MCD Election: દિલ્હી નગર નિગમ ચૂંટણીમાં 50 ટકા મતદાન, 7 ડિસેમ્બરે આવશે પરિણામ
દિલ્હી મ્યુનિસિપલ કોર્પોરેશનની ચૂંટણી માટે રવિવારે મતદાન થયું છે. રાજ્ય ચૂંટણી પંચે જણાવ્યું કે દિલ્હી મ્યુનિસિપલ કોર્પોરેશન (MCD) માટે રવિવારે સાંજે 5.30 વાગ્યા સુધી કુલ 50 ટકા મતદાન થયું છે.
MCD Election 2022: દિલ્હી મ્યુનિસિપલ કોર્પોરેશનની ચૂંટણી માટે રવિવારે (4 ડિસેમ્બર) મતદાન થયું છે. રાજ્ય ચૂંટણી પંચે જણાવ્યું કે દિલ્હી મ્યુનિસિપલ કોર્પોરેશન (MCD) માટે રવિવારે સાંજે 5.30 વાગ્યા સુધી કુલ 50 ટકા મતદાન થયું છે. રાજ્યની ચૂંટણી પેનલે વધુમાં જણાવ્યું હતું કે રાષ્ટ્રીય રાજધાનીના ઘણા બૂથમાં સાંજે 5.30 વાગ્યાના નિર્ધારિત સમય પછી મતદાન ચાલી રહ્યું હતું. દિલ્હી મ્યુનિસિપલ કોર્પોરેશન (MCD)ની ચૂંટણીમાં સાંજે 4 વાગ્યા સુધી કુલ મતદાનની ટકાવારી 45 ટકા હતી.
MCDના 250 વોર્ડ માટે સવારે 8 વાગ્યાથી મતદાન શરૂ થયું હતું. છેલ્લા 15 વર્ષથી દિલ્હી MCDમાં ભાજપનું શાસન છે. આ વખતે ભાજપ, આમ આદમી પાર્ટી અને કોંગ્રેસ વચ્ચે ત્રિકોણીય મુકાબલો છે. ચુસ્ત સુરક્ષા બંદોબસ્ત વચ્ચે સવારે મતદાન પ્રક્રિયા શરૂ થઈ હતી.
7 ડિસેમ્બરે મતગણતરી હાથ ધરાશે
રાજ્ય ચૂંટણી પંચે અગાઉ જણાવ્યું હતું કે આ ચૂંટણીમાં 1.45 કરોડથી વધુ નાગરિકો મતદાન કરવા પાત્ર છે. આ વર્ષે કુલ 1,349 ઉમેદવારો મેદાનમાં છે. નાગરિક ચૂંટણી માટે 13,638 મતદાન મથકો ઉભા કરવામાં આવ્યા હતા. મતગણતરી 7 ડિસેમ્બરે થશે.
ભાજપ અને AAP વચ્ચે ટક્કર જોવા મળી રહી છે
MCD ચૂંટણીના પ્રચાર દરમિયાન ભાજપ અને AAP વચ્ચે જોરદાર ટક્કર જોવા મળી રહી છે. ભાજપે AAP વિરુદ્ધ અનેક વીડિયો ક્લિપ જાહેર કરી હતી. જેમાં કથિત રીતે જેલમાં બંધ દિલ્હી સરકારના મંત્રી સત્યેન્દ્ર જૈનને VIP ટ્રીટમેન્ટ લેતા બતાવવામાં આવ્યા હતા. આમાંથી એક વીડિયોમાં સત્યેન્દ્ર જૈન જેલમાં મસાજ લેતા દેખાડવામાં આવ્યા હતા. આરોપને નકારી કાઢતા AAPએ કહ્યું કે સત્યેન્દ્ર જૈનને માત્ર તબીબી સલાહ પર જ ફિઝિયોથેરાપી આપવામાં આવી રહી છે.
કોંગ્રેસે પણ પૂરો જોર લગાવ્યો હતો
આ વખતે આમ આદમી પાર્ટીએ ભાજપને સત્તા પરથી હટાવવા માટે સંપૂર્ણ તાકાત લગાવી દીધી છે જ્યારે ભાજપે પોતાની મોટી જીતનો દાવો કર્યો છે. દિલ્હીમાં 2015થી સંસદીય, વિધાનસભા અને મ્યુનિસિપલ ચૂંટણીઓમાં સતત હારનો સામનો કરી રહેલી કોંગ્રેસે આ વખતે પણ પૂરી તાકાત લગાવી છે. 2017ની મ્યુનિસિપલ ચૂંટણીઓમાં, ભાજપે 270 વોર્ડમાંથી 181 વોર્ડ જીત્યા હતા, જેમાં AAP અને કોંગ્રેસને સરળતાથી હરાવી હતી. AAPએ તેની પ્રથમ નિકાય ચૂંટણીમાં 48 વોર્ડ જીત્યા હતા, જ્યારે કોંગ્રેસે 30 વોર્ડ જીત્યા હતા.
ટ્રેન્ડિંગ સમાચાર
ટોપ સ્ટોરી
