વાવાઝોડા જેવો વરસાદ! ગુજરાતના 4 જિલ્લામાં રેડ એલર્ટ: ક્યાંક ભારે, ક્યાંક અતિભારે; જાણો તમારા જિલ્લામાં કેવા વાદળો ઘેરાશે
Gujarat Rain Alert: આજે રાત્રે અરવલ્લી, મહીસાગર, દાહોદ અને પંચમહાલમાં રેડ એલર્ટ; અમદાવાદમાં પણ વરસાદી માહોલ.
Gujarat Weather Alert: ગુજરાતમાં મેઘરાજાની જોરદાર સવારી ચાલી રહી છે, અને હવામાન વિભાગે આગામી 4 દિવસ એટલે કે જુલાઈ 30 સુધી ભારેથી અતિભારે વરસાદની આગાહી કરી છે. આજે શનિવારે (જુલાઈ 26) રાત્રે 10 વાગ્યાથી 1 વાગ્યા સુધી અરવલ્લી, મહીસાગર, દાહોદ અને પંચમહાલ જિલ્લામાં રેડ એલર્ટ જાહેર કરવામાં આવ્યું છે. આ ઉપરાંત, રાજ્યના મોટાભાગના જિલ્લાઓમાં પણ ભારે વરસાદની સંભાવના છે. અમદાવાદના આશ્રમ રોડ, મકરબા અને એસ.જી. હાઈવે સહિતના વિસ્તારોમાં પણ આજે હળવાથી ભારે વરસાદ નોંધાતા વાતાવરણમાં ઠંડક પ્રસરી હતી. આવતીકાલે રવિવારે (જુલાઈ 27) સાબરકાંઠા, અરવલ્લી અને મહીસાગરમાં રેડ એલર્ટ યથાવત્ રહેશે, જ્યારે અન્ય ઘણા જિલ્લાઓ માટે ઓરેન્જ અને યલો એલર્ટ અપાયું છે.
આજે રાત્રે 4 જિલ્લામાં રેડ એલર્ટ
હવામાન વિભાગના Nowcast મુજબ, આજે શનિવારે (જુલાઈ 26) રાત્રે 10 વાગ્યાથી લઈને આગામી 3 કલાક એટલે કે રાત્રે 1 વાગ્યા સુધીમાં અરવલ્લી, મહીસાગર, દાહોદ અને પંચમહાલ જિલ્લામાં રેડ એલર્ટ જાહેર કરવામાં આવ્યું છે, જે અત્યંત ભારે વરસાદનો સંકેત આપે છે. આ જિલ્લાઓમાં રહેતા નાગરિકોને સાવચેત રહેવા અને જરૂરી સાવચેતીના પગલાં લેવા વિનંતી કરવામાં આવી છે.
આ સિવાય, સાબરકાંઠા, મહેસાણા, ગાંધીનગર, અમદાવાદ, ખેડા, આણંદ, ડાંગ, વડોદરા, છોટા ઉદેપુર, ભરૂચ, નર્મદા, સુરત, તાપી, નવસારી અને વલસાડ સહિતના જિલ્લાઓમાં પણ ભારે વરસાદની શક્યતા વ્યક્ત કરવામાં આવી છે.
અમદાવાદમાં વરસાદી માહોલ
આજે શનિવારે (જુલાઈ 26) અમદાવાદ શહેરના અનેક વિસ્તારોમાં વરસાદ નોંધાયો હતો. આશ્રમ રોડ, મકરબા, એસ.જી. હાઈવે સહિતના વિસ્તારોમાં હળવાથી ભારે વરસાદ વરસતાં વાતાવરણમાં ઠંડક પ્રસરી હતી અને લોકોને ગરમી તથા ઉકળાટમાંથી રાહત મળી હતી.
આવતીકાલે (જુલાઈ 27) માટે વરસાદની આગાહી:
હવામાન વિભાગે આવતીકાલે રવિવારે (જુલાઈ 27) માટે પણ રાજ્યભરમાં વરસાદની તીવ્રતા અનુસાર વિવિધ એલર્ટ જાહેર કર્યા છે:
- રેડ એલર્ટ: સાબરકાંઠા, અરવલ્લી અને મહીસાગર જિલ્લા.
- ઓરેન્જ એલર્ટ: બનાસકાંઠા, પાટણ, મહેસાણા, સુરેન્દ્રનગર, દાહોદ, પંચમહાલ, છોટા ઉદેપુર, નર્મદા, નવસારી, વલસાડ જિલ્લા.
- યલો એલર્ટ: અમદાવાદ, ગાંધીનગર, આણંદ, ખેડા, વડોદરા, ભરૂચ, બોટાદ, ભાવનગર, અમરેલી, રાજકોટ, સુરત, તાપી, ડાંગ જિલ્લા.
જુલાઈ 28 માટે વરસાદની આગાહી
જુલાઈ 28 ના રોજ પણ રાજ્યમાં વરસાદનું જોર યથાવત્ રહેવાની સંભાવના છે. હવામાન વિભાગે બનાસકાંઠા અને સાબરકાંઠા જિલ્લામાં અતિભારે વરસાદને લઈને ઓરેન્જ એલર્ટ જાહેર કર્યું છે. આ ઉપરાંત, અન્ય 21 જિલ્લાઓ માટે યલો એલર્ટ અપાયું છે, જેમાં પાટણ, મહેસાણા, ગાંધીનગર, અમદાવાદ, સુરેન્દ્રનગર, ખેડા, અરવલ્લી, મહીસાગર, દાહોદ, પંચમહાલ, આણંદ, વડોદરા, છોટા ઉદેપુર, ભરૂચ, નર્મદા, નવસારી, વલસાડ, ભાવનગર, અમરેલી, રાજકોટ અને બોટાદ જિલ્લામાં ભારે વરસાદની આગાહી છે.
ટોપ સ્ટોરી
ટ્રેન્ડિંગ સમાચાર
