Stock Market Today: રોકાણકારોની દિવાળી બગડી, સેન્સેક્સ નિફ્ટીમાં જંગી કડાકો, જાણો કેટલું નુકસાન થયું

Stock Market Update: સ્ટોક માર્કેટમાં આ વેચવાલીના દોરમાં સેન્સેક્સ તેના હાઈથી 6000 અને નિફ્ટી લગભગ 2100 પોઈન્ટ નીચે સરકી ગયો છે.

શેર બજારમાં કડાકો

Source : ABPLIVE AI

Stock Market Closing On 25 October 2024: ભારતીય શેર બજાર માટે આજનું સત્ર બ્લેક ફ્રાઈડે સાબિત થયું છે. કન્ઝ્યુમર ડ્યુરેબલ્સ, બેંકિંગ અને ઓટો સેક્ટરમાં ભારે વેચવાલીને કારણે સપ્તાહના છેલ્લા ટ્રેડિંગ સત્રમાં બજાર તીવ્ર ઘટાડા સાથે બંધ થયું છે. સેન્સેક્સ 80,000ની નીચે સરકી ગયો છે અને મિડકેપ તેમજ સ્મોલકેપ સ્ટોક્સ પણ ગગડી ગયા છે. રોકાણકારોને આજના સત્રમાં 6 લાખ કરોડ રૂપિયાથી વધુનું નુકસાન થયું છે. બજાર બંધ થતાં સેન્સેક્સ 663 પોઈન્ટના ઘટાડા સાથે 79,402 અને નેશનલ સ્ટોક એક્સચેન્જનો નિફ્ટી 218 પોઈન્ટ ઘટીને 24,180 પોઈન્ટ પર બંધ થયો છે.

વધનારા ઘટનારા સ્ટોક

આજના કારોબારમાં સેન્સેક્સના 30 શેરમાંથી 10 તેજી સાથે બંધ થયા જ્યારે 20માં ઘટાડો જોવા મળ્યો છે. સૌથી મોટો ઘટાડો ઈન્ડસઈન્ડ બેંકના સ્ટોકમાં જોવા મળ્યો છે જે તેના નબળા પરિણામોને કારણે 18.79 ટકા ઘટીને બંધ થયો છે. આ ઉપરાંત મહિન્દ્રા એન્ડ મહિન્દ્રા 3.56 ટકા, એલ એન્ડ ટી 3.01 ટકા, એનટીપીસી 2.73 ટકા, અદાણી પોર્ટ્સ 2.33 ટકા, મારુતિ 2.14 ટકા ઘટીને બંધ થયા છે. તેજીવાળા શેરોમાં આઈટીસી 2.24 ટકા, એક્સિસ બેંક 1.85 ટકા, એચયુએલ 0.96 ટકા, સન ફાર્મા 0.53 ટકા, આઈસીઆઈસીઆઈ બેંક 0.51 ટકાની તેજી સાથે બંધ થયા છે.

રોકાણકારોને 6 લાખ કરોડનું નુકસાન

શેર બજારમાં ભારે વેચવાલીને કારણે રોકાણકારોને આજે પણ ભારે નુકસાન થયું છે. બીએસઈ પર લિસ્ટેડ સ્ટોક્સનું માર્કેટ કેપ 437.76 લાખ કરોડ રૂપિયા પર બંધ થયું છે જે અગાઉના સત્રમાં 444 લાખ કરોડ રૂપિયાની નજીક હતું. એટલે કે આજના સત્રમાં રોકાણકારોને 6 લાખ કરોડ રૂપિયાથી વધુનું નુકસાન થયું છે.

સેક્ટોરલ અપડેટ

આજે સૌથી મોટો ઘટાડો બેંકિંગ, કન્ઝ્યુમર ડ્યુરેબલ્સ, ઓટો, ઓઈલ એન્ડ ગેસ એનર્જી, મીડિયા, મેટલ્સ સેક્ટરના શેરોમાં જોવા મળ્યો છે. માત્ર ફાર્મા અને FMCG સેક્ટરના સ્ટોક્સ તેજી સાથે બંધ થયા. નિફ્ટીનો મિડકેપ ઈન્ડેક્સ 1071 અને સ્મોલકેપ 401 પોઈન્ટના ઘટાડા સાથે બંધ થયો છે.

આજે 101 શેર તેમની 52 સપ્તાહની ઊંચી સપાટીએ અને 202 શેર તેમની 52 સપ્તાહની નીચી સપાટીને સ્પર્શ્યા. 3857 શેરોમાંથી 606 શેર લીલા અને 3146 શેર લાલ રંગમાં ટ્રેડ થઈ રહ્યા હતા. લગભગ 105 શેર યથાવત રાખવામાં આવ્યા હતા. જ્યારે BSE મિડકેપ ઈન્ડેક્સ 872.57 પોઈન્ટ ઘટીને, BSE સ્મોલ કેપ ઈન્ડેક્સ 1343 પોઈન્ટ ઘટીને 52,300 પર રહ્યો હતો.

આ પણ વાંચોઃ