એક સાથે ચાર સિસ્ટમ સક્રિય થતા રાજ્યમાં આવતી કાલથી ગાજવીજ સાથે વરસાદ તૂટી પડશે, જાણો ક્યા જિલ્લામાં થશે અસર

હવામાન વિભાગની આગાહી અનુસાર આવતીકાલે નર્મદા, તાપી, ડાંગ, નવસારી અને વલસાડમાં કમોસમી વરસાદ વરસી શકે છે.

પ્રતિકાત્મક તસવીર

Gujarat Weather: એક સાથે ચાર સિસ્ટમ સક્રિય થતા રાજ્યમાં આવતી કાલથી કમોસમી વરસાદની હવામાન વિભાગે આગાહી વ્યક્ત કરી છે. રાજસ્થાનની ઉપર બે, મધ્ય પ્રદેશ પર એક અને અરબ સાગર પર એક સિસ્ટમ સક્રિય થઈ છે. આ ચાર સિસ્ટમ સક્રિય થતા કાલથી રાજ્યના વિવિધ ભાગોમાં ગાજવીજ સાથે વરસાદ વરસી શકે છે.

હવામાન વિભાગની આગાહી અનુસાર આવતીકાલે નર્મદા, તાપી, ડાંગ, નવસારી અને વલસાડમાં કમોસમી વરસાદ વરસી શકે છે. તો આગામી પાંચ દિવસ ન માત્ર દક્ષિણ ગુજરાત મધ્ય ગુજરાત, ઉત્તર ગુજરાતમાં અને સૌરાષ્ટ્રમાં પણ કમોસમી વરસાદનું હવામાન વિભાગે અનુમાન વ્યક્ત કર્યું છે.

12 મેના રોજ અરવલ્લી, સાબરકાંઠા, દાહોદ, છોટા ઉદેપુર, નર્મદા, તાપી, નવસારી, વલસાડ, ડાંગ તો 13મેના રોજ અરવલ્લી,સાબરકાંઠા, દાહોદ, છોટા ઉદેપુર,નર્મદા, તાપી નવસારી અનેવલસાડમાં વરસાદ વરસી શકે છે.

તો 14 મેના રોજ  વલસાડ, નવસારી, ડાંગ, તાપી, બોટાદ, જામનગર, અમરેલી,ભાવનગરમાં કમોસમી વરસાદ વરસી શકે છે.

દેશને લઈ હવામાન વિભાગની આગાહી

પશ્ચિમ રાજસ્થાન સિવાય દેશના અન્ય ભાગોમાંથી હીટવેવ ગઈ છે. એએનઆઈના અહેવાલ મુજબ, ભારતીય હવામાન વિભાગના વૈજ્ઞાનિક સોમા સેને કહ્યું કે, માત્ર પશ્ચિમ રાજસ્થાન અને કેરળમાં હીટવેવ અને યલો એલર્ટ જારી કરવામાં આવ્યું છે.

હવામાન વિભાગ અનુસાર પશ્ચિમ રાજસ્થાનમાં 10 મેના રોજ ગરમીનું મોજું ચાલુ રહેશે અને તે પછી તેમાં ઘટાડો થવાની સંભાવના છે. IMD અનુસાર, 12 મે 2024 ના રોજ મધ્ય, પૂર્વ અને દક્ષિણ દ્વીપકલ્પ ભારતમાં વાવાઝોડું, વીજળી અને જોરદાર પવનની સંભાવના છે.

હવામાન વિભાગ અનુસાર પશ્ચિમ બંગાળમાં 10 મે અને ઓડિશામાં 10 થી 12 મે દરમિયાન અલગ-અલગ સ્થળોએ ભારે વરસાદની શક્યતા છે. તે જ સમયે, ઉત્તર-પૂર્વના રાજ્યોમાં પણ ભારે વરસાદની સંભાવના વ્યક્ત કરવામાં આવી હતી.

10 મેના રોજ અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં છૂટાછવાયા સ્થળોએ ભારે વરસાદની સંભાવના છે. 10 મેના રોજ મધ્યપ્રદેશ અને વિદર્ભમાં કરા પડવાની સંભાવના છે.

12 અને 13 મેના રોજ આંતરિક કર્ણાટક, કેરળમાં ભારે વરસાદની સંભાવના છે. તેલંગાણાના રાયલસીમામાં 13 મેના રોજ ભારે વરસાદની સંભાવના છે. ઉત્તરાખંડમાં 10 થી 13 મે દરમિયાન વિવિધ સ્થળોએ કરા પડવાની સંભાવના છે.

IMD અનુસાર, જો મેદાનો માટે મહત્તમ તાપમાન ઓછામાં ઓછું 40 ડિગ્રી સેલ્સિયસ અથવા તેનાથી વધુ અને પહાડી વિસ્તારોમાં ઓછામાં ઓછું 30 ડિગ્રી સેલ્સિયસ અથવા વધુ સુધી પહોંચે છે, તો તે પ્રદેશ હીટવેવની સંભાવના છે.