શોધખોળ કરો

પેટ્રોલ-ડીઝલના ભાવ વધારાથી મધ્યમ વર્ગની કમર તૂટી, એક સપ્તાહમાં ભાવ લિટરે 1.30 રૂપિયા વધ્યા

પેટ્રોલ ડીઝલના ભાવમાં ગઈકાલના ભાવ વધારા બાદ કુલ જૂન મહિનામાં આ 12મી વખત ભાવ વધારો કરવામાં આવ્યો છે.

By : એબીપી અસ્મિતા વેબ ટીમ | Updated at : 23 Jun 2021 08:19 AM (IST)

Petrol-diesel price hike hurts middle class budget, In a week, the price rose by Rs 1.30 per liter પેટ્રોલ-ડીઝલના ભાવ વધારાથી મધ્યમ વર્ગની કમર તૂટી, એક સપ્તાહમાં ભાવ લિટરે 1.30 રૂપિયા વધ્યા

પ્રતિકાત્મક તસવીર

પેટ્રોલ-ડીઝલના સતત ભાવ વધારાથી મધ્યમ વર્ગની કમર તૂટી ગઈ છે. એક અઠવાડિયામાં પેટ્રોલ અને ડીઝલના ભાવમાં એક રૂપિયા 30 પૈસાનો વધારો થયો છે. અમદાવાદમાં પેટ્રોલનો ભાવ એક અઠવાડિયા પહેલા 93 રૂપિયા 34 પૈસા હતો. તે હાલ 94 રૂપિયા 39 પૈસા થયો છે. તો ડીઝલનો ભાવ એક અઠવાડિયા પહેલા 93 રૂપિયા 98 પૈસા હતો. તે હાલ 95 રૂપિયા 10 પૈસા થયો છે. સતત ભાવ વધારાના કારણે લોકોના બજેટ પર અસર થઈ છે.

નોંધનીય છે કે, આજે પેટ્રોલ ડીઝલના ભાવમાં કોઈ વધારો નથી થયો પરંતુ ગઈકાલે પેટ્રોલ ડિઝલની કિંમતમાં ભાવ વધારો જોવા મળ્યો હતો. રાજ્યમાં પેટ્રોલની કિંમતમાં પ્રતિ લિટરે 27 પૈસા જ્યારે ડિઝલમાં પ્રતિ લિટરે 28 પૈસાનો ભાવ વધારો થયો હતો. રાજ્યના આઠ મહાનગરોમાં આજે પણ પેટ્રોલ કરતા ડિઝલની કિંમત વધુ છે.

પેટ્રોલ ડીઝલના ભાવમાં ગઈકાલના ભાવ વધારા બાદ કુલ જૂન મહિનામાં આ 12મી વખત ભાવ વધારો કરવામાં આવ્યો છે. આ મહિને અત્યાર સુધીમાં પેટ્રોલ 3 રૂપિયા 27 પૈસા અને ડીઝલ 2 રૂપિયા 98 પૈસા મોંઘા થયા છે.

આ પહેલા મે મહિનામાં પેટ્રોલ ડીઝલની કિંમતમાં 16 વખત વધારો કરવામાં આવ્યો હતો. આ દરમિયાન પેટ્રોલ 4.11 રૂપિયા અને ડીઝલ 4.69 રૂપિયા મોંઘા થયા હતા. આ વર્ષની વાત કરીએ તો 1 જાન્યુઆરીએ પેટ્રોલ 83.97 રૂપિયા અને ડીઝલ 74.12 રૂપિયા પર હતા જે હવે વધીને પેટ્રોલ 97.50 અને ડીઝલ 88.23 રૂપિયા પ્રતિ લિટર પર છે. એટલે કે 5 મહિનાથી પણ ઓછા સમયમાં પેટ્રોલ 13.53 રૂપિયા અને ડીઝલ 14.11 રૂપિયા મોંઘું થયું છે.

ચોમાસાની સિઝનમાં વાવણીનો સમય નજીક છે. ત્યારે ડિઝલની કિંમતમાં સતત થતા ભાવ વધારાથી ખેડૂતોને હાલાકીનો સામનો કરવો પડી રહ્યો છે. તો બીજી તરફ નિયંત્રણો હળવા થતા જે રીતે ટ્રાંસપોર્ટેશન શરૂ થયુ છે. ત્યારે કોરોનાની મહામારી બાદ ડિઝલની કિંમતમાં વધારો થતા ટ્રાંસપોર્ટરોને હાલાકી ભોગવવાનો વારો આવી રહ્યો છે.

વિતેલા 7 વર્ષમાં કેટલી વધી કિંમત ?

દર વર્ષે પેટ્રોલ ડિઝલ મોંઘા થતા જઈ રહ્યા છે. પરંતુ વિતેલા સાત વર્ષમાં કિંમતમાં ધરખમ વધારો થયો છે. આ દરમિયાન પેટ્રોલ ડિઝલમાં 30 35 રૂપિયા પ્રતિ લિટર વધારો જોવા મળ્યો છે.