ગુજરાતમાં વરસાદનો બીજો રાઉન્ડ: પરેશ ગોસ્વામી અને અંબાલાલ પટેલે ભારે વરસાદની કરી આગાહી, જાણો લેટેસ્ટ અપડેટ
Gujarat weather forecast: ગુજરાતમાં વરસાદને લઈને હવામાન નિષ્ણાંત પરેશ ગોસ્વામી અને અંબાલાલ પટેલે આગાહી કરી છે.
Gujarat monsoon 2025: ગુજરાતમાં ચોમાસું સક્રિય થઈ ગયું છે, અને આગામી દિવસોમાં રાજ્યભરમાં વરસાદનું જોર વધવાની સંભાવના છે. બે અગ્રણી હવામાન નિષ્ણાતો, પરેશ ગોસ્વામી અને અંબાલાલ પટેલ, દ્વારા કરવામાં આવેલી આગાહીઓ પરથી આ સ્પષ્ટ થાય છે.
પરેશ ગોસ્વામીની આગાહી
હવામાન નિષ્ણાત પરેશ ગોસ્વામીએ જણાવ્યું છે કે, અરબ સાગરમાં જે સાયક્લોનિક સર્ક્યુલેશન બન્યું હતું, જેના કારણે 13 જૂનથી ગુજરાતમાં વરસાદની શરૂઆત થઈ ગઈ હતી અને 16 જૂને નૈઋત્યનું ચોમાસું સક્રિય થયું હતું, તે હવે સતત ઉત્તર તરફ ગતિ કરીને રાજસ્થાન જતું રહ્યું છે. આ સિસ્ટમ ગોવાથી શરૂ થઈને દક્ષિણ ગુજરાતથી ખંભાતના અખાત, સૌરાષ્ટ્ર અને ઉત્તર ગુજરાતના ભાગોમાંથી પસાર થઈ છે, અને જ્યાં જ્યાંથી પસાર થઈ છે ત્યાં ખૂબ સારો વરસાદ નોંધાયો છે.
પરેશ ગોસ્વામીના મતે, આ મોટી સિસ્ટમ રાજસ્થાનમાં કેન્દ્રિત હોવા છતાં, તેના આઉટર ક્લાઉડ્સ હજુ પણ ઉત્તર ગુજરાતના અમુક ભાગોને અસર કરી રહ્યા છે. આ સિસ્ટમનો જે ભેજ રહી ગયો છે તેના કારણે ગુજરાતમાં 23 જૂન સુધી છૂટાછવાયા સ્થળોએ વરસાદ પડવાની શક્યતા છે, જોકે તેની તીવ્રતા ઓછી રહેશે.
વરસાદના વિતરણ અંગે વાત કરતા, પરેશ ગોસ્વામીએ જણાવ્યું કે સૌરાષ્ટ્રના દરિયાઈ કાંઠાના કેટલાક ભાગોમાં હળવોથી મધ્યમ વરસાદ યથાવત રહેશે. કચ્છમાં વરસાદની તીવ્રતા ઘટતી દેખાશે. દક્ષિણ ગુજરાતના ડાંગ, વલસાડ, વાપી, બિલીમોરા અને બારડોલી જેવા વિસ્તારોમાં હળવાથી મધ્યમ વરસાદ ચાલુ રહેશે. ઉત્તર ગુજરાતના વાવ, થરાદ, બનાસકાંઠા, પાટણ અને મહેસાણામાં છૂટાછવાયા વિસ્તારોમાં હળવા મધ્યમ ઝાપટાં જોવા મળશે, જ્યારે સાબરકાંઠા, અરવલ્લી, મહીસાગરમાં સામાન્ય વરસાદ નોંધાઈ શકે છે.
આ સાથે જ, અમદાવાદ, ગાંધીનગર, કપડવંજ, આણંદ, નડિયાદ, ખેડા અને વડોદરા જેવા મધ્ય ગુજરાતના વિસ્તારોમાં પણ હળવાથી મધ્યમ ઝાપટાં પડી શકે છે. ગોસ્વામીએ સ્પષ્ટ કર્યું કે આ વિસ્તારોમાં આગામી બેથી ત્રણ દિવસ ભારે વરસાદ થાય તેવી કોઈ શક્યતા નથી. મધ્યપ્રદેશને લાગુ વિસ્તારોમાં પણ હળવાથી મધ્યમ વરસાદ નોંધાઈ શકે છે.
અંબાલાલ પટેલની આગાહી
બીજી તરફ, જાણીતા હવામાન નિષ્ણાત અંબાલાલ પટેલે ગુજરાતમાં ભારે વરસાદનું અનુમાન વ્યક્ત કર્યું છે. તેમના મતે, 22 જૂનના રોજ સૂર્ય આદ્રા નક્ષત્રમાં પ્રવેશ કરશે, જેના પરિણામે રાજ્યમાં ભારે વરસાદ વરસવાની સંભાવના છે. અંબાલાલ પટેલના અનુમાન મુજબ, દક્ષિણ ગુજરાત, મધ્ય ગુજરાત અને ઉત્તર ગુજરાતના કેટલાક ભાગોમાં ભારેથી અતિભારે વરસાદ વરસી શકે છે.
આ ઉપરાંત, અરબી સમુદ્રમાં બની રહેલી સિસ્ટમને કારણે, જુલાઈ મહિનાના પ્રથમ સપ્તાહમાં પણ ગુજરાતમાં જોરદાર વરસાદ વરસવાનું અંબાલાલ પટેલે અનુમાન વ્યક્ત કર્યું છે. આ આગાહીઓ દર્શાવે છે કે, આગામી દિવસોમાં ગુજરાતમાં ચોમાસું સંપૂર્ણપણે જામી જશે અને ખેડૂતો માટે સારા પાકનું આશાનું કિરણ બનશે.
ટોપ સ્ટોરી
ટ્રેન્ડિંગ સમાચાર
