ગાંધીનગર: સચિવાલયના 19 DySO ને બઢતી, હંગામી ધોરણે સેક્શન ઓફિસર તરીકે નિમણૂક
DySO promotion news: સામાન્ય વહીવટ વિભાગ દ્વારા તારીખ 30/12/2025 ના રોજ બહાર પાડવામાં આવેલા આદેશ મુજબ, આ બઢતી "ઈન સીટુ" (In situ) પદ્ધતિથી આપવામાં આવી છે.
DySO promotion news: ગાંધીનગર સ્થિત ગુજરાત સરકારના સામાન્ય વહીવટ વિભાગ (GAD) દ્વારા વર્ષ 2025 ના અંતે કર્મચારીઓ માટે એક મહત્વપૂર્ણ જાહેરાત કરવામાં આવી છે. સચિવાલય સંવર્ગમાં ફરજ બજાવતા 19 જેટલા નાયબ સેક્શન અધિકારીઓને (Deputy Section Officers) બઢતી આપીને તેમને સેક્શન અધિકારી (Section Officers) વર્ગ 2 તરીકે નિમણૂક આપવામાં આવી છે. જોકે, આ બઢતી તદ્દન હંગામી ધોરણે અને શરતી આપવામાં આવી છે, જેના વિશેની સંપૂર્ણ વિગત નીચે મુજબ છે.
'ઈન સીટુ' બઢતી અને પગાર ધોરણમાં વધારો
સામાન્ય વહીવટ વિભાગ દ્વારા તારીખ 30/12/2025 ના રોજ બહાર પાડવામાં આવેલા આદેશ મુજબ, આ બઢતી "ઈન સીટુ" (In situ) પદ્ધતિથી આપવામાં આવી છે. તેનો સરળ અર્થ એ છે કે બઢતી પામેલા અધિકારીઓની બદલી કરવામાં આવી નથી. તેઓ જે વિભાગમાં અને જે ટેબલ પર ફરજ બજાવે છે, ત્યાં જ તેમને સેક્શન ઓફિસર તરીકેનો ચાર્જ સોંપવામાં આવ્યો છે.
આ બઢતી સાથે કર્મચારીઓના પગાર ધોરણ (Pay Scale) માં પણ સુધારો થયો છે. અત્યાર સુધી વર્ગ 3 માં 39,900 1,26,600 (પે મેટ્રીક્સ લેવલ 7) મેળવતા આ અધિકારીઓ હવે વર્ગ 2 ના સ્કેલ મુજબ 44,900 1,42,400 (પે મેટ્રીક્સ લેવલ 8) ના પગાર ધોરણના હકદાર બનશે. જ્યાં સુધી આ અધિકારીઓ જે તે જગ્યા પર કામ કરશે ત્યાં સુધી તે જગ્યા 'સેક્શન અધિકારી' તરીકે અપગ્રેડ ગણાશે અને તેમની બદલી કે નિવૃત્તિ બાદ તે ફરીથી મૂળ 'નાયબ સેક્શન અધિકારી' તરીકે ડાઉનગ્રેડ થઈ જશે.
હાઈકોર્ટના ચુકાદાને આધીન રહેશે નિમણૂક
સરકારી નોકરી (Government Job) માં બઢતીની આ પ્રક્રિયા કાયદાકીય જોગવાઈઓને ધ્યાનમાં રાખીને કરવામાં આવી છે. જાહેરનામામાં સ્પષ્ટતા કરવામાં આવી છે કે આ 19 અધિકારીઓની નિમણૂક ગુજરાત હાઈકોર્ટ (Gujarat High Court) માં ચાલી રહેલા કેસ SCA/2155/2019 અને અન્ય સંલગ્ન મેટર્સના આખરી ચુકાદાને આધીન રહેશે. ભવિષ્યમાં કોર્ટ જે પણ નિર્ણય લેશે, તે આ કર્મચારીઓને બંધનકર્તા રહેશે.
કયા વિભાગોના કર્મચારીઓને મળ્યો લાભ?
આ બઢતી પ્રક્રિયામાં સચિવાલયના વિવિધ મહત્વના વિભાગોના કર્મચારીઓનો સમાવેશ કરવામાં આવ્યો છે. જેમાં મુખ્યત્વે:
સામાન્ય વહીવટ વિભાગ (GAD)
મહેસૂલ વિભાગ (Revenue Department)
શિક્ષણ વિભાગ
માર્ગ અને મકાન વિભાગ
નર્મદા અને જળસંપત્તિ વિભાગ
શ્રમ અને રોજગાર વિભાગ
સામાજિક ન્યાય અને અધિકારીતા વિભાગ
આ તમામ વિભાગોમાં ફરજ બજાવતા પસંદગી પામેલા નાયબ સેક્શન અધિકારીઓને હવે સેક્શન અધિકારી તરીકેની જવાબદારી સોંપવામાં આવશે અને તેમના વિગતવાર નિમણૂક હુકમો હવે પછી જાહેર કરવામાં આવશે.
ટોપ સ્ટોરી
ટ્રેન્ડિંગ સમાચાર
