પેન્શન પ્લાનમાં મોટા ફેરફાર: NPS-UPS અને APY ના નવા નિયમો તાત્કાલિક અસરથી લાગુ
NPS gold silver ETF: PFRDA એ નિયમોમાં સુધારો કર્યો, હવે પેન્શન ફંડમાં મળશે વધુ સારું વળતર; ગોલ્ડ-સિલ્વર ETF અને નિફ્ટી 250 નો સમાવેશ.
NPS gold silver ETF: કેન્દ્ર સરકાર હેઠળના 'પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી' (PFRDA) એ પેન્શન યોજનાઓના રોકાણના નિયમોમાં ધરખમ ફેરફારો કર્યા છે. આ નવા નિયમો 'નેશનલ પેન્શન સિસ્ટમ' (NPS), 'યુનિફાઈડ પેન્શન સ્કીમ' (UPS) અને 'અટલ પેન્શન યોજના' (APY) પર તાત્કાલિક અસરથી લાગુ કરવામાં આવ્યા છે. હવે આ યોજનાઓનું ભંડોળ સોના, ચાંદીના ETF અને શેરબજારના નવા વિકલ્પોમાં પણ રોકી શકાશે. આ નિર્ણયનો મુખ્ય ઉદ્દેશ્ય રોકાણકારોને લાંબા ગાળે વધુ સારું અને સુરક્ષિત વળતર આપવાનો છે.
10 ડિસેમ્બરથી બદલાયો રોકાણનો રોડમેપ
PFRDA એ 10 ડિસેમ્બર, 2025 ના રોજ એક પરિપત્ર જાહેર કરીને પેન્શન ફંડના રોકાણ પોર્ટફોલિયોમાં મોટા સુધારાની જાહેરાત કરી છે. અત્યાર સુધી પેન્શનનું રોકાણ મર્યાદિત વિકલ્પોમાં થતું હતું, પરંતુ હવે વ્યાપ વધારવામાં આવ્યો છે. આ નવા ફેરફાર મુજબ, પેન્શન ફંડ મેનેજરો હવે સોના-ચાંદીના 'એક્સચેન્જ ટ્રેડેડ ફંડ' (ETF), નિફ્ટી 250 ઇન્ડેક્સ અને 'ઓલ્ટરનેટિવ ઇન્વેસ્ટમેન્ટ ફંડ્સ' (AIFs) માં પણ રોકાણ કરી શકશે. સરકારનું માનવું છે કે આનાથી NPS વધુ લવચીક (Flexible) અને નફાકારક બનશે.
નવા નિયમોમાં શું ઉમેરાયું? ક્યાં થશે તમારા પૈસાનું રોકાણ?
PFRDA ના નવા સર્ક્યુલર મુજબ પોર્ટફોલિયો એલોકેશનમાં નીચે મુજબના ત્રણ મોટા ફેરફારો કરવામાં આવ્યા છે:
1. સોના અને ચાંદીમાં રોકાણ (Gold & Silver ETFs) પેન્શન ફંડ હવે SEBI માન્ય સોના અને ચાંદીના ETF માં રોકાણ કરી શકશે. આ રોકાણ 'વૈકલ્પિક રોકાણ શ્રેણી' હેઠળ ગણવામાં આવશે. સોના-ચાંદીમાં રોકાણ કરવાથી પોર્ટફોલિયોમાં વિવિધતા આવશે અને જોખમ ઘટશે. ખાસ કરીને સરકારી ક્ષેત્રના ફંડ માટે સોના-ચાંદીના ETF પર 1% ની અલગ મર્યાદા નક્કી કરવામાં આવી છે.
2. શેરબજારનો વ્યાપ વધ્યો (Nifty 250 & Equity) હવે પેન્શન ફંડના પૈસા નિફ્ટી 250 ઇન્ડેક્સના સ્ટોક્સ, ઇક્વિટી ETF અને BSE 250 ની પસંદગીની કંપનીઓમાં રોકી શકાશે. કુલ ઇક્વિટી રોકાણની મર્યાદા 25% રાખવામાં આવી છે. આનાથી રોકાણકારોને શેરબજારની તેજીનો સીધો લાભ મળવાની શક્યતા વધશે.
3. રિયલ એસ્ટેટ અને ઇન્ફ્રાસ્ટ્રક્ચર (REITs & InvITs) નવી નીતિ મુજબ, પેન્શન ફંડ હવે રિયલ એસ્ટેટ (REITs), ઇન્ફ્રાસ્ટ્રક્ચર (InvITs) અને કેટેગરી I & II ના AIFs માં પણ રોકાણ કરી શકશે. જોકે, આવા વૈકલ્પિક રોકાણો માટે મહત્તમ મર્યાદા 5% નક્કી કરવામાં આવી છે. જોખમ ઘટાડવા માટે એવો નિયમ પણ બનાવ્યો છે કે કોઈ એક ઉદ્યોગમાં કુલ રોકાણ 15% થી વધુ ન હોવું જોઈએ અને કોઈ એક કંપની જૂથમાં 5% થી 10% ની મર્યાદા રહેશે.
NPS રોકાણકારો પર શું થશે અસર?
આ ફેરફારો NPS અને અન્ય પેન્શન યોજનાઓ માટે 'ગેમ ચેન્જર' સાબિત થઈ શકે છે.
વધુ વળતર: અગાઉ પેન્શનના પૈસા માત્ર સરકારી સિક્યોરિટીઝ અને બોન્ડ્સમાં રોકાતા હતા, જેમાં વળતર નિશ્ચિત પણ મર્યાદિત હતું. હવે ઇક્વિટી અને સોના-ચાંદીનો સમાવેશ થવાથી લાંબા ગાળે મોટું ભંડોળ બનવાની શક્યતા છે.
સુરક્ષા સાથે ગ્રોથ: સોનામાં રોકાણ હોવાથી બજારના ઉતાર-ચઢાવ સામે રક્ષણ (Hedging) મળશે, જ્યારે ઇક્વિટીથી ગ્રોથ મળશે.
ટોપ સ્ટોરી
ટ્રેન્ડિંગ સમાચાર
