Gujarat: કાળઝાળ ગરમી વચ્ચે 3 જિલ્લાના વાતાવરણમાં પલટો, અરવલ્લી, સાબરકાંઠા અને બનાસકાંઠામાં કમોસમી વરસાદ
દેશમાં આજે ત્રીજા તબક્કાનું મતદાન ચાલી રહ્યું છે. ગરમીનો પાર સતત વધી રહ્યો છે. ગુજરાતની 25 લોકસભા બેઠકો પર મતદાન ચાલી રહ્યું છે. ગુજરાતમાં કાળઝાળ ગરમી પડી રહી છે.
Gujarat weather Update: દેશમાં આજે ત્રીજા તબક્કાનું મતદાન ચાલી રહ્યું છે. ગરમીનો પાર સતત વધી રહ્યો છે. ગુજરાતની 25 લોકસભા બેઠકો પર મતદાન ચાલી રહ્યું છે. ગુજરાતમાં કાળઝાળ ગરમી પડી રહી છે. મતદાન વચ્ચે રાજ્યના ત્રણ જિલ્લાના વાતાવરણમાં પલટો આવ્યો છે. અરવલ્લી, સાબરકાંઠા અને બનાસકાંઠા જિલ્લામાં કમોસમી વરસાદ વરસ્યો છે.
અરવલ્લી જિલ્લાના વાતાવરણમાં પલટો આવ્યો હતો. અરવલ્લી જિલ્લામાં કમોસમી વરસાદ વરસ્યો છે. ભિલોડા તાલુકામાં ધોધમાર વરસાદ પડ્યો છે. ધોમધખતા તાપ બાદ અચાનક વાતાવરણમાં પલટો આવતાં લોકોને ઉકળાટથી થોડી રાહત મળી છે. મોડાસાના ટીંટોઈ પંથકમાં પણ વરસાદ છે. મોડાસા શામળાજી હાઈવે પર વરસાદ છે. વરસાદ પડતાં વાહન ચાલકો મુશ્કેલીમાં મુકાયા છે, વિઝિબીલિટી ઘટતાં લોકો હેડ લાઇટ શરૂ કરીને વાહન ચલાવતાં જોવા મળ્યા હતા.
સાબરકાંઠા જિલ્લાના વાતાવરણમાં પણ પલટો આવ્યો હતો. ઇડર અને વડાલી પંથકમાં વાતાવરણ પલટાયુ છે. ભર ઉનાળે ઇડર અને વડાલીમાં વરસાદી ઝાપટા પડ્યા છે. ઇડરના ભૂતિયા અને વડાલીના જેતપુર કંપા,ચુલ્લા અને વડ ગામડામાં વરસાદી ઝાપટા પડ્યા છે. કમોસમી વરસાદને કારણે લોકોને ગરમી અને ઉકળાટથી રાહત મળી છે.
બનાસકાંઠા જિલ્લામાં પણ વરસાદી માહોલ જોવા મળ્યો હતો. દાંતીવાડા, પાંથાવાડા અને ધાનેરાના ગ્રામ્ય વિસ્તારોમાં કમોસમી વરસાદ વરસ્યો છે. ઉકળાટ વચ્ચે બપોર બાદ વાતાવરણમાં પલટો આવ્યો હતો. હવામાનમાં બદલાવની વચ્ચે પણ મતદારો મતદાન મથક ઉપર પહોંચ્યા હતા.
આગામી પાંચ દિવસ ગુજરાતનું હવામાન સૂકું રહેવાની શક્યતાઓ
હવામાન વિભાગના અમદાવાદ કેન્દ્રના વૈજ્ઞાનિકના કહેવા મુજબ, આગામી પાંચ દિવસ ગુજરાતનું હવામાન સૂકું રહેવાની શક્યતાઓ છે. જ્યારે છઠ્ઠા અને સાતમા દિવસે હળવા વરસાદની સંભાવનાઓ કેટલાક વિસ્તારો માટે વ્યક્ત કરવામાં આવી છે. વરસાદની શક્યતાઓ દક્ષિણ ગુજરાત માટે વ્યક્ત કરાઈ રહી છે. આગામી 5 દિવસ દરિયાકાંઠાના વિસ્તારમાં ગરમ અને ભેજવાળા પવન ફૂંકાશે તેવી આગાહી કરવામાં આવી છે. આ ઉપરાંત 12 અને 13 મેના રોજ સામાન્ય વરસાદની શક્યતા વ્યક્ત કરવામાં આવી રહી છે. ગુજરાતના દરિયાકાંઠાના વિસ્તારમાં ગરમી સાથે બફારાની સ્થિતિ આગામી દિવસોમાં રહેવાની સંભાવનાઓ છે. મહત્તમ તાપમાનમાં આગામી દિવસોમાં કોઈ મોટા ફેરફારની સંભાવનાઓ નથી.
RAINFALL DISTRIBUTION MAPS DT 07.05.2024 pic.twitter.com/PsuzeHPNjd
— IMD Ahmedbad (@IMDAHMEDABAD) May 7, 2024
ટોપ સ્ટોરી
ટ્રેન્ડિંગ સમાચાર
