Gujarat Rain: 3 કલાકમાં 9 જિલ્લાઓમાં ગાજવીજ સાથે વરસાદ તૂટી પડશે, હવામાન વિભાગની લેટેસ્ટ આગાહી
મહીસાગર, ખેડા, ભાવનગર સહિત 9 જિલ્લામાં ગાજવીજ સાથે ધોધમાર વરસાદની શક્યતા; મોટાભાગના વિસ્તારોમાં મધ્યમ વરસાદ અને 41 થી 61 કિમી પ્રતિ કલાકની ઝડપે પવન ફૂંકાશે.
IMD Nowcast Gujarat rain alert: ગુજરાતમાં ચોમાસું સંપૂર્ણપણે સક્રિય થઈ ગયું છે અને રાજ્યના અનેક વિસ્તારોમાં મેઘ મહેર જોવા મળી રહી છે. હવામાન વિભાગે આગામી 3 કલાક માટે રાજ્યમાં વરસાદને લઈને 'નાવકાસ્ટ' (તાત્કાલિક આગાહી) જાહેર કર્યું છે. આ આગાહી મુજબ, આગામી ત્રણ કલાકમાં ગુજરાતના કેટલાક ભાગોમાં ભારેથી મધ્યમ અને હળવો વરસાદ વરસવાની શક્યતા છે. આ સમયગાળા દરમિયાન પવનની ગતિ 41 થી 61 કિલોમીટર પ્રતિ કલાકે ફૂંકાશે તેવી પણ આગાહી કરવામાં આવી છે, જે વાતાવરણને વધુ તીવ્ર બનાવશે.
હવામાન વિભાગની આગાહી મુજબ, રાજ્યના 9 જિલ્લાઓમાં ગાજવીજ સાથે ભારે વરસાદની શક્યતા છે. આ જિલ્લાઓમાં મહીસાગર, ખેડા, આણંદ, છોટાઉદેપુર, બોટાદ, ભાવનગર, અમરેલી, રાજકોટ અને સુરેન્દ્રનગરનો સમાવેશ થાય છે. આ ઉપરાંત, મોરબીમાં પણ ગાજવીજ સાથે ભારે વરસાદની આગાહી કરવામાં આવી છે. આ વિસ્તારોમાં ભારે વરસાદને કારણે નીચાણવાળા વિસ્તારોમાં પાણી ભરાવાની અને જનજીવન પ્રભાવિત થવાની શક્યતા છે.
રાજ્યના મોટાભાગના અન્ય જિલ્લાઓમાં મધ્યમ વરસાદની આગાહી કરવામાં આવી છે. જેમાં બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, અમદાવાદ, દાહોદ, પંચમહાલ, વડોદરા, ભરૂચ, નર્મદા, સુરત, કચ્છ, જામનગર, દેવભૂમિ દ્વારકા, પોરબંદર, જૂનાગઢ, ગીર સોમનાથ અને દીવનો સમાવેશ થાય છે. આ વિસ્તારોમાં પણ વાવણીલાયક વરસાદથી ખેડૂતોને રાહત મળશે અને ગરમીમાંથી મુક્તિ મળશે. નાગરિકોને અપીલ કરવામાં આવે છે કે તેઓ હવામાન વિભાગ દ્વારા જારી કરાયેલી સૂચનાઓનું પાલન કરે અને જરૂર વગર બહાર ન નીકળે. વીજળીના કડાકા ભડાકા સમયે સુરક્ષિત સ્થળે રહેવા અને ખુલ્લા વિસ્તારોમાં ન જવા પણ સૂચન કરવામાં આવ્યું છે.
આવતીકાલે વરસાદની આગાહી
ગુજરાતમાં ચોમાસું તેની પકડ મજબૂત બનાવી રહ્યું છે અને આગામી દિવસોમાં ભારે વરસાદની શક્યતા છે. હવામાન વિભાગે આવતીકાલે, 17 જૂનના રોજ રાજ્યના ઘણા જિલ્લાઓ માટે વરસાદને લઈને એલર્ટ જાહેર કર્યું છે. ખાસ કરીને, જૂનાગઢ અને ગીર સોમનાથ જિલ્લામાં મેઘગર્જના સાથે અત્યંત ભારે વરસાદની આગાહીને પગલે રેડ એલર્ટ જાહેર કરવામાં આવ્યું છે, જે સ્થાનિક વહીવટી તંત્ર અને નાગરિકો માટે ચિંતાનો વિષય બન્યો છે.
આ ઉપરાંત, પોરબંદર, રાજકોટ, અમરેલી, ભાવનગર, ભરૂચ, સુરત, નવસારી અને વલસાડ જિલ્લામાં અતિભારે વરસાદની સંભાવનાને ધ્યાનમાં રાખીને ઓરેન્જ એલર્ટ આપવામાં આવ્યું છે. આ વિસ્તારોમાં પણ ભારે જળભરાવ, નદીઓમાં પૂર અને નીચાણવાળા વિસ્તારોમાં પાણી ઘૂસવાની શક્યતા છે.
રાજ્યના અન્ય 8 જિલ્લાઓમાં ગાજવીજ સાથે ભારે વરસાદની આગાહીને પગલે યલો એલર્ટ જાહેર કરવામાં આવ્યું છે. આ જિલ્લાઓમાં દેવભૂમિ દ્વારકા, જામનગર, આણંદ, વડોદરા, છોટા ઉદેપુર, નર્મદા, તાપી અને ડાંગનો સમાવેશ થાય છે. આ વિસ્તારોમાં પણ સારો વરસાદ નોંધાઈ શકે છે, જે ખેડૂતો માટે ખુશી લાવશે, પરંતુ સાથે જ સાવચેતી રાખવી જરૂરી છે.
ટોપ સ્ટોરી
ટ્રેન્ડિંગ સમાચાર
