Waqf Amendment Bill: અમિત શાહે સમજાવ્યું- કેવી રીતે કામ કરશે વકફ બોર્ડ, 'માત્ર ઘોષણા કરવાથી જમીન વકફ નહીં બને'

Waqf Amendment Bill in Lok Sabha: આજે લોકસભામાં વકફ સુધારા બિલ 2024 પર ચર્ચા થઈ રહી છે. કેન્દ્રીય ગૃહમંત્રીએ કહ્યું કે સંસદ દ્વારા કાયદો પસાર થયા પછી, તેનું પાલન કરવું પડશે.

કેન્દ્રીય ગૃહમંત્રી અમિત શાહ

Source : SansadTV

Waqf Amendment Bill in Lok Sabha: લોકસભામાં ગૃહમંત્રી અમિત શાહે વિપક્ષ પર નિશાન સાધતા કહ્યું કે વક્ફ સુધારા બિલ અંગે ભ્રમ ફેલાવવાનો પ્રયાસ થઈ રહ્યો છે. તેમણે કહ્યું, "આપણે ફક્ત તે જ મિલકતોનું દાન કરી શકીએ છીએ જે આપણી હોય, આપણે સરકારી મિલકતનું દાન કરી શકતા નથી."

અમિત શાહે જણાવ્યું, સરકાર વક્ફ બિલ કેમ લાવી
અમિત શાહે લોકસભામાં કહ્યું, "ધાર્મિક પ્રવૃત્તિઓ કરવા માટે બિન-મુસ્લિમોને નોકરી પર રાખવામાં આવી રહ્યા નથી. તેઓ ફક્ત પોતાની વોટ બેંક સુરક્ષિત કરવા માટે લોકોને ડરાવવા અને મૂંઝવણમાં મૂકવાનો પ્રયાસ કરી રહ્યા છે." અમિત શાહે કહ્યું કે જો 2013નો સુધારો પસાર ન થયો હોત તો આજે આ સુધારો લાવવાની જરૂર ન પડી હોત. કોંગ્રેસ સરકારે દિલ્હી લુટિયન્સની 125 મિલકતો વકફને આપી દીધી.

જ્યાં પણ વકફ જાહેર કરવામાં આવે છે, તેની તપાસ થવી જોઈએ
અમિત શાહે કહ્યું, "વકફમાં કોઈ પણ બિન-ઈસ્લામિક સભ્યને મંજૂરી આપવામાં આવશે નહીં. મુતવલ્લી બિન-મુસ્લિમ વ્યક્તિ રહેશે નહીં. ઓડિટથી પારદર્શિતા આવશે. જ્યાં પણ વકફ જાહેર કરવામાં આવે છે, ત્યાં તે જમીન સરકારી જમીન છે કે નહીં તે ચકાસવું આવશ્યક છે અને કલેક્ટર સિવાય બીજું કોઈ તેની ચકાસણી કરી શકશે નહીં."

અમિત શાહે સંસદમાં લાલુ યાદવનો ઉલ્લેખ કર્યો 
ગૃહમંત્રી અમિત શાહે કહ્યું, "2001 થી 2012 સુધી 1 લાખ કરોડ રૂપિયાની મિલકત લીઝ પર આપવામાં આવી હતી. લાલુ પ્રસાદ યાદવે 2013માં કહ્યું હતું કે જમીન હડપ કરવામાં આવી હતી. લાલુ યાદવે કડક કાયદો લાવવાની પણ વાત કરી હતી. લાલુ યાદવે ગેરકાયદેસર કબજો મુક્ત કરાવવા કહ્યું હતું."

વકફ જમીન હોવાનો દાવો કરીને એક મસ્જિદ બનાવવામાં આવી

ગૃહમંત્રી અમિત શાહે કહ્યું કે હિમાચલમાં વકફ જમીન હોવાનો દાવો કરીને એક મસ્જિદ બનાવવામાં આવી હતી. તેમણે તમિલનાડુથી કર્ણાટક સુધીના ઉદાહરણો આપ્યા જેના પર વિપક્ષે હોબાળો મચાવ્યો અને તેમના પર ગૃહને ગેરમાર્ગે દોરવાનો આરોપ લગાવ્યો.

 કાયદો સ્વીકારવો જ પડશે - અમિત શાહ
કેન્દ્રીય ગૃહમંત્રી અમિત શાહે કહ્યું, "અહીં એક સભ્યએ કહ્યું કે લઘુમતી આ કાયદાને સ્વીકારશે નહીં. આ સંસદનો કાયદો છે, દરેકે તેને સ્વીકારવો પડશે. કોઈ કેવી રીતે કહી શકે કે તેઓ તેને સ્વીકારશે નહીં? આ કાયદો ભારત સરકારનો છે અને તેને સ્વીકારવો જ પડશે."

ગૃહમંત્રી અમિત શાહે કહ્યું, "આ બિલ જમીનને રક્ષણ પૂરું પાડશે. ફક્ત ઘોષણા કરવાથી કોઈની જમીન વકફ નહીં બને. અમે પુરાતત્વ વિભાગ અને ASI ની જમીનને રક્ષણ પૂરું પાડીશું. સામાન્ય માણસની ખાનગી મિલકત સુરક્ષિત રહેશે."

આ પણ વાંચો

 ‘કોઇ પણ સરકારી મિલકતો વકફની સંપત્તિ નહી ગણાય’, આ મુદ્દાઓથી સમજો નવું વકફ બિલ

Waqf Amendment Bill: વકફ બિલના પક્ષમાં કે વિરુદ્ધમાં? ઉદ્ધવ ઠાકરેની પાર્ટીએ લોકસભામાં પોતાનું વલણ કર્યું સ્પષ્ટ