ગુજરાત હવામાન: પરેશ ગોસ્વામીની મોટી આગાહી; 18 તારીખે માવઠાની અફવા કે હકીકત? જાણો ઠંડીનું જોર ઘટશે કે વધશે
Paresh Goswami prediction: 25 નવેમ્બરની સિસ્ટમ ગુજરાતને અસર નહીં કરે, ઠંડીના ટૂંકા બ્રેક બાદ શિયાળુ પાક વાવેતર માટે અનુકૂળ વાતાવરણ રહેશે.
Gujarat weather update: હવામાન નિષ્ણાત પરેશ ગોસ્વામીએ ગુજરાતના આગામી દિવસોના હવામાન અંગે મહત્વપૂર્ણ માહિતી આપી છે. તેમણે સ્પષ્ટપણે જણાવ્યું છે કે 18 નવેમ્બર આસપાસ રાજ્યમાં માવઠાની જે વાતો સોશિયલ મીડિયામાં ચાલી રહી છે તે સંપૂર્ણપણે અફવા છે અને ખેડૂતોએ ગભરાવવાની જરૂર નથી. તેમણે ઉમેર્યું કે, 10 નવેમ્બરથી શરૂ થયેલો ઠંડીનો પ્રથમ રાઉન્ડ સારો રહ્યો છે, પરંતુ 18 કે 19 નવેમ્બરથી તાપમાન થોડું ઊંચકાશે, જેના કારણે ઠંડીમાં આંશિક ઘટાડો અનુભવાશે. જોકે, આ ફેરફાર શિયાળુ પાકોના વાવેતરને અસર નહીં કરે.
ઠંડી અને તાપમાનનું વિશ્લેષણ
પરેશ ગોસ્વામીના જણાવ્યા અનુસાર, ગુજરાતમાં 10 નવેમ્બરથી શિયાળાની ઠંડીની સત્તાવાર શરૂઆત થઈ ચૂકી છે અને ઠંડીનો પ્રથમ તબક્કો સારો અનુભવાયો છે, જેમાં લઘુત્તમ અને મહત્તમ તાપમાનમાં ઘટાડો નોંધાયો છે. જોકે, તેમણે સ્પષ્ટતા કરી કે નવેમ્બર મહિનામાં 'કોલ્ડ વેવ' એટલે કે ગાત્રો થીજવતી તીવ્ર ઠંડીની શક્યતા નહિવત હોય છે, તે સામાન્ય રીતે ડિસેમ્બરમાં જોવા મળે છે. આગામી દિવસોમાં, ખાસ કરીને 18 અથવા 19 નવેમ્બરથી 24 નવેમ્બર સુધી, તાપમાનનો પારો થોડો ઊંચો જશે, જેના પરિણામે ઠંડીના પ્રભાવમાં થોડો ઘટાડો જોવા મળશે.
18 તારીખના માવઠાની અફવાનું ખંડન
હાલ સોશિયલ મીડિયા પર 18 નવેમ્બર આસપાસ રાજ્યમાં માવઠું થવાની અફવાઓ ચાલી રહી છે, જે અંગે પરેશ ગોસ્વામીએ સ્પષ્ટ શબ્દોમાં ખંડન કર્યું છે. તેમણે ભારપૂર્વક જણાવ્યું છે કે 18 તારીખની આસપાસ ગુજરાતના કોઈપણ ખૂણામાં માવઠું થવાની કોઈ જ શક્યતાઓ નથી. તેમણે ખેડૂતો અને સામાન્ય નાગરિકોને આવી પાયાવિહોણી અફવાઓ પર ધ્યાન ન આપવા અને ગભરાટ ન ફેલાવવા અપીલ કરી છે.
25 નવેમ્બરની સિસ્ટમ અને ગુજરાત
ઘણા વેધર એપ્લિકેશનો 25 નવેમ્બર આસપાસ બંગાળની ખાડીમાં એક નવી સિસ્ટમ બનતી દર્શાવી રહ્યા છે, જેના કારણે પણ ખેડૂતોમાં ચિંતા છે. આ અંગે પરેશ ગોસ્વામીએ સ્પષ્ટતા કરી છે કે આ સિસ્ટમ બનશે, પરંતુ તેનાથી ગુજરાતને ડરવાની બિલકુલ જરૂર નથી. આ સિસ્ટમ દક્ષિણ ભારત તરફ અસર કરે તેવી શક્યતા છે, કારણ કે તમિલનાડુ, કેરળ અને કર્ણાટક જેવા રાજ્યોમાં હજુ ચોમાસાનો પ્રભાવ હોય છે. ગુજરાત, મહારાષ્ટ્ર અને મધ્ય પ્રદેશમાંથી ચોમાસાની સંપૂર્ણ વિદાય થઈ ચૂકી હોવાથી આ સિસ્ટમની અસર ગુજરાત પર થવાની સંભાવના નથી.
ખેડૂતો માટે સલાહ અને નવેમ્બરનો અંદાજ
સમગ્ર ચિત્ર સ્પષ્ટ કરતાં પરેશ ગોસ્વામીએ જણાવ્યું કે, સંપૂર્ણ નવેમ્બર મહિનો માવઠા-મુક્ત રહેવાની પ્રબળ સંભાવના છે. ખેડૂતો માટે આ સૌથી રાહતના સમાચાર છે. ભલે 19 થી 24 નવેમ્બર વચ્ચે ઠંડીમાં આંશિક ઘટાડો થાય અને તાપમાન ઉંચકાય, તેમ છતાં વાતાવરણ શિયાળુ પાકના વાવેતર માટે સંપૂર્ણપણે અનુકૂળ રહેશે. ખેડૂતો કોઈપણ ચિંતા વિના તેમના શિયાળુ પાકનું વાવેતર કાર્ય ચાલુ રાખી શકે છે, કારણ કે વાતાવરણ ડિસ્ટર્બ થવાની હાલ કોઈ શક્યતા નથી. નવેમ્બર મહિના દરમિયાન ઠંડીનો સામાન્ય માહોલ યથાવત રહેશે.
ટોપ સ્ટોરી
ટ્રેન્ડિંગ સમાચાર
