સોના ચાંદીમાં આગ લાગી! ભાવ એવા કે ખરીદતા પહેલાં દસ વાર વિચારવું પડે! જાણો 10 ગ્રામના લેટેસ્ટ ભાવ

દિલ્હીના બુલિયન માર્કેટમાં રેકોર્ડબ્રેક ઉછાળો, શુદ્ધ સોનું ₹90,750 અને ચાંદી ₹1,02,500 પ્રતિ કિલોએ પહોંચી.

સોમવારે ભારતીય બુલિયન માર્કેટમાં સોના અને ચાંદીના ભાવમાં જબરદસ્ત ઉછાળો જોવા મળ્યો હતો. સોનાની કિંમત આજે નવી સર્વોચ્ચ સપાટીએ પહોંચી ગઈ છે, જ્યારે ચાંદીનો ભાવ પણ ₹1 લાખ પ્રતિ કિલોને પાર કરી ગયો છે. આ તેજી પાછળ વૈશ્વિક પરિબળો અને રોકાણકારોની વધતી માંગ મુખ્ય કારણો હોવાનું માનવામાં આવે છે.

ઓલ ઈન્ડિયા બુલિયન એસોસિએશનના જણાવ્યા અનુસાર, સોમવારે દિલ્હીના બુલિયન માર્કેટમાં 99.9 ટકા શુદ્ધતાવાળા સોનાનો ભાવ ₹1300ના વધારા સાથે ₹90,750 પ્રતિ 10 ગ્રામની નવી રેકોર્ડ સપાટીએ પહોંચી ગયો હતો. આ સતત ચોથો દિવસ છે જ્યારે સોનાના ભાવમાં વધારો નોંધાયો છે. ગયા અઠવાડિયે ગુરુવારે આ જ સોનું ₹89,450 પ્રતિ 10 ગ્રામ પર બંધ થયું હતું.

આ ઉપરાંત, આજે 99.5 ટકા શુદ્ધતા ધરાવતું સોનું પણ ₹1300ના ઉછાળા સાથે ₹90,350 પ્રતિ 10 ગ્રામની જીવનકાળની ટોચે પહોંચ્યું છે. ગુરુવારે તે ₹89,050 પ્રતિ 10 ગ્રામ પર બંધ થયું હતું.

નિષ્ણાંતો અનુસાર, કેન્દ્રીય બેંકો દ્વારા ખરીદી, વૈશ્વિક આર્થિક અસ્થિરતા અને અમેરિકાના રાષ્ટ્રપતિ ડોનાલ્ડ ટ્રમ્પની વેપાર અને આર્થિક નીતિઓને કારણે સલામત રોકાણ તરીકે સોનાની માંગમાં વધારો થયો છે, જેના કારણે સોનાના ભાવમાં આ રેકોર્ડબ્રેક તેજી જોવા મળી રહી છે.

સૌમિલ ગાંધીએ વધુમાં જણાવ્યું હતું કે આ વર્ષે 1 જાન્યુઆરીએ સોનાનો ભાવ ₹79,390 પ્રતિ 10 ગ્રામ હતો, જે આજે વધીને ₹90,750 થયો છે. એટલે કે આ વર્ષની શરૂઆતથી અત્યાર સુધીમાં સોનાના ભાવમાં ₹11,360 (14.31 ટકા)નો જંગી વધારો નોંધાયો છે.

સોનાની સાથે સાથે આજે ચાંદીના ભાવમાં પણ મોટો ઉછાળો જોવા મળ્યો હતો. દિલ્હીના બુલિયન માર્કેટમાં ચાંદીનો ભાવ પણ ₹1300ના વધારા સાથે ₹1,02,500 પ્રતિ કિલોગ્રામ પર પહોંચી ગયો હતો. ગુરુવારે ચાંદી ₹1,01,200 પ્રતિ કિલોગ્રામ પર બંધ થઈ હતી. ચાંદીના ભાવમાં આ વધારો ઔદ્યોગિક માંગ અને સોનામાં આવેલી તેજીને કારણે જોવા મળી રહ્યો છે.