Gujarat Rain: સૌરાષ્ટ્રમાં અતિભારે વરસાદની ચેતવણી, આજે 10 જિલ્લામાં રેડ એલર્ટ, 15માં ઓરેન્જ એલર્ટ

રાજ્યના 10 જિલ્લાઓમાં આજે રેડ એલર્ટ જાહેર કરવામાં આવ્યું છે, જ્યારે 15 જિલ્લાઓમાં ઓરેન્જ એલર્ટ આપવામાં આવ્યું છે.

પ્રતિકાત્મક તસવીર

Source : AI

Show Quick Read

Key points generated by AI, verified by newsroom

• હવામાન વિભાગે ગુજરાતમાં 24 કલાક ભારે વરસાદની આગાહી.
• આજે 10 જિલ્લામાં રેડ, 15માં ઓરેન્જ એલર્ટ અપાયા છે.
• અમદાવાદ-રાજકોટ હાઈવે બંધ; પાટણમાં 8.9 ઇંચ વરસાદ.
• આવતીકાલે પણ છ જિલ્લા રેડ એલર્ટ પર રહેશે.

Gujarat weather alert: હવામાન વિભાગે ગુજરાતમાં આગામી 24 કલાક માટે ભારે વરસાદની આગાહી કરી છે. ખાસ કરીને સૌરાષ્ટ્રના વિસ્તારોમાં અતિભારે વરસાદની સંભાવના વ્યક્ત કરવામાં આવી છે. રાજ્યના 10 જિલ્લાઓમાં આજે રેડ એલર્ટ જાહેર કરવામાં આવ્યું છે, જ્યારે 15 જિલ્લાઓમાં ઓરેન્જ એલર્ટ આપવામાં આવ્યું છે. આ સાથે જ આવતીકાલે પણ ઉત્તર અને મધ્ય ગુજરાતના કેટલાક જિલ્લાઓ માટે રેડ એલર્ટ જાહેર કરવામાં આવ્યું છે.

આજે આ જિલ્લાઓમાં રેડ એલર્ટ

હવામાન વિભાગે આજે વાવ-થરાદ, બનાસકાંઠા, પાટણ, મહેસાણા, મોરબી, સુરેન્દ્રનગર, અમદાવાદ, ગાંધીનગર, આણંદ અને ખેડા જિલ્લામાં ભારેથી અતિભારે વરસાદની સંભાવના વ્યક્ત કરી રેડ એલર્ટ જાહેર કર્યું છે. આ જિલ્લાઓના લોકોને સતર્ક રહેવા અને બિનજરૂરી મુસાફરી ટાળવાની સલાહ આપવામાં આવી છે.

15 જિલ્લાઓમાં ઓરેન્જ એલર્ટ

આજે સાબરકાંઠા, અરવલ્લી, મહિસાગર, દાહોદ, પંચમહાલ, વડોદરા, સુરત, નવસારી, ભરૂચ, વલસાડ, દમણ, દાદરા અને નગર હવેલી, કચ્છ, જામનગર અને બોટાદ જિલ્લામાં ભારે વરસાદની આગાહીને પગલે ઓરેન્જ એલર્ટ જાહેર કરવામાં આવ્યું છે. નીચાણવાળા વિસ્તારોમાં પાણી ભરાવાની અને નદીઓ-નાળાઓમાં જળસ્તર વધવાની શક્યતા છે.

આવતીકાલે પણ 6 જિલ્લાઓ માટે રેડ એલર્ટ

હવામાન વિભાગના અનુમાન મુજબ આવતીકાલે મહેસાણા, ગાંધીનગર, સાબરકાંઠા, સુરેન્દ્રનગર, અરવલ્લી અને મહિસાગર જિલ્લામાં પણ અતિભારે વરસાદની સંભાવનાને ધ્યાનમાં રાખીને રેડ એલર્ટ જાહેર કરવામાં આવ્યું છે.

લોકોને સાવચેત રહેવા અપીલ

હવામાન વિભાગે ભારે વરસાદની આગાહીને પગલે લોકોને નદી-નાળા અને નીચાણવાળા વિસ્તારોમાં જવાનું ટાળવા, જરૂરી હોય ત્યારે જ મુસાફરી કરવા અને સ્થાનિક તંત્ર દ્વારા આપવામાં આવતી સૂચનાઓનું પાલન કરવાની અપીલ કરી છે. સતત વરસાદને કારણે જળબંબાકાર અને ટ્રાફિકની સમસ્યા સર્જાઈ શકે છે, તેથી સાવચેતી રાખવી જરૂરી છે. 

અમદાવાદ-રાજકોટ હાઈવે બંધ

અમદાવાદમાં છેલ્લા બે દિવસથી સતત વરસી રહેલા ભારે વરસાદના કારણે જનજીવન પર વ્યાપક અસર જોવા મળી રહી છે. ભારે વરસાદને કારણે ચાંગોદર અને બગોદરા નજીક અમદાવાદ-રાજકોટ હાઈવે પર મોટા પ્રમાણમાં પાણી ભરાઈ જતા સુરક્ષાના કારણોસર હાઈવે બંને બાજુથી બંધ કરી દેવામાં આવ્યો છે.

242 તાલુકાઓમાં વરસાદ 

રાજ્યમાં આજે સવારથી હવામાનમાં અચાનક પલટો આવતાં મેઘરાજાએ તોફાની બેટિંગ શરૂ કરી છે, જેના કારણે 242 તાલુકાઓમાં વ્યાપક વરસાદ નોંધાયો છે. પાટણના રાધનપુરમાં આકાશી આફત સ્વરૂપે સૌથી વધુ 8.9 ઈંચ જેટલો ભારે વરસાદ ખાબકતાં સમગ્ર વિસ્તારમાં જળબંબાકારની સ્થિતિ સર્જાઈ છે.