Covaxin: ભારતની કોવેક્સીનને હવે આ દેશે મંજુરી આપી, પ્રવાસ કરતા લોકોને મળી મોટી રાહત

છેલ્લા લાંબા સમયથી આ મંજુરીની રાહ જોવાઈ રહી હતી.

કોવેક્સીન

Germany Approves Covaxin: ભારતમાં તૈયાર થયેલી ભારત બાયોટેકની કોરોના રસી કોવેક્સીનને હવે જર્મનીએ મંજુરી આપી દીધી છે. છેલ્લા લાંબા સમયથી આ મંજુરીની રાહ જોવાઈ રહી હતી. ત્યારબાદ હવે એ તમામ લોકોને રાહત મળી છે જેઓ જર્મનીના પ્રવાસ પર જતા હોય છે. પ્રવાસ કરતા એ તમામ ભારતીયોને હવે 1 જૂનથી વેક્સીનેશન સર્ટિફિકેટ આપવાની જરુર નહી પડે. કોવેક્સીનને આ મંજુરી ટ્રાવેલિંગ માટે અપાઈ છે.

લોકોને મોટી રાહતઃ
ઉલ્લેખનીય છે કે, જે પણ વેક્સીનને કોઈ દેશ મંજુરી નથી આપતો ત્યારે એ વેક્સીન લેનારા પ્રવાસીઓએ ઘણા નિયમોનું પાલન કરવાનું હોય છે. જેમાં કોવિડ વેક્સીનેશન સર્ટિફિકેટ, કોરોના ટેસ્ટ, ક્વોરંટાઈન જેવા નિયમો પાળવા પડતા હોય છે. જેનાથી લોકોને ઘણી પરેશાનીઓનો સામનો કરવો પડતો હોય છે. કોવેક્સીન લેનારા લોકોને જર્મનીમાં આવા જ નિયમોનું પાલન કરવું પડતું હતું. પરંતુ હવે મંજુરી મળ્યા બાદ આ એક મોટી રાહત છે.

અમેરિકામાં ક્લિનિકલ ટ્રાયલ પરનો પ્રતિબંધ હટાવાયોઃ
અગાઉ, અમેરિકાના ફૂડ એન્ડ ડ્રગ એડમિનિસ્ટ્રેશન (FDA) એ ભારત બાયોટેકની કોવિડ-19 રસી 'કોવેક્સીન'ના ત્રણ ક્લિનિકલ ટ્રાયલના બીજા તબક્કાના ક્લિનિકલ ટ્રાયલ પરનો પ્રતિબંધ હટાવી લીધો છે. યુએસ અને કેનેડામાં આ રસી માટે ભારત બાયોટેકના ભાગીદાર ઓકુજેન ઇન્ક દ્વારા જાહેર કરવામાં આવેલા નિવેદનમાં આ માહિતી આપવામાં આવી છે. નિવેદનમાં કહેવામાં આવ્યું છે કે, "અમે ખૂબ જ ખુશ છીએ કે અમે કોવેક્સીન માટે અમારા ક્લિનિકલ ટ્રાયલ સાથે આગળ વધી શકીએ છીએ. અમારું માનવું છે કે એક વધારાની, અલગ પ્રકારની રસી ઉપલબ્ધ કરવાની જરૂરિયાત પ્રાથમિકતા બનેલી છે.

એપ્રિલમાં ટ્રાયલ અટકાવવાનો FDAનો નિર્ણય યુએસ કંપનીના ટ્રાયલમાં સામેલ લોકોને રસીના ડોઝના સપ્લાયમાં અસ્થાયી રૂપે સ્વૈચ્છિક રીતે રોક લગાવવાના નિર્ણય પર આધારિત હતો. ભારતમાં રસીના ઉત્પાદન એકમો પર વિશ્વ આરોગ્ય સંસ્થાની ટિપ્પણીઓને પગલે આ નિર્ણય લેવામાં આવ્યો હતો.