ગોપાલ ઇટાલિયાની હાજરીમાં AAP સમર્થકે કોંગ્રેસના MLA કિરીટ પટેલને કહ્યું, 'ફાવતું ન હોય તો અમારી પાર્ટીમાં આવી જાવ!'

વિધાનસભા પરિસરમાં વિસાવદરના આગેવાનો સાથે ગોપાલ ઇટાલિયા અને પાટણના ધારાસભ્ય કિરીટ પટેલની મુલાકાત દરમિયાન સર્જાયું હાસ્યનું મોજું.

Kirit Patel AAP offer

Source : abp asmita

Show Quick Read

Key points generated by AI, verified by newsroom

• વિધાનસભામાં AAP-કોંગ્રેસ ધારાસભ્યો વચ્ચે રમુજી સંવાદ.
• AAP સમર્થકે કોંગ્રેસ ધારાસભ્યને AAP માં આવવા કહ્યું.
• આ ઘટનાએ વિધાનસભા પરિસરમાં હાસ્યનું મોજું ફેલાવ્યું.
• ધારાસભ્ય કિરીટ પટેલ પાટણ બેઠક પરથી સતત ચૂંટાય છે.

ગુજરાત વિધાનસભાના પરિસરમાં હાલમાં એક ખૂબ જ રસપ્રદ અને રમૂજી ઘટના જોવા મળી છે. વિસાવદરના આગેવાનો જ્યારે વિધાનસભાની મુલાકાતે આવ્યા હતા, ત્યારે આમ આદમી પાર્ટી (AAP) ના ધારાસભ્ય ગોપાલ ઇટાલિયા અને કોંગ્રેસના ધારાસભ્ય ડૉ. કિરીટ પટેલ વચ્ચે અચાનક મુલાકાત થઈ ગઈ. વાતચીત દરમિયાન ગોપાલ ઇટાલિયાના એક સમર્થકે કિરીટ પટેલને મજાકમાં કહી દીધું કે, "સાહેબ, જો તમને કોંગ્રેસમાં ફાવતું ન હોય તો AAP માં આવી જાવ." આ સાંભળતા જ ત્યાં હાજર તમામ લોકો ખડખડાટ હસી પડ્યા હતા. રાજકીય ખેંચતાણ વચ્ચે બનેલી આ હળવી ઘટના અત્યારે રાજકીય વર્તુળોમાં ભારે ચર્ચાનો વિષય બની છે.

વિધાનસભા પરિસરમાં શું બન્યું?

બન્યું એવું કે, વિસાવદરની મોટી મોણપરી જિલ્લા પંચાયતના આગેવાનો અને હોદ્દેદારો ગુજરાત વિધાનસભાની કામગીરી જોવા માટે ગાંધીનગર આવ્યા હતા. આ દરમિયાન ધારાસભ્ય ગોપાલ ઇટાલિયા તેમની સાથે ઉભા રહીને વિધાનસભા વિશે ચર્ચા કરી રહ્યા હતા.

બરાબર એ જ સમયે પાટણ બેઠકના કોંગ્રેસના ધારાસભ્ય ડૉ. કિરીટ પટેલ પણ ત્યાંથી પસાર થઈ રહ્યા હતા અને તેઓ પણ આ ગ્રુપ સાથે જોડાઈ ગયા. કિરીટ પટેલે પણ આગેવાનો સાથે ઊભા રહીને વિધાનસભામાં કઈ રીતે કામગીરી થાય છે અને ધારાસભ્યો કેવી રીતે પ્રશ્નો ઉઠાવે છે તેની સમજણ આપવાનું શરૂ કર્યું.

'ફાવતું ન હોય તો AAP માં આવી જાવ'

બંને નેતાઓ અને આગેવાનો વચ્ચે જ્યારે એકદમ ગંભીરતાથી ચર્ચા ચાલી રહી હતી, ત્યારે અચાનક ગોપાલ ઇટાલિયાના એક સમર્થકે હળવા અંદાજમાં કોંગ્રેસના ધારાસભ્ય કિરીટ પટેલને સીધી જ ઑફર આપી દીધી.

તેણે મજાક કરતા કહ્યું, "સાહેબ, જો તમને ત્યાં ફાવતું ન હોય તો અમારી પાર્ટીમાં આવી જાવ!" સમર્થકની આ અચાનક આવેલી અપીલ સાંભળતા જ બંને ધારાસભ્યો (ગોપાલ ઇટાલિયા અને કિરીટ પટેલ) સહિત ત્યાં હાજર તમામ આગેવાનો ખડખડાટ હસી પડ્યા હતા અને આખા પરિસરમાં હાસ્યનું મોજું ફરી વળ્યું હતું.

કોણ છે ડૉ. કિરીટ પટેલ?

જેમને AAP માં જોડાવાની મજાકમાં ઑફર મળી છે, તે ડૉ. કિરીટ પટેલ પાટણ વિધાનસભા બેઠક પરથી સતત 2 ટર્મથી કોંગ્રેસના ધારાસભ્ય તરીકે ચૂંટાઈ આવે છે.

તેઓ પહેલીવાર 2017 માં અહીંથી ચૂંટણી જીતીને વિધાનસભા પહોંચ્યા હતા.

તેમની લોકપ્રિયતાને જોતા કોંગ્રેસે 2022 ની વિધાનસભા ચૂંટણીમાં પણ તેમને જ રિપિટ કર્યા હતા.

2022 ની એ કાંટાની ટક્કરવાળી ચૂંટણીમાં કિરીટ પટેલે ભાજપના ઉમેદવાર ડૉ. રાજુલ દેસાઈ અને આમ આદમી પાર્ટીના ઉમેદવાર લાલેશ ઠક્કર બંનેને હરાવીને શાનદાર જીત મેળવી હતી.

આ પણ વાંચો

અમરેલીમાં ફરી કૌભાંડ: ઈંગોરાળામાંથી ઝડપાયું 220 લીટર નકલી દૂધ, ફૂડ વિભાગ અને પોલીસના સપાટાથી ભેળસેળિયાઓમાં ફફડાટ