ગુજરાત સરકારના ક્યા મંત્રીએ રાજ્યમાં કોરોનાની ત્રીજી લહેર આવશે એવી આપી ચેતવણી ?

કેન્દ્રીય ગૃહ મંત્રાલયે રાજ્યોને સૂચના આપી છે કે, કોરોના વકરે તેવી દહેશત છે તેથી કોરોનાની માર્ગદર્શિકાનું કડક રીતે પાલન કરાવવામાં આવે.

Rushikesh_Patel_01

અમદાવાદઃ ગુજરાતમાં કોરોનાના કેસો વધી રહ્યા છે છતાં લોકો હજુ કોરોનાને ગંભીરતાથી લેતા નથી. કોરોના વિસ્ફોટના ખતરાને ધ્યાનમાં રાખીને ગુજરાત સરકારના આરોગ્ય મંત્રી ઋષિકેશ પટેલે ચેતવણી આપી છે કે, કોરોનાની ત્રીજી લહેર આવે તેવી શક્યતા છે તેથી લોકો સતર્ક રહે. તેમણે દાવો કર્યો કે, કોરોનાની ત્રીજી લહેર આવે તેવી શક્યતાને ધ્યાનમાં રાખીને રાજ્યની હોસ્પિટલો તથા આરોગ્ય તંત્રને સજ્જ કરાયું છે.

કેન્દ્રીય ગૃહ મંત્રાલયે રાજ્યોને સૂચના આપી છે કે, કોરોના વકરે તેવી દહેશત છે તેથી કોરોનાની માર્ગદર્શિકાનું કડક રીતે પાલન કરાવવામાં આવે. રાજ્યોને પોતાને જરૂર લાગે તો અલાયદી માર્ગદર્શિકા ઘડવામાં આવે. કોરોનાને રોકવા માટે જિલ્લા કક્ષાએ વધુ નિયંત્રણો લાદવામાં આવે એવી પણ છૂટ કેન્દ્ર સરકાર દ્વારા આપવામાં આવી છે.  કોરોનાની ત્રીજી લહેરની શક્યતાને કારણે તમામ સાવચેતીનાં પગલાં લેવા સૂચના અપાઈ છે.

સરકારનાં સૂત્રોનું કહેવું છે કે, આવનારા દિવસોમાં ન્યુ યર, હોળી અને ઉતરાયણ જેવા તહેવારો આવી રહ્યા છે. તેના કારણે લોકોની ભીડ મોટા પ્રમાણમાં ભેગી થાય તો એમિક્રોનનુ સંક્રમણ વધવાની આશંકા છે. ગુજરાતમાં એમિક્રોનના કેસો પણ સતત વધી રહ્યા છે ત્યારે આરોગ્ય મંત્રીએ કોરોનાની ત્રીજી લહેર આવી શકે છે એવી ચેતવમી આપીને લોકોને સતર્ક રહેવા કહ્યું છે.  

કોરોનાના કેસોમાં ઘટાડો થતાં લોકો નચિંત બન્યાં છે અને લોકજાગૃતિના અભાવે હાલમાં બજારોમાં ભારે ભીડ જોવા મળી રહી છે. આ ઉપરાંત સરકારી અને રાજકીય કાર્યક્રમોમાં પણ મોટા પ્રમાણમાં ભીડ એકઠી કરવામાં આવી રહી છે. આ સંકેતો સારા નથી અને  નિષ્ણાતો આ બધી પ્રવૃત્તિઓના કારણે  આગામી દિવસોમાં કોરોના વધુ વકરે તેવી ચિંતા વ્યક્ત કરી રહ્યા છે.

આ પણ વાંચો........