ગુજરાતના દરિયાકાંઠાના વિસ્તારોમાં કડાકાભડાકા સાથે ધોધમાર વરસાદ શરૂ: જાફરાબાદ, મહુવા અને રાજુલામાં 'પડ્યા પર પાટુ' જેવી સ્થિતિ
Gujarat coastal rain: ભાવનગરના મહુવા પંથકમાં રાત્રે 8:00 થી 10:00 વાગ્યા દરમિયાન લગભગ પોણો ઇંચ વરસાદ ખાબક્યો છે, જેના કારણે કમોસમી વરસાદથી અગાઉથી પ્રભાવિત ખેડૂતોની મુશ્કેલીઓમાં વધારો થયો છે.
Gujarat coastal rain: ગુજરાતના દરિયાકાંઠાના વિસ્તારોમાં, ખાસ કરીને જાફરાબાદ, મહુવા (ભાવનગર) અને રાજુલા (અમરેલી) પંથકમાં કમોસમી વરસાદનો ત્રીજો રાઉન્ડ શરૂ થતાં જનજીવન પ્રભાવિત થયું છે. જાફરાબાદ શહેરમાં ધોધમાર વરસાદના પગલે પાલિકા દ્વારા જાહેર માઇક માં જાહેરાત કરીને નીચાણવાળા વિસ્તારો માં રહેતા લોકોને તાત્કાલિક સલામત સ્થળે ખસી જવા ની સૂચના આપવામાં આવી છે. ભાવનગરના મહુવા પંથકમાં રાત્રે 8:00 થી 10:00 વાગ્યા દરમિયાન લગભગ પોણો ઇંચ વરસાદ ખાબક્યો છે, જેના કારણે કમોસમી વરસાદથી અગાઉથી પ્રભાવિત ખેડૂતોની મુશ્કેલીઓમાં વધારો થયો છે. વીજળીના કડાકાભડાકા સાથે રાજુલા અને તળાજા પંથકના અનેક ગામડાઓમાં પણ જોરદાર વરસાદ શરૂ થયો છે.
જાફરાબાદ શહેરમાં પાલિકાની તાત્કાલિક જાહેરાત
અચાનક શરૂ થયેલા ધોધમાર વરસાદના કારણે જાફરાબાદ શહેરના વહીવટી તંત્રને તાત્કાલિક પગલાં લેવાની ફરજ પડી છે. છેલ્લા એક કલાકથી શરૂ થયેલા ભારે વરસાદને કારણે નીચાણવાળા વિસ્તારોમાં પાણી ભરાવવાની સંભાવના વધી છે. જાફરાબાદ નગરપાલિકા દ્વારા પાલિકાની ગાડીઓ મારફતે સમગ્ર વિસ્તારમાં જાહેર માઇક માં જાહેરાત કરવામાં આવી હતી. આ જાહેરાતમાં નાગરિકોને, ખાસ કરીને નીચાણવાળા વિસ્તારો માં રહેતા લોકોને, ભારે વરસાદની આગાહીને ધ્યાનમાં રાખીને તાત્કાલિક સલામત સ્થળે ખસી જવાની સૂચના આપવામાં આવી હતી. વહીવટી તંત્રની આ જાહેરાત લોકોને સાવચેત કરવા અને કોઈ અનિચ્છનીય ઘટના ટાળવા માટે કરવામાં આવી છે.
ભાવનગરના મહુવા અને તળાજામાં 'પડ્યા પર પાટુ' જેવી સ્થિતિ
ભાવનગર જિલ્લાના મહુવા તાલુકા પંથકના ખેડૂતો માટે સતત કમોસમી વરસાદનો આ ત્રીજો રાઉન્ડ 'પડ્યા પર પાટુ' જેવી પરિસ્થિતિ લઈને આવ્યો છે. અગાઉના બે રાઉન્ડમાં પણ મહુવા તાલુકો સૌથી વધુ પ્રભાવિત થયો હતો. રાત્રે 8:00 થી 10:00 વાગ્યાના માત્ર બે કલાકના ગાળામાં આ પંથકમાં લગભગ પોણો ઇંચ વરસાદ ખાબકી ગયો છે. મહુવાના ટાઉન વિસ્તારની સાથે સથરા, નૈપ, ભદ્રોળ, ઊંચા નીચા કોટડા, ગોપનાથ, મેથળા, કળસાર, વાઘનગર સહિતના કોસ્ટલ વિસ્તારના ગામોમાં ધોધમાર વરસાદ વરસી રહ્યો છે. આ જોરદાર વરસાદના કારણે ખેડૂતોની મુશ્કેલીઓ વધી ગઈ છે, કારણ કે તેમનો પાક પહેલેથી જ નુકસાન પામેલો છે.
રાજુલા અને તળાજા પંથકમાં વીજળીના કડાકાભડાકા સાથે વરસાદ
જાફરાબાદની જેમ જ, અમરેલી જિલ્લાના રાજુલા પંથક અને ભાવનગરના તળાજા તાલુકા પંથકમાં પણ વીજળીના કડાકાભડાકા સાથે કમોસમી વરસાદ શરૂ થયો છે. રાજુલા શહેરની સાથે ભેરાઇ, રામપરા, કડિયાળી, હિંડોરણા, પીપાવાવ, વડલી જેવા ગ્રામીણ ગામડાઓમાં ભારે વરસાદના દૃશ્યો જોવા મળી રહ્યા છે. ભારે વરસાદના કારણે ગામડાના માર્ગો પર જાણે નદીઓ વહેતી હોય તેવા દૃશ્યો સામે આવ્યા છે. તળાજા પંથકના પીથલપર, ગોપનાથ, ઝાંઝમેર, ઉચડી, રોજીયા, દાઠા, તલ્લી, વાટલીયા અને મેથળા સહિતના ગામડાઓમાં રાત્રિના સમયે અચાનક જ જોરદાર વરસાદ પડી રહ્યો છે, જેમાં કોસ્ટલ વિસ્તારના ગામો વધુ પ્રભાવિત થયા છે. સમગ્ર પંથકમાં સતત વરસાદને કારણે લોકો અને ખેડૂતોની ચિંતામાં વધારો થયો છે.
ટોપ સ્ટોરી
ટ્રેન્ડિંગ સમાચાર
