JAMMU KASHMIR : સીમાંકન પંચે જમ્મુ કાશ્મીરના સિમાંકનનો ફાઇનલ રિપોર્ટ તૈયાર કર્યો, જાણો કેવી હશે નવી જમ્મુ-કાશ્મીર વિધાનસભા
Delimitation of Jammu and Kashmir : સીમાંકન પંચના રિપોર્ટમાં કહેવામાં આવ્યું છે કે જમ્મુ-કાશ્મીરની તમામ પાંચ લોકસભા બેઠકો પર સમાન સંખ્યામાં વિધાનસભા બેઠકો હશે.
JAMMU KASHMIR : જમ્મુ અને કાશ્મીરના ચૂંટણી નકશાને ફરીથી દોરવા સંબંધિત સીમાંકન પંચે તેનો ફાઇનલ રિપોર્ટ સૂચિત કર્યો છે અને તેને સરકારને સુપરત કર્યો છે. જમ્મુ અને કાશ્મીરમાં જૂન 2018 થી કોઈ ચૂંટાયેલી સરકાર નથી.
43 જમ્મુ, 47 કાશ્મીર ક્ષેત્રમાં વિધાનસભા બેઠકો
રિપોર્ટ અનુસાર, સીમાંકન પંચના રિપોર્ટમાં કહેવામાં આવ્યું છે કે જમ્મુ-કાશ્મીરની તમામ પાંચ લોકસભા બેઠકો પર સમાન સંખ્યામાં વિધાનસભા બેઠકો હશે. 9 બેઠકો અનુસૂચિત જનજાતિ માટે અનામત રહેશે. 90 વિધાનસભા બેઠકોમાંથી, 43 જમ્મુ ક્ષેત્રમાં હશે, જ્યારે 47 કાશ્મીર ક્ષેત્રમાં હશે. સીમાંકન માટે જમ્મુ અને કાશ્મીર એક પછી એક જોવામાં આવ્યું છે.
2011ની વસ્તી ગણતરીને આધાર બનાવાયો
જમ્મુમાં 6 સીટો વધારવામાં આવી છે, જે પહેલા 37 હતી. સીમાંકન આદેશમાં કહેવામાં આવ્યું છે કે તમામ વિધાનસભા મતવિસ્તારો સંબંધિત જિલ્લાની સીમામાં હશે.રિપોર્ટ અનુસાર, કાશ્મીરી સ્થળાંતર કરનારાઓ અને પાકિસ્તાન અધિકૃત કાશ્મીર - POK ના વિસ્થાપિત લોકો માટે વધારાની બેઠકની ભલામણ કરવામાં આવી છે. જમ્મુ અને કાશ્મીર પુનર્ગઠન અધિનિયમ અનુસાર 2011ની વસ્તી ગણતરીને સીમાંકનના આધાર તરીકે લેવામાં આવી છે.
જમ્મુ-કાશ્મીરમાં જલ્દી જ થશે ચૂંટણી
કેન્દ્રીય ગૃહ પ્રધાન અમિત શાહે તાજેતરમાં કહ્યું હતું કે સીમાંકન પ્રક્રિયા પૂર્ણ થયા બાદ જમ્મુ-કાશ્મીરમાં ચૂંટણી યોજાશે. રાજકીય પક્ષોએ સીમાંકનની પ્રક્રિયામાં વિવિધ વિસંગતતાઓ દર્શાવી હતી. તેમણે કહ્યું કે આ લોકશાહીને ગંભીર રીતે નુકસાન પહોંચાડવાનું પગલું છે.
આવતીકાલે પૂરો થઇ રહ્યો છે સીમાંકન પંચનો કાર્યકાળ
જસ્ટિસ રંજના દેસાઈની આગેવાની હેઠળના સીમાંકન પંચની રચના 2 માર્ચ, 2020ના રોજ કરવામાં આવી હતી. કોરોનાની સ્થિતિને કારણે કમિશનનો કાર્યકાળ બે વાર લંબાવવામાં આવ્યો હતો. કમિશનનો કાર્યકાળ આવતીકાલે 6 મે સુધીનો છે. 5 ઓગસ્ટ 2019 ના રોજ 370 ને દૂર કરીને અને કેન્દ્રશાસિત પ્રદેશની રચનાને કારણે કેન્દ્ર દ્વારા સીમાંકનની જરૂરિયાત અનુભવાઈ. સીમાંકન પંચમાં મુખ્ય ચૂંટણી કમિશનર સુશીલ ચંદ્રા અને જસ્ટિસ દેસાઈની સાથે JKના મુખ્ય ચૂંટણી અધિકારીનો સમાવેશ થાય છે.
ટોપ સ્ટોરી
ટ્રેન્ડિંગ સમાચાર
