Gujarat IPS Promotion: રાજ્ય સરકારનો મોટો નિર્ણય, 6 IPS અધિકારીઓને મળી બઢતી; મનોજ શશિધર અને રાજુ ભાર્ગવ બન્યા DG
Gujarat IPS promotion: કેન્દ્રમાં ફરજ બજાવતા અધિકારીઓને 'પ્રોફોર્મા પ્રમોશન'નો લાભ, CID ક્રાઈમના પી.વી. રાઠોડને IG તરીકે બઢતી; 1 ડિસેમ્બરથી આદેશ લાગુ.
Gujarat IPS promotion: ગુજરાત સરકારે પોલીસ બેડામાં મહત્વનો વહીવટી નિર્ણય લેતા રાજ્ય કેડરના 6 વરિષ્ઠ IPS અધિકારીઓને બઢતી (Promotion) આપી છે. રાજ્યના ગૃહ વિભાગ દ્વારા બહાર પાડવામાં આવેલા આદેશ અનુસાર, કેન્દ્રિય પ્રતિનિયુક્તિ (Central Deputation) પર રહેલા અને રાજ્યમાં ફરજ બજાવતા અધિકારીઓને 'પ્રોફોર્મા પ્રમોશન'નો લાભ આપવામાં આવ્યો છે. આ યાદીમાં 1994 બેચના મનોજ શશિધર અને 1995 બેચના રાજુ ભાર્ગવને ડાયરેક્ટર જનરલ (DG) ના રેન્ક પર પ્રમોટ કરવામાં આવ્યા છે. જ્યારે અન્ય 4 અધિકારીઓને ઇન્સ્પેક્ટર જનરલ (IG) નું પદ મળ્યું છે. આ નોટિફિકેશનનો અમલ 01/12/2025 થી તાત્કાલિક અસરથી કરવામાં આવ્યો છે.
DG રેન્ક (Level 16) માં કોને મળી બઢતી?
સરકારે બે વરિષ્ઠ અધિકારીઓને સર્વોચ્ચ DG રેન્ક પર બઢતી આપી છે:
મનોજ શશિધર (IPS, 1994): હાલમાં CBI (સેન્ટ્રલ બ્યુરો ઓફ ઇન્વેસ્ટિગેશન) માં સ્પેશિયલ ડિરેક્ટર તરીકે કેન્દ્રિય પ્રતિનિયુક્તિ પર ફરજ બજાવતા મનોજ શશિધરને DG રેન્કમાં 'પ્રોફોર્મા પ્રમોશન' આપવામાં આવ્યું છે.
રાજુ ભાર્ગવ (IPS, 1995): રાજ્યમાં ADGP (આર્મડ યુનિટ્સ) તરીકે ફરજ બજાવતા રાજુ ભાર્ગવને બઢતી આપીને DG (આર્મડ યુનિટ્સ) બનાવવામાં આવ્યા છે. આ માટે તેમના વર્તમાન પદને 'ex cadre DG' પોસ્ટમાં અપગ્રેડ કરવામાં આવ્યું છે.
IG રેન્ક (Level 14) માં 2007 બેચના 4 અધિકારીઓ પ્રમોટ
વર્ષ 2007 ની બેચના ચાર IPS અધિકારીઓને DIG માંથી IG (ઇન્સ્પેક્ટર જનરલ) ના પદ પર બઢતી મળી છે:
દિવ્યા મિશ્રા: તેઓ હાલમાં ઇન્ટેલિજન્સ બ્યુરો (IB) માં કેન્દ્રિય પ્રતિનિયુક્તિ પર છે, તેમને IG ગ્રેડમાં પ્રમોશન મળ્યું છે.
દીપેન ભાદ્રાન: કેબિનેટ સચિવાલય (Cabinet Secretariat) માં મહત્વની જવાબદારી સંભાળતા દીપેન ભાદ્રાનને પણ IG તરીકે બઢતી આપવામાં આવી છે.
સૌરભ તુલુંબિયા: GAIL માં એડવાઈઝર (સિક્યુરિટી) તરીકે કેન્દ્રમાં ફરજ બજાવતા સૌરભ તુલુંબિયાને IG રેન્કનો લાભ મળ્યો છે.
પી.વી. રાઠોડ: રાજ્યમાં CID (Crime) માં ફરજ બજાવતા પી.વી. રાઠોડને DIG માંથી IG તરીકે બઢતી આપવામાં આવી છે. તેમના પદને પણ 'ex cadre IG' પોસ્ટમાં અપગ્રેડ કરવામાં આવ્યું છે.
શું છે 'પ્રોફોર્મા પ્રમોશન'?
આ તમામ બઢતીઓ IPS Pay Rules 2016 ના નિયમ 6 (Rule 6) અંતર્ગત 'પ્રોફોર્મા પ્રમોશન' તરીકે આપવામાં આવી છે. આ નિયમ ખાસ કરીને એવા અધિકારીઓ માટે હોય છે જેઓ રાજ્ય કેડરના હોય પરંતુ કેન્દ્ર સરકારમાં પ્રતિનિયુક્તિ (Deputation) પર ફરજ બજાવતા હોય. જ્યારે તેમની બેચના અન્ય સાથીદારોને રાજ્યમાં બઢતી મળે છે, ત્યારે કેન્દ્રમાં રહેલા અધિકારીઓને પણ સમાન લાભ આપવા માટે આ પ્રમોશન આપવામાં આવે છે. સરકારે આ માટેની તમામ જરૂરી શરતો પૂર્ણ થયાની સત્તાવાર નોંધ કરી છે.
આ આદેશ રાજ્યપાલશ્રીના હુકમથી મુખ્ય સચિવ M.K. Das દ્વારા બહાર પાડવામાં આવ્યો છે અને તેની જાણ મુખ્યમંત્રી, ગૃહ વિભાગ તથા પોલીસ મહાનિદેશક (DGP) સહિતની કચેરીઓને કરવામાં આવી છે.
ટોપ સ્ટોરી
ટ્રેન્ડિંગ સમાચાર
