઓફ ટ્રસ્ટીઝ' (CBT) ની મહત્વપૂર્ણ બેઠક યોજાવા જઈ રહી છે. મીડિયા અહેવાલો મુજબ, ફંડ પર વધી રહેલા આર્થિક દબાણને કારણે વર્તમાન 8.25% ના વ્યાજ દરને ઘટાડીને 8% થી 8.20% ની વચ્ચે કરવામાં આવે તેવી વકી છે.
ફેબ્રુઆરીના અંતમાં 'ફાઇનાન્સ કમિટી' (Finance Committee) રિટર્નની સમીક્ષા કરશે અને ત્યારબાદ CBT અંતિમ નિર્ણય લેશે. જોકે, નિયમ મુજબ બોર્ડના નિર્ણયને 'નાણા મંત્રાલય' (Finance Ministry) ની મંજૂરી બાદ જ જાહેર કરવામાં આવશે.
જોકે, કર્મચારીઓ માટે આશાનું એક કિરણ હજુ બાકી છે. પશ્ચિમ બંગાળ, તમિલનાડુ અને કેરળ સહિતના રાજ્યોમાં આગામી 'વિધાનસભા ચૂંટણીઓને' (Assembly Elections) ધ્યાનમાં રાખીને સરકાર નોકરિયાત વર્ગની નારાજગી વહોરવા માંગશે નહીં. સૂત્રોનું માનીએ તો, મતદારોને આકર્ષવા માટે સરકાર સતત ત્રીજા વર્ષે વ્યાજ દર સ્થિર રાખીને રાહત આપી શકે છે.
આ બેઠકમાં માત્ર વ્યાજ દર જ નહીં, પરંતુ 'બેઝિક સેલેરી લિમિટ' (Basic Salary Limit) વધારવા પર પણ ચર્ચા થઈ શકે છે. હાલમાં EPF કપાત માટેની પગાર મર્યાદા ₹15,000 છે, જેને વધારીને ₹25,000 કરવાનો પ્રસ્તાવ છે. સુપ્રીમ કોર્ટના નિર્દેશ બાદ આ ફેરફાર વિચારણા હેઠળ છે.
જો વેતન મર્યાદા વધારવામાં આવશે, તો દેશના લાખો વધુ કર્મચારીઓ PF ના સુરક્ષા કવચમાં આવી જશે. જોકે, આ સિક્કાની બીજી બાજુ એ છે કે તેનાથી કંપનીઓનો ખર્ચ (Cost to Company) વધશે, જેનો ઉદ્યોગ જગત દ્વારા વિરોધ પણ થઈ શકે છે. આમ, માર્ચ મહિનો દેશના પગારદાર વર્ગ માટે આર્થિક દ્રષ્ટિએ ખૂબ જ મહત્વનો સાબિત થવાનો છે.
ટોપ સ્ટોરી
ટ્રેન્ડિંગ સમાચાર
