Tapi Rain: તાપીમાં ધોધમાર વરસાદથી વ્યારા-ઉનાઈ સ્ટેટ હાઈવે પાણીમાં ગરકાવ, વાહનવ્યવહાર ઠપ્પ
Gujarat Rain And Weather: સ્થિતિની ગંભીરતાને ધ્યાનમાં રાખીને તાપી જિલ્લા વહીવટી તંત્ર તાબડતોબ એક્શન મોડમાં આવી ગયું છે
- તાપીમાં ભારે વરસાદથી શાળા-કોલેજો બંધ; જનજીવન પ્રભાવિત.
- ડોલવણમાં 14.88 ઇંચ વરસાદ; રસ્તાઓ, હાઈવે બંધ થયા.
- ઓલણ નદીમાં ઘોડાપૂર; નીચાણવાળા વિસ્તારોમાં પાણી ઘૂસ્યા.
- તાપી તંત્ર સક્રિય; SDRF તૈનાત; લોકોને સતર્ક રહેવા સૂચના.
Gujarat Rain And Weather: તાપી જિલ્લામાં વિતેલી રાત્રિ દરમિયાન મેઘરાજાએ રૌદ્ર સ્વરૂપ ધારણ કરતાં 1 થી 14.88 ઈંચ સુધીનો ભારે વરસાદ ખાબક્યો છે. જેના કારણે સમગ્ર તાપી જિલ્લો જળબંબાકાર થતાં વિદ્યાર્થીઓની સુરક્ષા અર્થે શાળા-કોલેજોમાં રજા જાહેર કરી દેવાઈ છે. ઉપરવાસમાં ધોધમાર વરસાદથી નદી-નાળાં છલકાઈ જતાં રસ્તાઓ બંધ થયા છે અને જનજીવન ભારે પ્રભાવિત થયું છે.
તાપી જિલ્લામાં સાર્વત્રિક મુસળધાર વરસાદ નોંધાયો છે, જેમાં સૌથી વધુ ડોલવણ તાલુકામાં આકાશી આફત સ્વરૂપે રાત્રિ દરમિયાન જ 14.88 ઈંચ વરસાદ ખાબક્યો હતો. આ સિવાય વાલોડમાં 10.08 ઈંચ, વ્યારામાં 9.49 ઈંચ, સોનગઢમાં 7.48 ઈંચ, ઉકાઈમાં 4.25 ઈંચ તેમજ નિઝર અને ઉચ્છલમાં 1-1 ઈંચ વરસાદ નોંધાયો છે. વ્યારામાં 9.49 ઈંચ વરસાદને કારણે મિશન નાકા અને આયલ સર્કલ જેવા નીચાણવાળા વિસ્તારોમાં ઠેર-ઠેર પાણી ભરાઈ ગયા હતા. ભારે વરસાદને પગલે વ્યારા-ઉનાઈ વચ્ચે આવેલ સ્ટેટ હાઈવે પર પાણી ફરી વળતાં અને ખાસ કરીને ડોલવણના ગડત ગામે રોડ પાણીમાં ગરકાવ થતાં વાહનવ્યવહાર સંપૂર્ણપણે બંધ કરવાની ફરજ પડી છે. તે ઉપરાંત, ડોલવણમાંથી પસાર થતી ઓલણ નદીમાં ઘોડાપૂર આવતાં કાંઠા વિસ્તારના ઘરોમાં પૂરના પાણી ઘૂસી ગયા હતા. વાંકલા ગામના નીચલા ફળિયાના ઘરોમાં પણ નદીના પાણી ફરી વળતાં લોકોની ઘરવખરીને વ્યાપક નુકસાન પહોંચ્યું છે.
સ્થિતિની ગંભીરતાને ધ્યાનમાં રાખીને તાપી જિલ્લા વહીવટી તંત્ર તાબડતોબ એક્શન મોડમાં આવી ગયું છે અને સલામતીના ભાગરૂપે ડોલવણ તાલુકામાં SDRFની ટીમને સ્ટેન્ડ બાય કરી દેવામાં આવી છે. તંત્ર દ્વારા નીચાણવાળા વિસ્તારો તેમજ નદીકાંઠે રહેતા તમામ ગ્રામજનોને સતર્ક રહેવા અને બિનજરૂરી ઘરની બહાર ન નીકળવા કડક સૂચના આપવામાં આવી છે.
ટોપ સ્ટોરી
ટ્રેન્ડિંગ સમાચાર
