ઝડપથી ફેલાઇ રહી છે ઉત્તરાખંડના જંગલામાં લાગેલી આગ, નૈનીતાલ હાઇકોર્ટ કોલોની પણ ઝપેટમાં, સેનાની લેવાઇ મદદ

રૂદ્રપ્રયાગ જિલ્લાના જંગલમાં આગ લગાડનાર ત્રણ લોકોની ધરપકડ કરીને જેલમાં મોકલી દેવામાં આવ્યા છે. છેલ્લા 24 કલાકમાં વિવિધ સ્થળોએ જંગલમાં આગ લાગવાના 31 નવા બનાવો નોંધાયા છે,

ફાઇલ ફોટો ( ગૂગલમાંથી )

પાઈન્સ  નજીક સ્થિત ભારતીય સેનાના સંવેદનશીલ વિસ્તારમાં આગ પહોંચવાની સંભાવનાને ધ્યાનમાં રાખીને, શક્ય તેટલી વહેલી તકે આગને બુઝાવવાના પ્રયાસો કરવામાં આવી રહ્યા છે. આગ પર કાબૂ મેળવવા માટે હેલિકોપ્ટરની મદદ લેવાના પ્રયાસો પણ કરવામાં આવી રહ્યા છે.

જેમ જેમ ગરમી વધી, ઉત્તરાખંડમાં વિવિધ સ્થળોએ જંગલમાં લાગેલી આગ શુક્રવારે નૈનીતાલમાં હાઈકોર્ટ કોલોની પાસે પહોંચી. રૂદ્રપ્રયાગ જિલ્લાના જંગલમાં આગ લગાડનાર ત્રણ લોકોની ધરપકડ કરીને જેલમાં મોકલી દેવામાં આવ્યા છે. છેલ્લા 24 કલાકમાં વિવિધ સ્થળોએ જંગલમાં આગ લાગવાના 31 નવા બનાવો નોંધાયા છે, જેમાં 33.34 હેક્ટર જંગલ વિસ્તાર પ્રભાવિત થયો છે. નૈનીતાલ જિલ્લા મુખ્યાલય પાસેના જંગલોમાં લાગેલી આગએ વિકરાળ સ્વરૂપ ધારણ કર્યું હતું. આગ પાઈન્સ વિસ્તારમાં સ્થિત હાઈકોર્ટ કોલોની સુધી પહોંચી છે, ત્યારબાદ તેને કાબૂમાં લેવા માટે સેનાને બોલાવવામાં આવી હતી.

ભીષણ આગને કારણે જંગલો બળીને રાખ થઈ ગયા હતા. નૈનીતાલના લાડિયાકાટાનું જંગલ પણ આગમાં બળીને ખાખ થઈ ગયું. જંગલમાં લાગેલી ભીષણ આગને કારણે નૈનીતાલ ભવાલી રોડ પર ગાઢ ધુમાડાને કારણે કેટલાક કલાકો સુધી વાહનોની અવરજવર બંધ કરવી પડી હતી. ભારે પવનના કારણે ફાયર વિભાગની ટીમને આગ પર કાબૂ મેળવવા કલાકો સુધી જહેમત ઉઠાવવી પડી હતી. સ્થાનિક લોકોનું કહેવું છે કે જંગલમાં આગ લાગવા છતાં વન વિભાગનો કોઈ કર્મચારી કે અધિકારી ઘટના સ્થળે પહોંચી શક્યો ન હતો જેના કારણે વન વિભાગની કામગીરી પર સવાલો ઉઠી રહ્યા છે.

આગ ઓલવવા માટે સેનાની મદદ લેવામાં આવી રહી છે

આગના વધતાં જતા વિનાશ વચ્ચે, મુખ્યમંત્રી પુષ્કર સિંહ ધામીએ અધિકારીઓને સતર્ક રહેવા અને તમામ વિભાગો સાથે સંકલન કરીને તેને રોકવા માટે પગલાં લેવા જણાવ્યું છે. વન વિભાગના કર્મચારીઓની સાથે આર્મીના જવાનો પણ આગ પર કાબૂ મેળવવામાં વ્યસ્ત છે. આગ ઓલવવા માટે હેલિકોપ્ટરની મદદ લેવાનો પણ પ્રયાસ કરવામાં આવી રહ્યો છે. આ વિસ્તારના રહેવાસી અને આસિસ્ટન્ટ રજિસ્ટ્રાર અનિલ જોશીએ જણાવ્યું હતું કે, "આગ પાઈન્સ નજીક સ્થિત એક જૂના અને ખાલી મકાનને લપેટમાં લીધી છે.  સાંજથી આગ પર કાબૂ મેળવવાની કામગીરી કરવામાં આવી રહી છે.