Home Loan Rate Hike: આ બે મોટી બેંકે ગ્રાહકોને આપ્યો મોટો આંચકો, ફરી લોન થઈ મોંઘી, જાણો વ્યાજ દરમાં કેટલો વધારો થયો

રિઝર્વ બેંક ઓફ ઈન્ડિયા (RBI)ના રેપો રેટમાં 0.5%નો વધારો કરવામાં આવ્યો ત્યારથી તમામ બેંકોએ લોનના દરો એક નહીં પરંતુ અનેક વખત વધાર્યા છે.

પ્રતિકાત્મક તસવીર

Home Loan Rate Hike: સપ્ટેમ્બર મહિનો શરૂ થઈ ગયો છે અને તેની સાથે આ મહિનો ઘણા નવા ફેરફારો લઈને આવ્યો છે. જ્યારે 1લી સપ્ટેમ્બરથી ટોલ ટેક્સના ભાવમાં વધારો કરવામાં આવ્યો છે ત્યારે દેશની બે મોટી બેંકોએ પહેલી તારીખે જ પોતાના ગ્રાહકોને મોટો ઝટકો આપ્યો છે. પંજાબ નેશનલ બેંક (PNB) અને ICICI બેંકે MCLR વધારવાની જાહેરાત કરી છે. આ પછી તમામ પ્રકારની લોન મોંઘી થશે અને EMI બોજ વધશે.

રિઝર્વ બેંક ઓફ ઈન્ડિયા (RBI)ના રેપો રેટમાં 0.5%નો વધારો કરવામાં આવ્યો ત્યારથી તમામ બેંકોએ લોનના દરો એક નહીં પરંતુ અનેક વખત વધાર્યા છે. હવે વાત કરીએ પંજાબ નેશનલ બેંકની તો તમને જણાવી દઈએ કે PNBએ માર્જિનલ કોસ્ટ ઓફ ફંડ આધારિત લેન્ડિંગ રેટ (MCLR)માં 0.5 ટકાના વધારાની જાહેરાત કરી છે. આ પછી મોટાભાગની ઉપભોક્તા લોન મોંઘી થઈ ગઈ છે. નવા દરો ગુરુવાર, 1 સપ્ટેમ્બર, 2022થી અમલમાં આવ્યા છે. આ વધારા બાદ એક વર્ષના સમયગાળા માટે MCLR 7.7 ટકા થઈ ગયો છે.

ફેરફાર બાદ પીએનબીના નવા લોન દર

પંજાબ નેશનલ બેંક દ્વારા MCLRમાં 0.05 ટકાના વધારા બાદ એક વર્ષના સમયગાળા માટે MCLR હવે 7.65 ટકાથી વધીને 7.70 ટકા થઈ ગયો છે. નોંધનીય છે કે મોટાભાગની ગ્રાહક લોન સમાન સમયગાળાના MCLR સાથે જોડાયેલી હોય છે. આ સિવાય ત્રણ વર્ષના સમયગાળા માટે આ દર વધારીને 8 ટકા કરવામાં આવ્યો છે. એક મહિના, ત્રણ મહિના અને છ મહિનાની લોન પર MCLR હવે 7.10 થી 7.40 ટકાની રેન્જમાં હશે. જ્યારે, આ વધારા પછી, MCLR એક દિવસના સમયગાળામાં 7 ટકાથી વધીને 7.05 ટકા થઈ ગયો છે.

ICICI એ આટલો વધારો કર્યો

PNB ઉપરાંત, ICICI બેંકે પણ તમામ કાર્યકાળ માટે તેના MCLRમાં 10 બેસિસ પોઈન્ટનો વધારો કર્યો છે. આ બેંકના નવા દરો પણ આજથી 1 સપ્ટેમ્બર, 2022થી અમલમાં આવી ગયા છે. ICICI બેંકની વેબસાઇટ અનુસાર, એક મહિનાનો MCLR દર 7.65 ટકાથી વધારીને 7.75 ટકા કરવામાં આવ્યો છે.

આ સિવાય ત્રણ મહિના, છ મહિનાના સમયગાળામાં MCLRને વધારીને અનુક્રમે 7.80 ટકા અને 7.95 ટકા કરવામાં આવ્યો છે. એક વર્ષનો MCLR 7.90 ટકાથી વધારીને 8 ટકા કરવામાં આવ્યો છે. ગયા મહિનાની શરૂઆતમાં એટલે કે 1 ઓગસ્ટ, 2022ના રોજ, ICICI બેંકે MCLRમાં 15 bpsનો વધારો કર્યો હતો.

બીજી ઘણી બેંકોની લોન મોંઘી થઈ ગઈ, આ બે બેંકો સિવાય બેંક ઓફ ઈન્ડિયાએ પણ મંગળવારે તેના MCLR દરમાં વધારો કરવાની જાહેરાત કરી હતી. આ બેંકના નવા દરો પણ 1 સપ્ટેમ્બરથી લાગુ થઈ ગયા છે. BOI એ એક રાત, છ મહિના અને એક વર્ષના કાર્યકાળ માટે તેના બેન્ચમાર્ક ધિરાણ દરમાં 5-10 બેસિસ પોઈન્ટ્સ (bps)નો વધારો કર્યો છે.

અગાઉ, સ્ટેટ બેંક ઓફ ઈન્ડિયા (SBI) એ તમામ મુદત માટે MCLR દરોમાં 0.2 ટકાનો વધારો કર્યો છે. MCLR દરમાં વધારાની સીધી અસર તમામ પ્રકારની લોન પર પડે છે અને તે મોંઘી થઈ જાય છે. આ સાથે, EMI પણ તે મુજબ વધે છે.